Mark 16

1Doong Uaana'mung tankinuio' Meeri' Ma'dala-nani, Meeri' Jeemisie bauko, ee'noko Saalome' duuni tampa' nuuraa' moo'au' Jiisuu'koong mono sisi'koo. 2Ee'noko tero ora'ka Saandei-na'mung kuvi dako'doma berou' duaa' mme' pata'uko. 3Ee'noko bii'ka minkuarima aa'paako', “Nii' dee'ma baie kapang korimemurii'naang kuvi dako'doma karanaang-eta?” 4Ee'noko beroma kapang teketa kosi'ario' ooau'. Tee kapanoo' bakei aa'na' pankaing. 5Ee'noko tumpariru' kuvi dako'doma. Ee'noko teka narung naning nemaka ooau' ba'nampario' tampavine-aape. Bakaang mononopa' kakaara kurunisi. Ee'noko teing ta'nimpariru' tee-koo. 6Ee'noko teie aa'puru', “Ta'niniriauka'. Dii'ke Jiisuu' besi'erimang Nasareti'nung aa'barata'koo taakavaieeng. Tee tee a' otoa', tero daa'aring. Ooveriai a' bempaieenoo'. 7Enang berira aung kara nauereriaing bakaning barevare-nupoong tee ninka Piita, aa'perima, ‘Jiisuu' dii'koo uro'ke bemaang Kaaleli'aape. Teka berira ooveriaing baka naururu'na'.’” 8Ee'noko kuvi dako'doma-ita avoro'ke nopa'uri bakoarira kua'pariri berou'. Nii'ning-ankoi kapoo' minkuaava' avoreaara. 9Dama'due Jiisuu' bou'noo'keta daa'arara tero maatanang doong Saandei-na'mung Meeri' Ma'dalanani-ankoi tutung oro'paru' ~kenaanka-taa ma'nari bata'uru'nani. 10Ee'noko tenie bera Jiisuu' ba'marang nauvuru' orarunsiarima birompariko. 11Ee'noko tenang tenie aa'puriko, “Jiisuu' daa'aring, ninge ooansing,” teing masika'antavaava' bakaang kara. 12Teketa oovunara-pina' oro'paritaa' bakaning-koonaanka taunga nanureko kune'uretu' osi-eta isipo'ka. 13Tenaankai toroareta napo' nariong barevare-nupoong nauaaretu', ee'noko teinge masika'antavaarea' beekaang kara. 14Dama'ke Jiisuu' teing-koo nanai'keta narung-koo basiaru' taamanaako. Ee'noko iikoo'uru' domampario' ooau'ninge minkuaako noru' tupu'paa' otoroi masika'antavaariaruu'nung-koo. 15Ee'noko aa'puru', “Ookara kansi'koo naniriaing nantoong ookara-koo doorenang tampara daankierima. 16Ee'noko naning masika'antavui ntong-koo minkiarara meeka'antavarara tee moo'aravaing, ee'noko masika'antavuauka'nung Kumponinge kiimata-koo tampuaing. 17Ning masika'antamaavaining ninka aing ee' oro' taa'ni'anta tavo'aravaing: Ma'nari bata'aariainge nkaang miring-koo, ee'noko oovunung karai kareaavai. 18Bane boru' kompaavainge ee'noko bane dopa naiaama teie baikevuriauka'. Teinge biikaang bireng narung pante'aariko siipa-po'nupoong taarevoroaing.” 19Dama'due Jiisuu' teing ninka kareaakotaa' baka siramparara paning-aape koinuu', ee'noko Kumponing-koo tampavine-aape ba'namparu'. 20Ee'noko bakaning barevare-nupoong avitoitoi nanau' ookara osi-koo daankiarima. Ovoring nari' teing ninka mintoomparu' puring-antavurima biikaang kara taa'ni'anta ninka tavo'anta-koo.

will be added

X\