Mark 5

1Ee'noko Nuaru' Kaaleli' pako'aara Kerasa'nupoong biikanameng-koo berou'. 2Ee'noko Jiisuu' bakaasi-eta siarako naning ma'naang orara-po'nunge kune'uu' kuvi dako'domanairu-eta basiarama. 3Aunoo' dako'domanairu-koo otoko'nung teroita. Naninge patau'uaruko'nunge bane sieenai dai'aama. 4Mmau' doong-koo sieena dovange kuuka dai'aako totora'puko' oki'noo'na'. Naning purinto' tapupunara otoa'. 5Doong ee'noko muung ata'uma nanuko' dako'domanairue ee'noko iu'nankai. Ee'noko bakaang mono uiarama kapange dato'arako'. 6Ee'noko isipo'keta Jiisuu' oovui kua'pari pora tee-koo uro'kanoo' kinkinura pankaing-antavuu'. 7Ee'noko Jiisuu'ke aka'puma aa'puu', “Dake ma'naang orarai aung naning sipeai.” 8Ee'noko tee'puko bokuma aa'puu', “Jiisuu', Kumponing Deto Basi Bauring, dake ning arekee' nkomee'naang piaroing? Da' Kumponinge pote-koo piamomaang ning tora'antame'neeng-koo.” 9Ee'noko Jiisuu'ke tana'uma aa'puu', “Da' miring baa?” Ee'noko teie bari'uma aa'puu', “Ning miring Miatara. Nii' aa'na' karika'.” 10Ee'noko tana'uma aa'puu', “Jiisuu', aing ma'nari avora'keta bata'eriauka'.” 11Ee'noko teketa due'ke mii-koo navete-aapei pooro'nanka meru'arima otoroko'. 12Ee'noko ma'nari orenge Jiisuu'koo eentavarima aa'pau', “Taura'meriko merira tumariai pooro'nanka-koo.” 13Ee'noko Jiisuu'ke taura'puru'. Ee'noko teing ma'nari bakoarira pooro'nanka-koo tumpariru'. Ee'noko pooro' naro'ka kenaanka kokorei'koo~ makosining pemue doonko koo'arira nuaru'koo bera ke'nuru'ariru' teke. 14Ee'noko teing pooro' bau'aariko'ning mmariau' ee'noko aung ee' oro' basiario' doorenang avitoitoi bereng-antavau'. Ee'noko taaravaara nantoonge berou' ooaava'naang kapoo' nkoaru'na'. 15Ee'noko Jiisuu'anko poroma aung naning tutuna' ma'nari-po'nung duaanavari ba'nanui otoko ooau' bakaang noru' matauari, ee'noko avoreau'. 16Ee'noko ma'nari-po'nung-koo ee'noko pooro'koo nkoaru'na' ooau'ninge tampa' nauaaru' teing. 17Ee'noko Jiisuu' teing biikanameng-eta tenkeng-koo piavorou'. 18Ee'noko Jiisuu' bakaasi-koo beko aung naning ma'nari-eta tamparu'kuu'nung nari' tee ninka piavou'. 19Ee'noko Jiisuu'ke aa'puu', “Tee aa' da' otoko. Da'maikori'anko tororarara kapoo' pankaing Kumponinge piaarura da'koo nkovuina' naueriaing.” 20Ee'noko aung naning tenkenura osinanka kivora-koo kuunge nanuma nauvuriko' kapoo' ta'nimpaarii' Jiisuu'ke tee-koo nkovuu'na'. 21Jiisuu' napo' toroarama nuaru' pako'uitaa' nii'nameng-aape beu', ee'noko nantoong karika' piisi'koo naro'ariru' Jiisuu'anko. 22Ee'noko naning dootuu'nava tantanuka-koong narung miring Jairasi Jiisuu'koo kau'kanoo' kiunura eentavarama aa'puu', 23“Nnorang boomang. Da' pora tanka' pante'eko taarevoai.” 24Ee'noko Jairasi ninka nanuretu'. Ee'noko nantoong karika' bi'ariru' itoveitaa'. 25Ee'noko nii'nani manikuma otoko' mare' kivora-ita kemare'ka-koo tarumatearako'nani, mmau' batei-koo boorinang ninka avitoitoi nankai'aava'naang nanuko'nani. 26Taarevoa' baru' bia'oko' bera boorinang o'siiviu'. 27Ee'noko Jiisuu'koong doorenang taaravura ee' noru'aru', “Bane oki'noo' kompamira bakaang mononopa'koo, ning teni taaremoainani.” 28Ee'noko teni dama'ke porai'nang karika'koo meu'ka Jiisuu'koo biirokanoo'keta baarong-koo komparu'. 29Ee'noko kompura namu'ke ereng tempampuu' ee'noko taarevou'na' mono mantomparu'. 30Ee'noko tenang Jiisuu' bakaang iri'ke sipuko mantomparu', ee'noko namu'ke karika'koo meu'ke berevere'arama aa'puu', “Baie baarong komeng?” 31Ee'noko bakaning barevare-nupoonge bari'aama aa'pau', “Teka da' nantoong karika'koo meu'ke otoi arekee'koo aa'pemaang, ‘Baie komeng?’” 32Ee'noko Jiisuu' teke berevere'arako' kompuu'nani besi'uma. 33Ee'noko temurii' kapoo' teni-koo nkoaru'nung baka tampa' tasi'paritaa' Jiisuu'anko avoroi dankusi'kuma pora kinkinuu' ee'noko ookara tampa' siraka'pui nauvuu'. 34Ee'noko Jiisuu'ke aa'puu' teni', “Ani ee, da' dakaang baitoi taareroinani. Mooa ninka naniaing. Tee' nari' taareroi otoainani.” 35Ee'noko Jiisuu'ke teni karavui otoko Jairasi bakanoo'keta nantoong porora aa'pau', “Daurang boinani. Arekee'koo napo' Nau-anta pore'antavea'naang?” 36Ee'noko Jiisuu'ke taaravura nasinua' dootuu'nava tanata aa'puu', “Aroreauka', masika'antaveko naro'!” 37Ee'noko Jiisuu' nantoonge siong-koo poteario' Jeemisi namainta Jooni ee'noko Piita, teing nainge siompai berou'. 38Ee'noko dootuu'nava tanatanuka-koong bakanava'koo tavo'arira nantoong karakararearima birong tovang ee'noko ui nkoaako oovuru'. 39Ee'noko pava-koo tumparara aa'puru' Jiisuu'ke, “Dii' aming-koo birontarimang baru' naampaverima? Ani oki'nani booa', teka tamung aatumaang.” 40Ee'noko teinge benkempau' tee. Ee'noko ookara birong-nupoong dama'du sing-koo botovurira tooto' baumararing ninka Piita ee'noko Jeemisie namainta Jooni teing naing bokuvurira teni otou'navaro-koo tumpariru'. 41Ee'noko Jiisuu'ke teni bonku' bireng-koo kompura aa'puu', “Talita kumi.” Kuunoo' ee' minkuvuio', “Oki'nani, aa'damaang: Daa'daravai.” 42Ee'noko teni namu'ke daa'arara nanu'nanuu'. Bakaning mare' kivora-ita kemare'ka divu'. Ee'noko aung kapoo' tee' oro' tavo'kuio' nantoong ta'nimpariru'. 43Ee'noko Jiisuu'ke aung doorenang koonto' naning nau-koo potevurima aa'puru', “Taamang-koo teni averiko naikuai.”

will be added

X\