Matthew 23

1Teketa Jiisuu'ke nantoong karinga ee'noko teing bakaning barevare-nupoong aa'puru', 2“Teing boto naunuka ee'noko Boto Keperuu'navitu Moosesi paariau'ning bakaang boto nau-anta-koo. 3Tee'koo diikaning ovo'ma'nuka deempariko taaraverereriaing kapoo' nauraariaining, teka kapoo'nanka teinge nkoaavaining dii'ke nkoveriauka', ai' teinge tee kapoo' daankiaamaung nko-nkoi siong-antavaavaung. 4Teinge tee pore'antavaarimaung mmau' boto nantoonge tareaava'naang botoaarima, teka bii'ka teinge oki'noo' tareaava'. 5“Ookara kapoo'nanka teinge nkoaamaing nantoonge oo-koo maroita nkoaamaung. Aa'nomaung: dootuu'koong taa'ni'anta teing dapapi' dai'arikoo', ee'noko dootuu'kooning baarong-koong puraparari bakei isikeng kurumparikoo'. 6Paroro kante-koo te' ovontung biikanoo' ba'nang-koo piavorokoo'. Napo' pava dootuu'nairu-koo ba'nava'nani'nanka tampeng-koo ba'naniaakoo' nantoonge ankampaaria'naang. 7Napo' nantoong kunekune'nairu-koo nantoonge onkeonke'aarimaatoo'naang piavorokoo' ‘Nau-anta Pankaing’ tampaarima. 8Teka dii' teing ‘Nau-anta Pankaing!’ tantaariauka'ning, ai' diikaang Siong-anta tee narung masikung otong, ee'noko dii' teing namaia' makosinuka. 9Ee'noko napo' naning narung anke kansi'koo diuma tamperiauka', ai' dii' teing narung masikung Diuma otong, ee'noko tee tee paning-koo otomaung. 10Ee'noko nau-antananka pankeng tantaariauka', ai' dii' teing tee narung Nau-anta Pankaing oto'deruring tee Kumponinge Pako'pari'nii'. 11Naning dii'koo pankaing masikung tee ee'nung dii'koo meu'ke pakupaku nkovuaing. 12Baa tee naning baka deto basiaramaung dama'ke doonko basi deemparavaing, ee'noko baa tee naning boonko noru'ari otomaung tee tee ee'nung deto basi deemparavaing. 13Baka' piaaru'nuka dii' boto naunuka ee'noko dii' Boto Keperuu'navitu, bakei tora'kiriaining dii' ampirinunuka. Dii' ee'ning dii'ka muu' paninung-koo tuntariaruma nii'ning napo' taura'perereriarukoo' te' tumparipeu'ning. 14Baka' piaaru'nuka dii' boto naunuka ee'noko dii' Boto Keperuu'navitu, bakei tora'kiriaining dii' ampirinunuka. Dii'ke naaroonku biikaning kapoo'nanka pari'ererima opevurerererikoo' kunsi isikanankai dakaraka'darima nantoonge tampa' ooraarii'naang. Tee'koo dii' teing bakei aa'na' kiimatarariaining. 15Baka' piaaru'nuka dii' boto naunuka ee'noko dii' Boto Keperuu'navitu, bakei tora'kiriaining dii' ampirinunuka. Nanunanu' isipo' basi nkoverikoo' pirung-koo daue ee'noko kansi'koo narung naning dii'koo bere'araa'naang, ee'noko tenang dii'anko poko dii'ke bakei dii'koo dau basina' mosianung-koo nanu'koong deeng-antaverikoo'. 16Baka' piaaru'nuka dii' kaputu'dariri nantoong taung nau-anta-koo piarorimaing aa'perima, ‘Naning dootuu'nava pankava tampuma marakavaravaing tee kapoo' otoa', teka baa tee naning dootuu'nava pankava-koong kooro tampuma marakavaravaing tee tee dai'ari otong tee bakaang maraka-anta dupe-anta-koo.’ 17Dii' bakei kaputu'nuka mutaanang-kooning, arera teing-koo aing-koo aa'ning-koo dau basi: kooro nii'noo' dootuu'nava pankava tee kooro meeka'antavumanava? 18Napo' aa'perikoo' dii'ke, ‘Naning boonturoma-koo marakavarako kapoo' nkoaravauka'nung, teka naning te' kapoo' darimpaamaung-koo marakavarara deeko' teie tee tee dupe-antavuaing.’ 19Dii' bakei kaputu'nuka mutaanang-kooning, arera kapoo' pankaing masikung teing-koo, tee kapoo' darimpaamaung ai' te' boonturoma tee kapoo' te' darimpaamaung meeka'antavumaung? 20Tee'koo baa naning boonturoma-koo marakavaravaing tee te'koo marakavaravaing ee'noko ookara kapoo'nanka teke otoroining-koo nari'. 21Ee'noko baa tee naning dootuu'nava pankava-koo marakavaravaing tee teva-koo marakavaravaing ee'noko tee-koo Kumponing-koo teke otomaung-koo nari'. 22Ee'noko baa tee naning paning-koo marakavaravaing tee tee Kumponing bakanoo' ba'nanui tare nkoroma-koo marakavaramaang ee'noko napo' tee-koo te' ba'nanui otomaung-koo nari'. 23“Baka' piaaru'nuka dii' boto naunuka ee'noko dii' Boto Keperuu'navitu, bakei tora'kiriaining dii' ampirinunuka, ai' dii'ke tee avutevu' napoka dovang oki'nareka' kivorana' tankaamperima baarauni-koo~ namanto Kumponing averikoo', sirivita' dovang ko'dompuu', teka teing kapoo' boto-koo pankeng dama'duerikoo' aa'ning: aarumo koonto'na' simpe', aarumo piaa unaa-anta-po'nung, ee'noko Kumponing masika'antavui kake'iiari oto'. Aing ee'ning teing dii'ke naro'ka nko-koo makosining. 24Dii' kaputu'nuka taung nau-anta-koo piarorimaing, oki'nareka' kapoo'nanka aa'na' pukerariri maa'erikoo', teka kapoo' pankaing opo' dunkumperikoo'. 25Baka' piaaru'nuka dii' boto naunuka ee'noko dii' Boto Keperuu'navitu, bakei tora'kiriaining dii' ampirinunuka~. Diikaning kaapunanka-koo ee'noko bantovanto'nanka-koo dama'du aa'na' kiiroraa'antaverikoo' duu'perima, teka kuung teing-koo bakiaa'ke maanto', ee'noko mono bakaang pia narung siong. 26Dii' Boto Keperuu'navitu kaputu'nuka, tutung kuung kiiroraa'antaverimaatoai teing diikaning kaapu ee'noko bantovanto'nanka aa'noaina' dama'du nari' kiiroraa' otoai. 27Baka' piaaru'nuka dii' boto naunuka ee'noko dii' Boto Keperuu'navitu, bakei tora'kiriaining dii' ampirinunuka. Dii' kuvi dako'doma dama'du aa'na' kiiroraa'antavaamaing-pina' oro'nuka dama'du-eta tampa' oro'paraa'naang, teka kuung bakei boo'nuka-koong make'ke maanto' ee'noko amutemurii' ku'mi'nanka. 28Tee' nari' dii' dama'du-eta nantoonge koonto'nuka-pina' ooraarimaung teka dii'koo kuung ampirinunge~ maanto' ee'noko boto toto'ke. 29“Baka' piaaru'nuka dii' boto naunuka ee'noko dii' Boto Keperuu'navitu, bakei tora'kiriaining dii' ampirinunuka. Dii'ke nakaro-nupoong dako'aaru'noo' tampa' kanierikoo', koonto'nuka biikaning dako'domanairu tampa' nepunepu'erikoo'. 30Aa'perimaung, ‘Nii' tenang nakaro-nupoong niikakatauro otoroko'nang o'nori dei nakaro-nupoong dupisi'aariko pakumariarupeu'.’ 31Teka daang dakaraka'darima tee' minkurarikoo', ai' diikaang aarumoi teing biurukaa' sira'durimaung nakaro-nupoong tero dupisi'aaru'ning. 32Aia' enang dupe-antaveriaing tee' nari' tee temurii' aarumo orara diikakatauroi tero nkoaako'nung. 33Dii' borukoporonuka, boru' doparopa-po'nung baurukaa', arekee' napo' donta'peripeu' tenang Kumponinge tuutunanturira mosianung-koo be'koo tanturiko? 34“Tee'koo ninge nakaro-nupoong dii'anko botoarampaing ee'noko Daari Meekung-koo norukasi'nuka ee'noko nau-antanuka. Nii'ning tee teing-koo dii'ke dupisi'erereriaining aa'barata' dovang-koo bi'erererima. Ee'noko nii'ning teing mura'ereriaining diikaning pava dootuu'nanka-koo kuunge osi kanteveri bata'ererima. 35Tee tee ookara urikupoong koonto'nuka dupisi'aariko'ning-koong tuutunang dii'ke komperiaing teing-koo Eebelo'keta bera Sakaraia'koo basinoo'ka, tee Sakaraia' tee Berakaia bauring boonturoma ee'noko meekavaro-koo meu'ka dii'ke diumaraang-koo kuunge dupisi'eru'nung te' dootuu'nava pankava-koo. 36Masika' naurampimang, aing teing ookara kapoo'nanka enanavarang-koo basiarako tora'kiriaing.” 37“Oi baka' Jerusalema'nupoong, Jerusalema'nupoong, dupisi'erererimaing Kumponing bakaning nakaro-nupoong, ee'noko teing dii'koo botovurimaing kapange too'pererima dupisi'erererikoo', arekee'ning batei-koo ninge dii' naro'koo karirampimaung kokoree'ke baurukaa' kupa'koo boong naro'urimana', teka dii' aroo'dariaung. 38Aing ee, Kumponinge diikanoo' osi si'during dii'ke dii'ka tare-koo bera nuampavoo'naang. 39Ee'noko naurampimang dii'ke tee ning napo' oomeriaroo'naang bera tenang batei aa'meriainang, ‘Biraankenung tee naning Ovoring bakaang miring-koo pomaatomaung.’”

will be added

X\