Mark 2

1Nii'ning doong tankinuio' Jiisuu' napo' toroaru' Kapaneume'navuntu'koo. Ee'noko toroarako ooau'ninge pava-koo otoko sira'pau'. 2Nantoong aa'na' karika' poroio' oto'doma otoaruu' pava-koo kuunge ee'noko karanaang-koo dama'du. Ee'noko Jiisuu'ke nantoong teka kara daankivuru'. 3Ee'noko tenang daankivuriko nii'ning porou' naning doota tavo'aama Jiisuu'anko, nantoong karenaumoi nkavaakotaa'. 4Ee'noko nantoong karika'ke ito'aio' Jiisuu'anko koonto' tavo'aava'. Enang tee pava-koo kantu'da dipi'au' Jiisuu' otou'noo'ka dau. Ee'noko naning doota teke doonai sing-antavau' bakaang tani' ninka nari'. 5Ee'noko tenang Jiisuu'ke teing tee tavo'au'ning biikaang baito oovura aa'puu' tee naning doota, “Ee aung, dakaning orarananka tonta'deronsing.” 6Ee'noko teinge boto naunukai teke ba'nampariri tunsi-koo ee' noru'aako', 7“Aming-koo aung kara menaankavumaang Kumponing bauvaupaa'uma? Naning otoa' orara aarumo tonta'upeu'nung, Kumponing narung deeko'.” 8Tee' tamung noru'aako Jiisuu'ke namu'ke iraakavurira aa'puru', “Aming-koo tee' noru'erimang? 9Arera kara masika'poaruko ooverira ning makosi deeaung tammeripeu' aa'ning-koo, aung doota ee' minku-koo, ‘Dakaning orarananka tonta'deronsing,’ nii'na' ee' minku-koo, ‘Daa'darara dakaang tani' nkavei naniai.’? 10Teka dii'ke iro' noru'koo makosi ning Tee Naning-naumpo' Paning-etaing kansi'koo o'noi orarananka tonta'koo makosi...” Tee'pura tee naning doota aa'puu', 11“Ninge aa'damaang, daa'darara dakaang tani' nkavei naniai dakanava-koo.” 12Tee'puko daa'arara namu'ke tani' nkavui tenkenuu' ooai otoko. Ee'noko aa'na' ta'ninaara ookarai Kumponing daangampau' aa'paama, “Nii'ke tero tee' oro' kapoo' ooampia'.” 13Ee'noko Jiisuu' napo' tenkenura miiru' Kaaleli'koo basiaru'. Ee'noko teke otoko nantoong karika' poroio' kara nauvuru'. 14Ee'noko teketa tenkenura Liivai', Alopeasi bauring, oovuu' taakisi nkavaako'nava-koo ba'nanuio' bakanavaro-koo. Teketa Jiisuu'ke aa'puu', “Ning siomeai.” Ee'noko Liivai'ke deto donkonura tenang-eta deto tee siompui nanuu'nung. 15Ee'noko karika' nantoong orenanka ee'noko napo' taakisi nkanuka ninka Jiisuu' nari' siompau'. Ee'noko teing-koo nariong ninka Liivai' bakanava'koo nari' taamanau' Jiisuu' bakaning barevare-nupoong ninka nari'. 16Ee'noko teke taamanai otoroko nariong Boto Keperuu'navitu-koo nau-antanukai ooau' Jiisuu' nari' taamanaako oreng ninka ee'noko taakisi nkanuka. Ee'noko bakaning barevare-nupoong tana'aarima aa'paaru', “Aming-koo taakisi nkanuka ninka nari' taamanaamaang ee'noko nantoong orenanka ninka nari'?” 17Ee'noko Jiisuu'ke taaravurira maku'urima aa'puru', “Teing nantoong tampa' otoromaing naninge nankai'urii'naang piavoroa', teka teing siipavoromaing naing piavoromaung. Ning nantoong tampenanka-anko moa'. Ning orenanka-koo mou'nung nauaranko bere'aria'naang.” 18Jooni bakaning barevare-nupoong ee'noko teing Boto Keperuu'navitu biikaning unkumoariko nantoonge Jiisuu'anko porora tana'aama aa'pau', “Aming-koo dakaning unkumoariaung?” 19Ee'noko Jiisuu'ke bari'urima aa'puru', “Teka ee nantoong baranee' navitu nampeesi-koo poromaing naning nampeesinara ninka nari' otoroi unkumoaripeu'? Otoa', ai' nantoong nampeesinara ninka nari' otoroi unkumo-koo makotua'. 20Teka doonanka pomaang teing bii'maiko' te'nemparako unkumoariaing. 21Naninge baarong nerakanaa' urikanaa' ninka naro'ka pate'uarupeu'. Ee'noko tee' nkovuko deeko' napo' nerakanaa'ke tenaa' urikanaa' beeto'uko aa'na' dere'arapeu'. 22Ee'noko napo' naninge uaini nerakaru' urikaro'koo pare'uarupeu'. Tee' nkovuko dei katekate'ora tero' naka'upeu'. Ee'noko naka'uko teru' ee'noko tero' ookeng oraru'kupeu'. Uaini nerakaru' nerakaro'koo deeko' pare'koo makosi.” 23Ee'noko nii'na'mung Doong Uaana'mung-koo Jiisuu' bakaning barevare-nupoong ninka nanau' mintoong uite'naue~. Ee'noko bakaninge bii'da'paama nanau', Ju'nupoong biikaang aarumo-koo taura'pari otoina'. 24Ee'noko teinge Boto Keperuu'navitue~ Jiisuu' aa'pau', “Ooveai. Aming-koo Doong Uaana'mung-koong boto toto'paamang dake bare-antaverimainge?” 25Ee'noko Jiisuu'ke maku'urima aa'puru', “Dii'ke aming-koo tee' tuumpimerimaang? Tampa' noru'eri otong tee kapoo' Deevita'ke nkovuu'nung tenang Abieta'ke piristi' pankaing deempari otou'nang, tenang teing ata'ai peeravorora, tee ee'noko teing nari' otoroko'ning ninka; 26Kumponing bakanava-koo Deevita'ke koinura, nkavura naiau' tee taamang meekung, nii'ninge nai-koo taura'parava', teka piristi'nuka nainge deeko' nai-koo makosi. Ee'noko teie Deevita'ke teing nari' otoroko'ning avurio' boto toto'koo tuumpiaava'.” 27Ee'noko Jiisuu'ke aa'puru', “Kumponinge Doong Uaana'mung nkomemuru'nung nii'koo boonge otoi pakumuri oto'koo. Ee'noko te'mung-koo boong si'muria'. 28Tee'koo ning Tee Naning-naumpo' Paning-etaing tee Ovoring Doong Uaana'mung-koong.”

will be added

X\