Matthew 24

1Teketa Jiisuu' dootuu'nava pankava-ita siarara tenkenuko bakaning barevare-nupoong tee-anko porou' avatevaronanka-koo nau-antavaava'naang. 2Jiisuu'ke aa'puru' teing, “Aing kapoo'nanka dii'ke ee ooverimang? Masika' naurampimang, teing aing kapananka teing tuurampaavaining. Teinge piatooroi deroaama nare' nii'nare'koo daue pante'ario' sipaavauka'.” 3Teketa Jiisuu' teke Olive'po'namii-koo baka ba'nanuio' bakaning barevare-nupoong tee-anko porora bii'ka otoroi nia'aama aa'pau', “Naumeriai tee are'moong tee' nkoaravaing, ee'noko taa'ni'anta aming da' poaing-koong, ee'noko aung batei oparavaing-koong taa'ni'anta aminge?” 4Teketa Jiisuu'ke maku'urima aa'puru', “Bakei, tarerariri otoriaing nantoonge poo-antaraari'neeng. 5Ai' nantoong mmau'ke tee poroma nkaang miring tampaama aa'paavaing, ‘Ning tee ee'nung Kumponinge Pako'pari'nii',’ ee'noko tee' nkoarima nantoong mmau' tosiaariko siompaariaing. 6Ee'noko dii'ke tee karenanka tavo'kuko ee'noko tamung minkuaako taaraveriaing, teka dii' ee'ning tarerariaing dii' domang puraaniri'neeng tee-koo, ai' teing teing kapoo' tee' oro'nanka nkoaravaining, teka botu mme' basiarava'. 7Narung kansi' i'amparama nii'nung kansi' turampuainge. Ee'noko narung muu' i'amparama nii'nung muu' turampuainge. Ee'noko napo' nantoong peera-koo booroainge, ee'noko u'mi'nanka nkoaravai nii'ning kansi'nanka-koo. 8Aing teing tamung tutuna'ning sisikeerananka manikuma mantompumana' tooto' ponto'ke due'uko. 9“Ee'noko tenang ee'nang dii' teing dai'daarira tavo'daariaining oraka' nkoraarii'naang, ee'noko dii'koo nii'ning dupisi'daariaing. Ee'noko dii' teing ookara nantoonge munte'daariaining ning nkaang miring-po'nupoong deentariko. 10Ee'noko tenang ee'nang mmau' nantoong tee biikaang masika'anta-ita dua'ariaing, ee'noko nii'ninge bii'maikorori' munte'aarima tooka kompai nii'ning kare-nupoong-koo siaariai dupisi'aarii'naang. 11Ee'noko mmau' nakaro-nupoong oro'pariaing tenang daang Kumponing-etaining tamparima, ee'noko mmau' nantoong tosiaarima poo-antavaariai. 12Ee'noko tenang orara aarumo beremparako mmau' biikaang piaa tee ka'matompuaing. 13Ee'noko naning purimpario' bera asirana'mung basiaravaing deeko' domamparavaing. 14Ee'noko tee tutung tee aung doorenang tampara ookara kansi'koo daankiaavaing ookara nantoonge Kumponing bakaang muu'koo tumpariaina' taaravaava'naang, teketa tee-koo dama'due doong asi' tavo'kuaing.” 15“Ee'noko tenang tee kapoo' maremaare ooveriaing meepo'ke donkonuio' teie nakaronunge Danieloi minkuvuu'na' tee te' meepo' nuampa-antavuaing.” (Daari Meekung-koo deeruerira tasi'peripeu'.) 16“Tenang tee donkonuio' ooaara teing a' Judia'nameng-koo otoroaining miinanka-koo deto bakei navo'ka koo'ariaing! 17Naning daunavaro-koo otoaing deeko' siarara pava-koo kuung beauka' bakaang kavo nka-koo. 18Napo' naning mintoong-koo otoainoo'keta pava-koo toroaravauka' bakaang mononopa' nka-koo. 19Bakei piaaru'nuka otoroaing teing maniku' kempo'nuka ee'noko napo' teing biurukaa' noonoo'koo otoroaining, ai' teing tapotaponuka, mmari'koo makotua'. 20Kunsirariaing tee aung batei mmaririaina'mung kamaari bakanang batei deemparavauka'na', nii'noo' Doong Uaana'mung deemparavauka'. 21Tee arikung te'mung tavo'kuaing tee bakei dau basi aung kansi' tutuntoma-ita nkoaru'ning-koo bera e'mung doong-koo basinoo'koo, ee'noko napo' dama'ke tee' basi otoauka'nunge. 22Teing doong arikeng Kumponinge apuka'antavuaruko deeko' ookara nantoong teing oparipeu'ning, teka Kumponinge bakaning miru'nisinuka piaavurima tee batei apuka'antavui miru'uu'nung. 23“Ee'noko tenang ee'nang nii'nung naninge aa'duriko deeko', ‘Ooveriai, aung tee Kumponinge Pako'pari'nii' tavo'kuaing-koong!’ nii'noo' aa'puko, ‘Auntang!’ tee masika'antaveriauka'. 24Ai' teing nakaro-nupoong ee'noko pako'pari'nii'nuka daang Kumponing-etaning tamparimaing porora taa'ni'anta pankenanka ta'nimpaarii'na' nkoaavaing nantoong tosiaarima Kumponing bakaning naro'ka papaara-antavaarii'naang, tavo'arapeu'nung-pina'. 25Ooveriko, aung tee ninge tero uro'kanoo'ke naurampimang. 26Tee'koo naninge nii'nunge naururima aa'duriko, ‘Auntanto mee'bora' sirakamaa'ke otomang,’ te' beriauka'. Napo' aa'puko deeko', ‘Aung anke kuunge otomang,’ tee masika'antaveriauka'. 27Teka tee piping isipo'keta pipimpuma ootukunairu namu'ke siraka'pumana' tee' nari' ookarai oomaavaing ning Tee Naning-naumpo' Paning-etaing moko. 28Are' tokoo bonku' otoainoo' teing mareoi'nanka te' oosiarima sira'paavaing.” 29“Tenang ee'nang namu'ke manki'antananka teing doong-koo tavo'kuaining tankinuko tee duaa' tee tenang mutaanampuaing, ee'noko kaara arakavaravauka', ee'noko beento'nanka paning-eta tankavariai. Ee'noko teing purinto'nanka kapoo' paning-kooning teing dankampuriaininge. 30Ee'noko tenang ee'nang tee taa'ni'anta Tee Naning-naumpo' Paning-etaing ookara kansi' tare-koo poaing-koong oro'paravaing teke paning-koo, ee'noko nantoong ookara kansi'kooning tenang ee'nang avoreaama orarunsiariaing. Ee'noko teinge ning Tee Naning-naumpo' Paning-etaing taa'ni'moi moko oomaavaing, purinto' ninka kamo'ke depeto aa'na' meena'moi. 31Ee'noko ninge tuuviri aa'na' karantavama~ botoarampaing teing nkaning koosinunanka, ee'noko teinge oosiaariaing teing nkaning miru'nisinuka kansi'koo ookutunairu-eta. 32“Enang tee dii'ke tee baisirovang ooverira noru'eriaing, aa'nomaung: Tenang para' nenuvara'uko noru'erikoo' teketa deto puaravuu'naang due'ka. 33Tee' nari' napo' dii'ke teing aing ookara kapoo'nanka ooverira noru'eriaing tee tee due', karanaang-anko poing. 34Masika' naurampimang ninge dii', aing enanavarang mme' paa'ariaruko nkoaravaing teing aing kapoo'nanka ookara. 35Paning ee'noko kansi' teing paa'areaining teka nkaang kara tee paa'aravauka'nung.” 36“Naninge noru'ua' tee doong ee'noko tee batei. Koosinunanka paning-kooninge noru'aava'. Napo' ninge, tee bauringe, noru'ampa', teka teie narunge Mma'ke noru'ui otong tee batei. 37Tee' nari' Nooa' bakanang nkoaru'na' nkoaravaing tee ning Tee Naning-naumpo' Paning-etaing moainang. 38Aa'noko'na': tenang batei doua pankaing mme' poaruko taamanaama, naikaama, nampeema otoroko' bera Nooa' aaka'nareng-koo tumparu'na'mung-koo basi. 39Tee kapoo' nkoaravaing-koo noru' otoroa' bera douai pora teing ookara aaruvuru'. Tee' nari' ee'na' nkoaravaing tenang ning Tee Naning-naumpo' Paning-etaing moainang. 40Kenaankara naninka mintoong-koo otoreko narung tenaanka-koo pari'uma, narung sipuaing. 41Napo' manikumaara kenaankara-koo nari' iinkureko nani pari'uma nani sipuaing. 42“Tee'koo tanatarariri otorimaatoai, ai' dii'ke tee noru'eria' tee diikaang Ovoring poaina'mung. 43Teka ee' noru'eriaing dii'ke, naninge pava okovenunge tee bakiaa'nko pomanang muunga noru'ui dei tee tee maamuari otopeu' tee bakaang pava pesi'koo taura'pua'. 44Tee' nari' dii' maamurariri otoriainge, ai' tee ning Tee Naning-naumpo' Paning-etaing tenang batei ning moaing-pina' noru'meriaruko moaing.” 45- 46“Baa tee naning matau, bakaang ovoringe bakanava tare-koo botovumaung, naning kake'iinara botovotonaa'nuka batei makosinang bau'koo miru'nisi, biraanke-antavuaing tee botovotonaa' bakaang ovoringe pora tee' nkoarako meu'pura. 47Masika' naurampimang ninge, teie ookutuning kapoo' okovumaing-koo tarenara deeng-antavuaing. 48- 50Teka teie botovotonaa'ke orarai ee' noru'uaing deeko', ‘Nkaang ovoring ana'aring po'koo,’ ee'noko tavu' tutumpuriai teing nii'ning botovotonaa'nuka, ee'noko teing ninka nantoong naikaama kanu'arimaing ninka nari' nkoariai, teie bakaang ovoringe poma meu'puu'naang doong paapaa'ui otoaina'mung tee po'koo, ee'noko batei noru'uauka'nang. 51Ee'noko teie aa'na' kiimatavuaing tee, ee'noko naro' sipuai teing ninka ampirinunuka ninka, te' ee'noo' nantoong biromparima si'da' dovang kakirinkuarimatoainoo' sisikeera-koo otoroi.”

will be added

X\