Mark 3

1Ee'noko Jiisuu' napo' toroaru' dootuu'nava-koo, naning teke otoko bireng duuai'. 2Ee'noko nii'ninge Jiisuu' nempai otorou' te'mung doong meekung-koo taare-antavuko ooaara tuumpiaava'naang. 3Ee'noko Jiisuu'ke duuai' karavuma aa'puu', “Poai a' uro'kanoo'.” 4Ee'noko aa'puru', “Boto ee Doong Uaana'mung-koo kapoo' tampara ai' naning orari-anta nko-koo taura'muri otong? Ai' domang-antana'munge, ai' dupisi'na'munge?” Ee'noko teing Boto Keperuu'navitu~ tenang dooroompariru'. 5Ee'noko Jiisuu'ke domang tupu'paa'nuka-koo manki'oi noru'urira iiravoi oovuru'. Ee'noko tenang duuai' aa'puu', “Bireng tovoro'daravai.” Ee'noko tovoro'arama tamparu'kuu'. 6Ee'noko Boto Keperuu'navitu siarira Eeroti' bakanariong ninka mumunsiariru' Jiisuu' tavu'na' matauaama. 7Ee'noko Jiisuu' bakaning barevare-nupoong ninka tenkenau' bera nuaru' Kaaleli' due'. Ee'noko nantoong miatarai siompau' osi kante-ita porora, nariong Kaaleli'nupoong, Judia'nupoong, Jerusalema'nupoong, Idumea'navaro-nupoong, Taia'nupoong, Saidoni'nupoong. 8Karika' porou' taaravaakotaa' kapoo' Jiisuu'ke nkovuko'ning. 9Ee'noko mmau' nantoong naro'aririo' Jiisuu'ke bakaning barevare-nupoong botovuru' bakaasi neri-koo karika'ke papuranka'aa'neeng-koo. 10Jiisuu'ke karika' nantoong taare-antavurio' ookara siipa-po'nupoong Jiisuu'anko tuueneveu' kompaava'naang. 11Ee'noko ma'nari oreng-po'nupoonge Jiisuu' ooaama uro'kanoo' dua'arima bokiaama aa'paako', “Da' bakei Kumponing Bauring.” 12Ee'noko Jiisuu'ke koonto' orokovuriko sira'paa'neeng-koo. 13Ee'noko Jiisuu' deto iu'koo koinuu' ee'noko teketa bokuvuru' nantoong piavoko'ning. Ee'noko bokuvurio' porou' tee-anko. 14Ee'noko nanai'keta kenaanka kara okovuri nkanuka miru'urima aa'puru', “Dii' ni'ninka nari' otoriaining ee'noko dama'ke botorampiai nantoong daanki-koo. 15Ee'noko iri' oto'deruriaininge ma'nari oreng bata'koong.” 16- 19Aing teing Nanai'keta Kenaankara Jiisuu'ke miru'uru'ning: Saimoni', nii'noo' Piita, Jiisuu'ke tampuu'noo'; Jeemisi namainta Jooni, Siebedi baurinketa, nii'noo' Boanesi baurinketa Jiisuu'ke bokuvuretu'noo', kuunoo' kurung-pina' karara; Aanduru'; Pilipi'; Baatolomiu'; Maatiu'; Toomasi; Jeemisi, Alopeasi bauring; Ta'deasi; Saimoni', Ju'nupoong bii'ka donkong-koo pia-navitu-koong; ee'noko Judasi, Kerio'nara, tee tooka kompui Jiisuu' taura'puu'nung bakaning kare-nupoong-koo. 20Ee'noko Jiisuu' napo' osi-aape toroaru' otoko'noo'. Ee'noko nantoong miatara porora naro'ariru', ee'noko Jiisuu' teing ninka bakaning barevare-nupoong taamanaapeu'nang batei oto'evuriaruu'. 21Ee'noko baukorovoi tee taaravaara berou' moo'aara barampaava'naang nantoonge kanu' narung tampaako. 22Ee'noko nariong boto naunuka-koo Jerusalema'keta porou'ninge aa'paako', “Kopeu dee'ma kurumaa'aring.” Ee'noko napo' narionge aa'paako', “Ee', masikung, ai' pa ma'nari biikaang pankaing bakaang purinto' ninka bata'urimatoinge.” 23Ee'noko Jiisuu'ke nantoong naro' bokuvurira aung kara mirumiru' nauvurima aa'puru', “Teka ma'naang orarai napo' ma'naang orara arekee' bata'upeu'? 24Ee'noko napo' narung muu' baka siivenke'arara deto donkonuarupeu'. 25Ee'noko napo' narung puata' siivenke'arara nari' donkonaavarupeu'. 26Ee'noko Sietani' bakaning ma'nari turampeera biikaang muu' siivenke'arara pankaroompua' napo' dua'arara paa'arapeu'. 27Naning purinto' bakaang pava-koo oovunara tumparara kapoo'nanka nkavuarupeu' iro' okonara tavuitaa' dai'uarura. Ee'noko dai'ura deeko' pari'upeu' bakanava-kooning kapoo'nanka. 28“Noru'eriaing aung, Nantoong biikaang orarananka tonta'koo makosi ee'noko amutemurii' oraka' minku tonta'koo makosie. 29Teka naning Tanuaang Meekung Kopeu dovang tampuma daviraa'umaung tonta'anta kompuauka'nung. Bakaang orara tee' nari' otoi otoaing.” 30Tee' nauvuru' Jiisuu'ke, ma'naang orara oto'po'nung tampaio'. 31Ee'noko Jiisuu'ke tee' minkuvuko teni ninka bauko ee'noko baara'mainkaang tee tavo'ariru'. Ee'noko dama'du donkonaitaa' kara Jiisuu'anko be'antavau' pora teing oo-koo. 32Ee'noko nantoonge Jiisuu' ninka ba'nampariri otoroko'ninge aa'pau', “Daukorovoi dama'due nentaamaang.” 33Ee'noko Jiisuu'ke aa'puru', “Baie ninge nko'? Ee'noko baatai ninge ntara'mainkaang?” 34Ee'noko nantoong nari' ba'naniau'ning-aape bere'arara aa'puru', “Ooveriko, ninge nko'dovo makosinuka aing.” 35Nantoong ninge ntara'mainkaang ee'noko mmarikaampi ee'noko nko'kaampi makosinuka teing Kumponing piavomana' nari' nkoaamaing.

will be added

X\