Matthew 1

1Aung ane' tee Jiisuu' Karistoo' bakanarempo'koong mirinanka otoing, tee ee'nung Deevita' bakanaving-koong, tee Deevita' napo' tee Eebaraami' bakanaving-koong. 2Eebaraami' tee Aisake' bauma. Aisake' napo' tee Jeekopi' bauma. Jeekopi' tee Juda bauma batatakaampi ee'noko baara'mainkaang ninka nari'. 3Juda tee Peeresi namainta Siira beuma. Beuko teni Teemaa. Peeresi tee Eesirong bauma. Eesirong napo' tee Arami' bauma. 4Arami' tee Aminadapi' bauma. Aminadapi' tee Naasoni bauma. Naasoni tee Salamong bauma. 5Salamong tee Booasi bauma, bauko teni Reeap. Booasi tee Oobete' bauma, teie bauko teni Rut. Oobete' tee Jeese' bauma. Ee'noko 6Jeese' tee Deevita' bauma, tee daurarong~. Napo' Deevita' tee Solomoni' bauma, bauko teni ee'nani tutung Uraia ba'aang. 7Solomoni' tee Reaboam bauma. Reaboam tee Abaisia' bauma. Abaisia' tee Eesa bauma. 8Eesa tee Jeosapata bauma. Jeosapata tee Jooram bauma. Jooram tee Usaia bauma. 9Usaia tee Jootam bauma. Jootam tee Eeasi bauma. Eeasi tee Esekaia bauma. 10Esekaia tee Manase bauma. Manase tee Aamon bauma. Aamon tee Josaia bauma. 11Josaia tee Jekonaia bauma, ee'noko baara'mainkaang. Tekang ninka nari' mmau' Ju'nupoong Babiloni'nameensi'aape berou' kiimata-koo. 12Babiloni'aape berou'noo'keta Jekonaia tee Sialeteale bauma deemparu'. Sialeteale tee Serababele bauma. 13Serababele tee Abaiutu' bauma. Abaiutu' tee Elaiakim bauma. Elaiakim tee Eesoo bauma. 14Eesoo tee Siedoko bauma. Siedoko tee Eekim bauma. Eekim tee Elaitu' bauma. 15Elaitu' tee Eliesa' bauma. Eliesa' tee Mataani' bauma. Mataani' tee Jeekopi' bauma. 16Jeekopi' tee Josepa' bauma. Josepa' tee Meeri' ba'ung, teni Jiisuu' paravuu'nani, tee ee'nung Kumponinge Pako'pari'nii' tampaamaung, Karistoo'. 17Aing teing avantevaranoo' kivora-ita karenaumo-koo basi Eebaraami'keta Deevita'koo basinoo', ee'noko teketa napo' kivora-ita karenaumo-navarantu otorou' Babiloni'ke kiimatavariri otorou'noo' basinoo'koo. Ee'noko teketa napo' kivora-ita karenaumo-navarantu depeto tee Kumponinge Pako'pari'nii'koo basinoo'koo. 18Enang tee' ee' nkoarara Jiisuu' Karistoo' ponto'aru'na'. Teni bauko Meeri' teni Josepa'koo miru'nii'nani, teka mme' nari' otorea' teni tooto'po'nani deemparu' ta'nina' Tanuaang Meekung bakaang iri'ke. 19Teketa teie Josepa'ke, teni-koo miru'nii'ke teni tooto'po'nani tasi'pura koonto'na' nko-koo noru'ari beekaang navunavu toto'koo mau'aru', teka makenge nko-koo piavou' ookara-koo sira'puko maia'o'neeng-koo teni. 20Teka tee' noru'arara otoko koosinung~ narung Ovoring bakaang noone-koo tee-ankoi oro'paru' ee'noko aa'puu', “Josepa', Deevita' bauring, aroreauka' Meeri' boku-koo da'aang deemparaa'naang, ai' tee tooto' teni-koo poontoaring~ tee Tanuaang Meekung-etaing. 21Tenie tee tooto' donkaani paravuaing, ee'noko dake tee miring Jiisuu' tampeaing, ai' teie tee bakaning nantoong biikaning orara aarumonanka-ita moo'uriaing.” 22Aing ookara kapoo'nanka nkoaru'noo' tee kapoo' Ovoringe tero nakaronara~ karantavuma~ nauvuu'nung masika'paraa'naang, ee' oro': 23“Teni kuukuma~teni tooto'po'nani deemparara narung donkaani paravuai, ee'noko teinge ee'pina' tampaavaing, ‘Iimanuela',’ miru'noo' tee ‘Kumponing nii' ninka nari' otong.’” 24Tenang Josepa' tantearara tee' nari' teie koosinunge Ovoring bakaange botovuu'na' bera Meeri' bokuvuu' ba'aang deemparaa'naang. 25Teka teie tamung tanatavuu' bera tenie tee tooto' donkaani paravuu'noo'keta dama'ke nampuu'. Ee'noko tee tooto' miring Jiisuu' tampuu'.

will be added

X\