Matthew 16

1Nii'na'mung teing Boto Keperuu'navitu ee'noko napo' teing Noru' Pitunavitu Jiisuu'anko porora tee paara-antavaama nia'aama aa'pau', “Narung taa'ni'anta Paning-etaing naumeriai da' Kumponing-etaing deeko' tasi'dampiaina'.” 2Jiisuu'ke maku'urima aa'puru', “Tenang muung-aapenang dii'ke aa'perimaung, ‘Tane' tampa'mung, tampa' otoo'naang, kamo' urung deemparing.’ 3Ee'noko napo' tane'nang aa'perikoo', ‘E'mung irinke nkoaraa'naang, ai' paning kamo'ke urunge nee'uing.’ Dii'ke tee tampa' noru'eri otong kamo' ooverima nkoaravaina' noru'koo, teka dii'ke emu'nung batei bakaang taa'ni'anta noru'eriarupeu'. 4Dii' enanavarang bakei oreng, nampeesi orarinuka-pina' diikaang Ovoring siperima, tosirarima aa'merimaing, ‘Taa'ni'anta paning-etaing iro' naumeriko deeko' taararampiaing.’ Bakei Kumponinge dii' taa'ni'anta nau-anta-koo kasivuarura narung masikung arurii'naang, aa'noaing: teie ning taa'ni'anta deeng-antamuaing temu' Joona' taa'ni'anta deeng-antavuu'na'.” Teketa Jiisuu' teing teka sipurira tenkenuu'. 5Teka tenang tee-koo nuaru'koo beroma teinge bakaning barevare-nupoonge tee taamang nka-koo ampa'orou'. 6Ee'noko nuaru'koo pako'arirai'nange Jiisuu'ke aa'puru' teing, “Tanatarariaing teing-koo Boto Keperuu'navitu-koo ee'noko Noru' Pitunavitu biikaang iisi-koo.” 7Ee'noko tee'puio' tasi'paavarura kareaama aa'peeko', “Aunge pa nii'ke taamang nkavampiaruing-koo tee' minkuvumaang.” 8Teketa Jiisuu'ke tee biikaang minkunaa noru'ura aa'puru' teing, “Dii' baru' masika'antaropanuka, aming-koo dii'ka minkurarimang taamang nkaveriarura? 9Koonto' ee mme' dii'ke tasi'meria' ning? Noru'eria' otong teing pa'noko'nuri berete', nantoonge pa'noko' kokorei'ke naiau'ning, ee'noko teing-koo arekee'ning peku' oosierira maanto'eru' dama'ke taa'pario'? 10Napo' ee noru'eria' otong teing pa'noko'keta keura berete' nantoong karenaumo kokorei'ke naiau'ning ee'noko teing-koo arekee'ning peku' oosierira maanto'eru' dama'ke taa'pario'? 11Arekee'koo dii'ke tasi'periaunge? Ai' ninge tee taamang-koo minkuampaung. Teka dii' ee'ning tanatarariaining tee-koo Boto Keperuu'navitu ee'noko noru' pitunavitu biikaang iisi-koo.” 12Teketa tenang teinge tasi'pau' teie tee tee iisi berete'koo sipaamaung minkuvuma tee' nauvuria', teka tee kapoo'koo teinge Boto Keperuu'navitue ee'noko Noru' Pitunukai nau-antavaarimaung-koo tee' minkuvuriko'. 13Teketa tenang Jiisuu' bakaning barevare-nupoong ninka Sisaria' Pilipai-navuntu'koonoo' berora teing nia'urima aa'puru', “Ning Tee Naning-naumpo' Paning-etaing nantoonge baa tammaamaung?” 14Teinge maku'aama aa'pau', “Nii'ninge aa'daamaung, ‘Aung pa tee Jooni Minkinara,’ ee'noko nii'ninge Eliasi poaing-koong tantaamaung, ee'noko nii'ninge napo' urikupoong nakaro-nupoong-koo narung, boo'keta daa'aru'nung, ai' Jeremaia pa.” 15Ee'noko napo' Jiisuu'ke aa'puru' teing, “Teka dii'ke napo' baa tammerimaung ning?” 16Teketa Saimoni' Piitai bari'uma aa'puu', “Da' aa' tee Kumponinge teroita Pako'pari'nii' nantoong domamperira tareveriainoo'koo, tee Kumponing domantoo' bauring.” 17Jiisuu'ke maku'uma aa'puu', “Biraankeraring da', Jooni bauring, ai' aung tee naninge kansi'koonge naurua', teka tee Mma'ke paning-koonge nauruing. 18Ee'noko ninge aa'damaang, da' tee ee'nung Piita, Manto, ee'noko aung-koo boia'koo e'maniang-koo ninge tee nkaang dootuu' donkong-antavampaing, mosianung-koonge purinto'ke puru'uauka'nung. 19Ee'noko ninge da' tee kii'nanka arompaing teing muu' paninung-kooning. Aming kapoo' dake anke kansi'koo pinka'eaing deeko' paning-koo tee' pinka'aravaing, ee'noko aming kapoo' anke kansi'koo dapa'eaing deeko' paning-koo tee' nari' dapa'aravainge.” 20Teketa potevuru' teing bakaning barevare-nupoong sira'paavaroo'naang tee Kumponinge Pako'pari'nii'. 21Tenang-eta deto Jiisuu'ke tee te' Jerusalema' bera kapoo'nanka arikananka tora'puaining bakaning barevare-nupoong nau tutumpuru'. Aing aa'ninge tora'antavaavaing: nantoong pankenge, piristi'koong ovontunankai, ee'noko boto naunukai. Ee'noko tee tee' nkoaama dupisi'aavaing, ee'noko beenang doong deemparako napo' domamparara daa'aravai. 22Teketa Piitai taapo' be'antavura teka potevuma aa'puu', “Bakei makotua' da' tee' nko-koo, Ovoring. Tee' da'koo nkoaravauka'nung.” 23Teketa Jiisuu' bakaning barevare-nupoong-aape bere'arama Piita turampuma aa'puu', “Tokoi beai da' Sietani'. Da' tee ning-koo baanka' makosi. Dake tee Kumponing bakaang noru' noru'ea', nantoong biikaang noru' narung noru'ei otong.” 24Teketa Jiisuu'ke aa'puru' teing bakaning barevare-nupoong, “Naning ning siomui poo'naang piavora deeko', baka bakaang pia iro' doonko tompimparavaing ee'noko bakaang aa'barata' poru'ui ning siomumaatoaing. 25Ee'koo, baa tee naning bakaang domaang ning-koo orokovuma baka tare-koo piavoaing tee paa'aravaing, teka baa tee naning bakaang domaang ning-koo aroo'ari dua'uaing, teie tee napo' daa'uaing. 26Ee'noko aming kapoo' tampara basiarapeu' naning-koo ookara kapoo'nanka kansi'po' barampuma okovui baka orariarakotaa' domaang paa'aravaina'? Ee'noko naning aming avupeu' tee bakaang domaang paa'aru'nung napo' moo'koo? 27Ai' ning Tee Naning-naumpo' Paning-etaing tee teie Mma' bakaang meenasie baumari moaing teing ninka nkaning koosinunanka ninka, teketa moo' avorompaing nantoong naruna' naruna' kapoo' nkoau'ning siompario'. 28Teka ninge masikung naurampimang, dii'koo nii'ning anke nari' donkoniri otorining-koo mme' boo'koo mantonkiria' ning Tee Naning-naumpo' Paning-etaing nkaang muu'koo Daurarong~ deemari moko oomeriaing.”

will be added

X\