Matthew 20

1“Tee muu' paninung tee tee-pina' oro', naning mintoonau-po'nung tero tane'ke bera nantoong bakanau-koo mintoong-koo bokuvuru'nung, na'mung doong-koo mintoompariko moo'koo namikue moo'urii'naang tampura; 2Ee'noko aroo'aririo' teie bakanau-koo botovuru'. 3Teketa napo' duaa' deto sirang poio' bera baaveromaa nii'ning nantoong tamung donkonaio' oovuru'. 4Ee'noko aa'puru' teing, ‘Dii' aing berira nkanau-koo mintoontariai, ee'noko ninge tee makosina' moo'dampiaing.’ Ee'noko teing berou' mintoong-koo. 5Teketa napo' duaaki'nang ee'noko kamunoo'nang napo' beu' bera tee' nari' tutung nkovuu'na' nkovuu'. 6Teketa napo' muung-aapenang berai'nange nii'ning nantoong tamung donkonaio' oovuru', ee'noko nia'uru' teing, aa'puru', ‘Dii' aming-koo tamung donkoniri otorimaang e'mung ootukuna'mung kapoo' nkoveria'?’ 7Teinge aa'pau', ‘Naninge bokumuriaruko tee' o'norimaang.’ Ee'noko teie aa'puru' teing, ‘Dii' napo' berira nkanoo'ke mintoontariaing, ee'noko moo' makosina' nkaveriaing.’ 8“Teketa muumpuko teie mintoong okovenunge teing bakaning mintoong-nupoong tarevuriko'ning bokuvura aa'puu', ‘Teing nantoong mintoomparirining bokuerira moo' averiaing asi'ning-eta bera tutuna'nupoong-koo basi.’ 9Teing mintoong-nupoong muung-aapenang bokuvurio' tutumpariru'ning poroio' moo'koo namikuna' avuru'. 10Tee'koo teing tutung bokuvurio' mintoong tutumpariru'ning mmau' nkavaavaing-pina' noru'ariru', teka teing napo' tee' namikuna' mono kante nkakau'. 11Ee'noko teinge tee' nkavaara minkuminkuau' tee mintoong okovenung, aa'paama, 12‘Dake aing dama' mintoong tutumparira narung aua mintoomparirining nii' uipaarii'koo aa'na' mintoomaririning ninka nari' basie moo'ering.’ 13Teka teie narung teing-koo karavuma aa'puu', ‘Ee mmaiko', ninge dii' oraka' nkorampia'. Aroo'eriaruinge ee temiku namiku mintoontarira nka-koo? 14Nkaverira aung diikaang moo' beriai. Teing dama' bokuaransing tee' nari' avu'koo piamoi o'nong. 15Oraka'ke kapoo' nkaang mooni' ninge piamopeu'na' nari' nko-koo? Ai' dii' domang oraru'kiring ee ning tampa' avusiro'mario'?’ 16Tee' nari' teing nantoong dama'du-nupoong teing ureaavaining, ee'noko ureaamaing teing dama'duariaining.” 17Enang tee Jiisuu' uroitaa' Jerusalema'aape daanto beroma bakaning nanai'keta kenaankara barevare-nupoong taapo' tonta'urira teka aa'puru' teing, 18“Aing ee, Jerusalema'aape merimang ee'noko teka ee'noo'ka naninge tooka kompui ning Tee Naning-naumpo' Paning-etaing taura'muu'naang aa'ning-koo Piristi'nuka-koo ovontung ee'noko boto naunuka, ee'noko teinge tee ning dupisi'koo manemaavaing. 19Ee'noko teinge Ju'deeaing-anko si'maavaing teka akapeu'maama mura'maava'naang, ee'noko aa'barata'koo bi'maara dupisi'maavaing. Teketa beenang doong deemparako napo' daa'maravaing.” 20Teketa napo' Siebedi baurinketa beuko Jiisuu'anko pou' baurinketa ninka. Pora uro'kanoo' kinkinura eentavaru'. 21Jiisuu'ke aa'puu', nia'uma, “Da' aming kapoo' piaromaang?” Ee'noko tenie aa'puu', “Amainta nnurinketa dake enang ee' miru'ereaing narung tampavine-aape ba'nanuaing ee'noko narung mare'aanavine-aape da'koo tenang da' daurarong deentaravainang.” 22Teketa Jiisuu'ke temainta aa'puretu', “Dee'ke noru'erea' tee kapoo' eentameremaatomaung. Dee'ke ee teru' ntonaru' oraka' dee'naru' ning naikampainaru' naikirepeu'? Ee'noko tee sisikeera ning meeka'antamaravainge ee meeka'antararepeu'?” Ee'noko temaintai maku'urema aa'puretu', “Ee', nee' makosira.” 23Teketa Jiisuu'ke aa'puretu', “Ee', masika' dee'ke naiereaing teru' nkanareng-eta, ee'noko tee' sisikeerai meeka'antarareainge ning meeka'antamaravaina', teka tee ba'nava'nani' ning-koo tampavine-koo nii'noo' mare'aanavine-koo ning-koo ninge miru'koo makosi deea'. Teie Mma'ke bampuu'na' ba'nantareaing.” 24Ee'noko teinge napo' nanai'ke tee' taaravaara teinge iikoo'aaretu' temainta. 25Teketa Jiisuu'ke ookara naro' bokuvurira aa'puru', “Dii'ke noru'eri otong teing nantoong Ju'deeaing-kooning urantanuka bii'ka ovontumparimaing ee'noko biikaning pankenankai biikaang iri'ke nantoong etuaarikoo'. 26Teka dii'koo tee' nkoaravauka'nung. Ee' nkoaravaing dii'koo: baa tee naning Kumponing bakaang duta-koo pankaimparaa'naang piavoaing dii'koo meu'ke tee tee ee'nung pakupakunung deemparavaing. 27Ee'noko napo' baa tee naning dii'koo dau basi deemparaa'naang piavoaing tee tee ee'nung napo' dii'koo botovotonaa' otoaing. 28Ning Tee Naning-naumpo' Paning-etaing tee'ke, kansi'koo ovoring-pina' oto'koo moa', teka pakupakunung deemaraa'naang mou'nung, ee'noko nkaang domaang dua'koo teing-koo mmau' boo'keta simpiri'arii'naang.” 29Teketa tenang Jiisuu' teing ninka bakaning barevare-nupoong Jerikoo'namono sipaara beroko nantoong karingai siompau' tee. 30Kenaanka naninka kaputu'ka taung miiringe ba'nanuresi otoreko', ee'noko tenang tee Jiisuu' teketa tankinuko taaravureta tenaanka bokurema aa'puretu', “Ovoring, Deevita' bakanaving-koong, piaamereai nee'.” 31Teka nantoong karingai aka'paarema dooroomparee'naang botoaaretu'. Teka tenaanka baru' aa'na' bokuretu' aa'purema, “Ovoring, Deevita' bakanaving-koong, piaamereai nee'.” 32Jiisuu'ke te' datearara bokuvuretu' tenaanka, teketa aa'puretu', “Dee' ninge arekee' nkorampee'naang piaroremang?” 33Tenaankai nauvurema aa'puretu', “Ovoring ee, nee' ookampee'naang piamoremang.” 34Jiisuu' bakaang domang aa'na' piaavou' tenaanka-koo, ee'noko beekaang duta kompureko namu'ke bantoreta ookuretu'. Teketa Jiisuu' siompuretu'.

will be added

X\