Mark 7

1Teing Boto Keperuu'navitu ee'noko boto naunuka Jerusalema'keta Jiisuu'anko porou'. 2Porora ooaaru' Jiisuu' bakaning barevare-nupoong-koo nariong tanka' ku'mi'oroi taamanaako. A'noo' tutuna' tanka' duu'pari meeka'paria' Boto Keperuu'navitue nantoong nau-antavaariko'na'. 3Ai' Boto Keperuu'navitu ninka ookara Ju'nupoonge biikakatauro biikaang toomo tampa' siompaamaung. Tamung taamanaavaung tutuna' tanka' duu'paria'. 4Ee'noko baavenairu-eta poroma deeko' taamanaavarupeu' tutung ntonge meeka'paria' ee'noko napo' amutemurii' toomo siompaakoo' biikakatauroi bampaaru'na' aing ee' oto' ntonge meeka'antana': kaapu, kokoto, utau, ee'noko batanang. 5Ee'noko Jiisuu' tana'aama aa'pau' teinge Boto Keperuu'navitue ee'noko boto naunukai, “Aming-koo dakaning barevare-nupoonge niikakatauroi bamaaru'na' boto siompaavaung, aa'nomaung, bireng tovang duu'paria' taamang naiaamatoi?” 6Ee'noko Jiisuu'ke aa'puru', “Tee nakaronung Aisaia' koonto' masika'pari tarampeearu'nung~ dii' ampirinunuka minkururima, Daari Meekung-koo ee' daariari otoina', ‘Teinge ainge nantoonge biikaang be'duu'ke narunge pankaing-antamaamaung, teka biikaang domang ning-koo isipo' otoroi. 7Tamung ning dootuu'maamaing, ai' teing boto nkaang miring-koo nau-antavaarimaing teing tamung nantoong-etaning.’” 8Ee'noko Jiisuu'ke aa'puru', “Tee' ee'na' dii'ke Kumponing bakaang boto siperi tamung nantoong-etaing sintokosintoi-koong minkunaa pinka'erikoo'.” 9Ee'noko napo' aa'puru', “Dii' aa'na' norukasi'nuka Kumponing bakaang boto nimpa'erima tee diikaang minkunaa sintokosintoi-koong toomo deto kong-koo. 10Ai' Moosesie napo' boto ee' sipuu', ‘Diumaraang deto noru'ereri pakuereriainge’. Ee'noko ‘Naning baumararing oraka' minkuvureaing bakei dupisi'numpo'.’ 11- 12Teka dii'ke aa'perimaung, ‘Naninge baumararing kapoo'koo apuka'pareko, beuringe tering paku-koo kupi'ora deeko' aa'pupeu', “A, nkaning kapoo' arompepeu'ning teing temu' Kumponing bakaning bareantu'ning.” Ee'noko tee'pura tering baumararing pakuvurearupeu'.’ Ee'noko tering biromparesio' beuring domang bere'koo piavoko dii'ke taura'periaunge diikaang toomoi dai'erima. 13Tee' nkorarima dii'ke tee Kumponing bakaang kara daang-antaverimaung tee diikaang sintokosintoi-koong minkunaa barereerimaung siomperima, ee'noko amutemurii' aarumo nari' nkoverikoo'.” 14Ee'noko Jiisuu'ke nantoong bokuvurira aa'puru', “Ning iro' taaramerira dii'ke tampa' tasi'periai. 15Kapoo' naninge naivuko kumi'antavupeu'nung otoa'. Ee'noko kapoo' domaang-eta tavo'kupeu'nunge deeko' naning ku'mi'antavupeu' 16Dii' nantoong punkang-po'nupoong deeko' enang taaraveriai!” 17Ee'noko nantoong teka sipurira pava-koo koinuu', ee'noko bakaning barevare-nupoonge teka mirumiru'koong kuunoo' tana'au'. 18Ee'noko Jiisuu'ke aa'puru', “Dii' ee napo' teing-pina' noru'dopanuka? Arekee', tasi'peria' tee kapoo' dama'dunung naninge dunkumpuko tanuaang ku'mi'antavuarupeu'? 19Aung tee domang-koo kuung bea', pakosii'koo bemaung, ee'noko teketa mono-ita napo' siarakoo'.” Tee'purima ookara taamang taura'nisi tampuu'. 20Teketa aa'puru', “Teeo kapoo' tee kuung-eta pomaunge deeko' naning ku'mi'antavumaung. 21- 22Ee', naning bakaang domaang-eta aing ee' oro' pomaung: norunoru' orara ee'noko auning, bakiaa', naning dupisi', nampeesi orari, karakaraa', amutemurii' aarumo orara, tositosi, maimaia'nko, mamairo, oraka' minku, baka biiving, ee'noko matau bekoi'. 23Teing ee'ning kapoo' oreng naing ku'mi'anta.” 24Ee'noko Ju' biikanameng-eta tenkenurai'nange Jiisuu' bakaning ninka osi Taia' ee'noko Saidoni'nameng-koo berou'. Ee'noko te' bera pava nava'koo kuung tumparu' nantoonge noru'koo piavoarura. Teka baru' baku'arava'. 25Teke otoko nani manikuma baurang ma'naang orara-po'nanie Jiisuu' poio' taaravuu', ee'noko pora tee-anko kau'kanoo' dua'aru'. 26Teninoo' Ju'deeaing-koonani, Ponisia-nameensi'ke ponto'aru'nani, Siiria-nameng-koo. Aa'na' baitoaritaa' Jiisuu' kevi'uu'nani baurang-eta ma'naang bata'koo. 27Ee'noko Jiisuu'ke teni aa'puu', “A, makotua'! Toire' deeko' ookara piavoroaina' bau'numpo', ee'noko tee taamang biikaang mosi'nanka-anko dua'koo tampa' deea'.” 28Ee'noko tenie Jiisuu' bari'uma aa'puu', “Ee', Ovoring, masika', nka tee toire'ke dua'antavaako mosi'nankai mukunanka naiaamaung tarepa-koo boonga.” 29Ee'noko Jiisuu'ke teni aa'puu', “Makosi, osi tororaravaing. Tampa' bari'meing. Ma'naang tenkenuing daurang-eta.” 30Ee'noko teni toroarara baurang batanang-koo bempari otoko oovuu' ma'naang tenkenuio' teni-eta. 31Jiisuu' Taia'nameng-eta tenkenura osi kivorai nanuitaa' Saidoni'namenge tankinui Kaaleli'naru'koo basiaru'. 32Ee'noko narionge naning kipau ee'noko tampa' karoaruko'nung tavo'au'. Ee'noko Jiisuu' tana'au' bireng tee-koo patu'uko taarevoa'naang. 33Ee'noko Jiisuu'ke tee naning bokuvura karika'keta taapo' be'antavuu' bee'ka oto'koo. Ee'noko birenge punkang-koo kuung kompuu', ee'noko napo' tutupaa'arara meneng-koo kompuu'. 34Ee'noko paning-aape ankamparara kooreerevoitaa' aa'puu', “Epata.” Aung kara kuunoo': “Daate'daravai.” 35Ee'noko bakaang punkang tenang daate'aru' ee'noko meneng simpiri'arara tampa' karou'. 36Ee'noko Jiisuu'ke potevuru' naning nau-koo. Ee'noko nau-koo doong kante potevuriko teinge napo' aa'na' sira'paako'. 37Ee'noko nantoonge taaravaama aa'na' ta'ninaako' aa'paama, “Aung bakei ookara kapoo'ke mee'du'pinarai, aa'nomaung: Kipaunuka taarakiaakoo', ee'noko amakonuka kareaakoo'.”

will be added

X\