Mark 13

1Ee'noko Jiisuu' pava dootuu'nava pankava-ita siarako bakaning barevare-nupoong-koo narunge aa'puu', “Nau-anta, ooveai aung bakei pavananka kapang boo'antana' oro'ke kaniau'nung.” 2Ee'noko Jiisuu'ke bari'uma aa'puu', “Teka ee aung pava pankainanka boo'antana' ooverimang? Dama'ke tee enang paupaureari otoina' otoauka'nung tuuravarira dua'ariaing.” 3Jiisuu' ba'namparu' Iu' Olive'po'namii-koo, pava dootuu'nava pankava-aape toroaritaa'. 4Teke otoko Piita dovang Jeemisi, Jooni ee'noko Aanduru' tee-anko porora bii'ka otoroi nia'aama aa'pau', “Naumeriai tee are'moong tee' nkoaravaing? Ee'noko taa'ni'anta aming tee' nkoaraa'naang due'uko oo'koonge?”. 5Ee'noko Jiisuu'ke tenang tutumpurima aa'puru', “Bakei tarerariri otoriaing naninge poo-antaruri'neenga. 6Mmau' nantoong poroaing nkaang miring tampaama, aa'paama, ‘Ning tee ee'nara.’ Ee'noko nantoong mmau' papaara-antavaariai tee' minkuaama. 7Teka aroreriauka' karenanka tavo'kaako ee'noko tavo'kaavaining-koo taaraverima. Kapoo'nanka tee' oro' tee nkoaravaining, teka botu mme' due'ua'. 8Narung kansi' i'amparama nii'nara kansi' tavuainge, ee'noko narung muu' i'amparama nii'nung muu' turampuainge. U'mi' avitoitoi nkoaravainge ee'noko nantoong peera-koo booroainge. Tutuna'ning teing oraka' mantong manikumai tooto' ponto'ke due'uko mantona'. 9Teka dii' tampa' tarerariai. Ee'noko ta'niniriauka' nantoonge dii' dai'daarira tuutunantaariko koompaara'navitu-koo, nii'noo' murasiaraariko pava dootuu'nairu-koo. Dii' teing donkong-antaraariai ovo'ma'nuka-anko ee'noko dauraronuka-anko dii' nkaang miring sira'koo miru'nii'nuka deentariko.' 10Ee'noko doorenang tampara navo'ka tutung daankiari otoai nantoong amutemurii'koo. 11Ee'noko teinge dai'daarima tuutunang-koo be'antaraariko avitoitoi noru' manki' doriauka' paa'erima minkueriaina'. Teka teinge tana'daariko, Kumponinge kapoo' tenang ee'nang naururiko tamung kato minkueriaing. Dii' dii'ka tee kareriauka'nung, teka tee Tanuaang Meekung karoaing. 12Napo' aa'noainge: bataatai tooka kompui baara'ma'nung taura'puaing dupisi'aava'naang, ee'noko baumai bauring tee' nari' nkovuai. Napo' biurukaa'ke biumaraang turampaarima dupisi'aariainge. 13Dii' teing ookara nantoonge munte'daariaining ning nkaang miring-po'nupoong deentariko, ee'noko naning purimpario' bera asirana'mung basiaravaing deeko' domamparavaing.” 14“Teie nakaronarai Danieloi daarivuu'nane'koo deeruerima tasi'periaing: ‘Naning maarekusi' donkonuaing pava dootuu'nava pankava-koo Kumponinge meeka'antavuu'noo'ke.’ Tee taa'ni'anta osi orari-koong. Tenang tee donkonuio' ooverira dii' a' Judia'nameng-koo otoriaining miinanka-koo deto bakei navo'ka koo'dariaing! 15Naning daunavaro-koo otoaing deeko' depeto siarara pava-koo kuung beauka'. Tamung kapoo' nka-koo tung-koo makotuauka'nunge. 16Napo' naning mintoong-koo otoainoo'keta pava-koo toroaravauka' bakaang mononopa' nka-koo. 17Aung batei manki' masikung teing-koo maniku' kempo'nuka ee'noko noonoo'kai otoroaining. 18Teka dii' kunsirariaing te'mung mmaririaina'mung kamaarinang-koo tavo'kuauka'na'. 19Tee arikung te'mung tavo'kuaing tee bakei dau basi aung kansi' tutuntoma-ita nkoaru'ning-koo bera e'mung doong-koo basinoo'koo, ee'noko napo' dama'ke tee' basi otoauka'nunge. 20Teka Kumponinge teing nantoong baka miru'uru'ning piaavurira aing doong apuka'antavuu'. Ee'noko teing doong arikananka apuka'antavuriarui dei ookara nantoong booropeu'. 21Ee'noko tenang ee'nang nii'nung naninge aa'duriko deeko', ‘Ooveriai, aung tee Kumponinge Pako'pari'nii' tavo'kuaing-koong!’ nii'noo' aa'puko, ‘Ooveriai auntang!’ tee masika'antaveriauka'. 22Ai' teing nakaro-nupoong ee'noko pako'pari'nii'nuka daang Kumponing-etaning tamparimaing porora taa'ni'anta pankenanka ta'nimpaarii'na' nkoaavaing nantoong tosiaarima Kumponing bakaning naro'ka papaara-antavaarii'naang, tavo'arapeu'nung-pina'. 23Ee'noko dii' teing donta'ke moronuka. Ninge tero nau bakerampiru'ning.” 24“Tenang batei arikung bakearako tee duaa' tenang mutaanampuai ee'noko kaara arakavaravauka'. 25Ee'noko beento'nanka tankavariai paning-eta. Ee'noko purinto'nanka paning-koo otoromaing dankampariai. 26Ee'noko tenang teinge ning Tee Naning-naumpo' Paning-etaing taa'ni'moi moko oomaavaing, purinto' ninka kamo'ke depeto aa'na' meena'moi. 27Ee'noko tenang ninge botoarampaing koosinunanka ookara kansi'koo teing nkaning miru'nisinuka naro'koo doving karenaumo-ita ee'noko napo' kansi' kainu'nairu-eta.” 28“Enang tee dii'ke tee baisirovang ooverira noru'eriaing, aa'nomaung: Tenang para' nenuvara'uko noru'erikoo' teketa deto puaravuu'naang due'ka. 29Tee' nari' kapoo' aing ee' oro' tavo'arako ooverira dii'ke ee'pina' noru'eriaing, due'ui otong, karanaang poing. 30Masika' naurampimang, Teing aing kapoo' ookara nkoaravaing aung avarang boo'pariaruko. 31Paning ee'noko kansi' teing oparavaininge teka nkaang kara tee oparavauka'nung.” 32“Naninge noru'ua' batei poainoo'. Paning-nupoong koosinunukai noru'aava'. Ninge tee bauringe noru'ampa'. Teka teie Mma' narunge noru'ui otong tee batei. 33Teka dii' tanatarariri otorimaatoai, kunsi ninka tanterariri, ai' dii'ke noru'eria' batei tavo'aravainoo'. 34Tee' nari' naning pankaing isipo' nanuma osi-eta tenkenupeu'nung-pina' bakaning botovotonaa'nuka taura' avurima mintoonge kantevuripeu' ee'noko karanaang tampa' tanata-koo teing-koo narung botovupeu'. 35Teka dii' teing tanatarariri otorimaatoaing. Noru'eria' arenang dee'ma pava okonara poainge, ai' pa muung-aapenang, ai' pa meu'namang, ai' pa siimporovuko~, ai' pa tane'nang. 36Ta'nina' poma deeko' aasirio' po'neeng. 37Teka ninge naurampimana' ookara nauarama aa'pamaung: Teka dii' teing navo'ka tarerariai.”

will be added

X\