Matthew 19

1Teketa tenang Jiisuu'ke tee aung karananka minku bakevura Kaaleli'nameng sipura Judia'navora'aape pare'aru' Joo'dani-nari-koo amenka'koonoo'. 2Ee'noko nantoong karingai Jiisuu' siompai te' napo' berou', ee'noko teka taare-antavuru' teing. 3Ee'noko nii'ning boto keperuu'navitu nari' Jiisuu'anko pororai'nange aavavaama aa'pau', “Botoi ee taura'pui otong naninge ba'aang bata'koo baka piavoma deeko'?” 4Jiisuu'ke maku'urima aa'puru' teing, “Dii'ke ee deeruerima tasi'periaung tee Kumponinge pupu'uu'nang donkaani ee'noko manikuma nari' nkovuretu'na'? 5Ee'noko aa'pui otong Daari Meekung-koo, ‘Tee'koo donkaanie baumararing sipureta ba'aang ninka pinka'areaing, ee'noko tee tenaanka narung mono deempareaing.’ 6Enang tee, kenaanka deemparea' teka narung deemparesing. Tee'koo kapoo' Kumponinge be'nu'antavuu'nung naro'ka naninge tankaampuauka'nung.” 7Ee'noko teinge nia'aama napo' aa'pau', “Teka Moosesie aming-koo taura'puma aa'puu', ‘Naninge ba'aang sipuma deeko' narung karavoto~ daarivuaing nampeesi toto'puing tasi'anta-koo?’” 8Teketa Jiisuu'ke maku'urima aa'puu', “Moosesie tee' taura'puu'noo' dii'ankaampi si'koo tee dii' diikaang domang iveka'doriko, teka pupu'aru'noo'ke Kumponinge tee' minkuvua'. 9Teka ee' naurampimang ninge, baa tee naning ba'aange tutung kaukauro nkovuaruko bata'ura ee'noko oovunani nampura deeko' teie nampeesi orarivumaung.” 10Teketa bakaning barevare-nupoonge aa'pau' tee, “Ei, bakei naning ba'aang ninka tee' nari' dai'aresi otoremaatoaing deeko' nantoong nampeesiaria' otoaing-koo tampa'.” 11Teketa Jiisuu'ke maku'uma aa'puru', “Tee' minkuerimatomana' ookara nantoonge aroo'aavarupeu', teing naing Kumponinge tee' oto'koo miru'urimaing deeko' tee' otoropeu'. 12Aa'nomaung-koo: nii'ning makosiaavaing ke'de-ita ponto'arikoo', ee'noko nii'ning nantoonge deeko' tuukavaarikoo', ee'noko nii'ning maroita nampeesi-koo piavoroarukoo' muu' paninung narung-koo kei'oroo'naang. Baa naning tee' oto'koo aroo'aravaing tee makosi tee' otoaing.” 13Teketa toirekaa' oki'nareka' Jiisuu'anko tavo'aaru' Jiisuu'ke bireng pante'urira kunsivurii'naang teing. Teka teinge bakaning barevare-nupoonge poteaariko' teing tavo'aaru'ning. 14Ee'noko Jiisuu'ke aa'puu', “Teing toirekaa' taura'perereriko poroai ning-anko, para'ereria', ai' tee muu' paninung nantoong amurii' okovuriaing.” 15Teketa tenang bireng pante'urira teing-koo teketa tenkenuu'. 16Enang tee teketa naning narung Jiisuu'anko pora nia'uma aa'puu', “Nau-anta, aming kapoo' tampara ninge nkoamira tee domaang oparavauka'nung kompampaing?” 17Jiisuu'ke maku'uma aa'puu' tee, “Dake aming-koo ning kapoo' tampara nkovepeu'nung-koo nia'memaang? Ai' Kumponing narung masikung tampara otong. Da' tee domaang oparavaung-koo tuntaraa'naang piarora deeko' dake tee bakaang botonanka siompeaing.” 18Teie aa'puu', “Boto areing?” Ee'noko Jiisuu'ke maku'uma aa'puu', “Aing ee' oro' botonanka: 19‘Naning dupisi'eauka', Nampeesi orarieauka', Bakiaa' nkoveauka', Daang-koo tuutunampeauka', Daumararing deto noru'eresi pakuereaing,’ ee'noko ‘Dake tee naning da'koo due'nung daka piaararamana' nari' tee' piaaveaing.’” 20Ee'noko teie nemakai aa'puu', “Aing ookara teroita tanatavantu'ning, ai' aming kapoo' ninge mme' nkoampa'?” 21Jiisuu'ke maku'uma aa'puu' tee, “Dake ookara dupe-anta-koo piarora deeko' bera kapoo'nanka dakaning ookara baavevera mooni' nkavera ata'oi'nuka-koo tankaampeaing. Tee' nkovera Paning-koong kavonanka oto'deruaing. Ee'noko ning siomei poai.” 22Ee'noko teie nemakai tee' taaravura teketa orarunsiari tenkenuu' tee kavokavoro mmau'po'nung deemparako. 23Jiisuu'ke tee' oovura bakaning barevare-nupoong nauvurima aa'puru', “Ninge masika' naurampimang dii', tee naning kapoo' mmau'po'nung bakei pore' masikung te' muu' paninung-koo tung-koo. 24Ee'noko napo' unampansi naurampii'naang, kaameli'navoro' bamaru'koong busie tumparavarupeu'na' bakei naning kavonanka-po'nung dau basinoo' makotua' Kumponing bakaang muu'koo tung-koo.” 25Ee'noko tenang teinge bakaning barevare-nupoonge tee' minkuvuko taaravaara bakei aa'na' ta'ninau'. Ee'noko aa'pau', “Nka enang baa domaang moo'aravaing?” 26Ee'noko Jiisuu'ke teing oovurira aa'puru', “Nantoong bii'ka domaang moo'koo makosi deea', Kumponinge deeko' ookara kapoo' nko-koo makosi.” 27Teketa Piitai baari'uma aa'puu', “Aung ee, teka nii'ke ookara kapoo'nanka niikaning sipampiru'nung da' siontampima, ee'noko nii'ke aming nkavampiaing?” 28Jiisuu'ke maku'urima napo' aa'puru' teing, “Ninge masika' naurampimang, tenang ookara kapoo' neraka'paravainang, ning Tee Naning-naumpo' Paning-etaing teke nkanoo' ba'nava'nani'domai ovorimari ba'nanampainang paninung meenasie baumaritaa', tee' nari' napo' dii' kante ba'nantariri kara simpe'erimaatoaing teing kivora-ita kenaanka muu' Isireeli-nupoong-koo ovontuntariri. 29Ee'noko ookara nantoonge aing aa'ning nkaang miring pankaing-anta-koo sipau'ning: pavananka, biumaraang, biurukaa' toire', nii'noo' biikaang kansi', teinge tee daaku'namu'pie maku' nkavaavaing ee'noko napo' tee barenku domaang oparavaung-koong okovuriaing teing. 30Teka mmau' nantoong ureai otoromaing dama'ke dama'duariaing, ee'noko dama'duariri otoromaing ureaavai.”

will be added

X\