Mark 11

1Ee'noko poroma Jerusalema' due' Olive'po'namii-koo basiariru', osi Bepasi ee'noko Beetani due' masipo'. Ee'noko bakaning barevare-nupoong-koo Jiisuu'ke kenaankara uro'ke botovurema aa'puretu', 2“Dee' ureresi bereta osi uro'kanoo'ke otoi-namono-koo du'dareai. Ee'noko basirareta doonkii'nu kampianu oovereai bi'ari otoko naning mme' teu-koo ba'namparava'. Dipi'ereta po'antavereai.” 3Ee'noko naninge tana'durema aa'dureko, “Aung aming-koo tee' nkoveremang? Aa'pereai, ‘Ovoring piavoing. Napo' torovuaing namu'ke.’” 4Ee'noko bereta oovuretu' tee doonkii' kampia taung-koo meu'ke bi'ari otoko pava karanaange; 5Ee'noko dipi'ureko narionge due' donkonai otoroko'ninge tana'aarema aa'paaretu', “Dee' aming nkoverema doonkii' dipi'eremang?” 6Ee'noko tenaankai Jiisuu'ke nauvuretu'na' maku'uretu', ee'noko nantoonge tenang taura'paaretu'. 7Ee'noko tenaankai po'antavuresio' Jiisuu'anko teinge biikaang baarong tevoro'koo dau tani'au'. Ee'noko Jiisuu' tee-koo dau ba'namparu'. 8Ee'noko nantoong karika'ke biikaang baaronankai taunge danto tani'au', ee'noko narionge uurung tovang pora'ka napu'aama tani'au'. 9Ee'noko nantoong Jiisuu'koo uro'ke nanau'ning ee'noko nii'nariong dama'du-eta porou'ninge eura bokiaama aa'paako', “Biraanke! Biraanke-po'nung aung Ovoring bakaang miring-koo pomaang! 10Biraankenii' tee muu' niuma Deevita'ketaing napo' donkonge due'umaang! Biraanke otoi otoaing a'dei'ke paning-koo nari'!” 11Ee'noko aarenuu' Jiisuu' tee-koo osi Jerusalema'. Ee'noko teketa pava dootuu'nava pankava-koo kuung tumparara avitoitoi nanuma beero'uu'. Ee'noko muung-aapevuio' napo' toroaru' Beetani-aape bakaning nanai'keta kenaankara ninka. 12Ee'noko dauna'mung Jiisuu' toroaru' Beetani'keta peeravoitaa'. 13Ee'noko koi'navari miring piiki' isi'isipo'keta oovuu' para' narung uumaananu'. Ee'noko sinang-po'navari tampuma beu' tevari-anko. Ee'noko berai'nange sinang oovua', para' narung otoko oovuu', sinang bi'koong bakaang batei deea'. 14Ee'noko Jiisuu'ke tevari aa'puu', “Naning otoa' dakaang sinang napo' maa'deruaing.” Ee'noko bakaning barevare-nupoonge taaravau'. 15Ee'noko Jerusalema' napo' tavo'arira Jiisuu' parang-koo tumparara pava dootuu'nava pankava-koong-koo, nantoong sipisipi' dovang parekanumpo' baaveveeko'ning bata' tutumpuru'nung. Aa'noko batanananka mooni' aampari'aako'ning biikaning ee'noko napo' ba'nava'nananka kuukuu' baaveaariko'ning biikaning teka piakatu'uru'. 16Ee'noko potevuru' Pava Dootuu'koo kapoo'nanka nkavai be'koo. 17Ee'noko napo' nau-antavurima aa'puru', “Aming-koo noru'eria' otong Kumponing bakaang kara Daari Meekung-koo aa'pumana' ‘Nkaang pava tee pava kunsinava tampari otoaing, nantoong amutemurii' biikaang.’? Teka dii'ke ‘bakiaa' nkonuka biikanoo'’ deeng-antavering.” 18Ee'noko teinge piristi'nuka-koo ovontunge ee'noko boto naunuka taaravaara taung besi'au' Jiisuu' tavu'na', nantoong karika' Jiisuu' bakaang kara-koo ta'nimparima bi'ariko avoreaara. 19Ee'noko muung-aapevuio' Jiisuu' bakaning ninka tenkenau' 20Ee'noko napo' dauna'mung ora'ka-ita tevunge toroarima tevari piiki'navari ooau' mara'ora boo'pario' untu'keta kaakeng-koo basi. 21Ee'noko Piitai nkoaru'na' noru'ura Jiisuu' aa'puu', “Nau-anta Pankaing, ooveai. Tee koi' dake barakosi'eieeng mara'oi boo'paring.” 22Jiisuu'ke teing kara maku'urima aa'puru', “Masika' naurampimang ninge, 23Baa naning baito Kumponing-koo oto'evui dei aunteto iu' aa'pupeu', ‘Daa'darara pirung-koo dua'daravai,’ ee'noko bakaang noru' keekoo'arava' minkuvuina' nkoaraa'naang masika'antavuko tee' nkoarapeu'. 24Tee'koo aa'dampimang, tenang eentararima ee' noru'eriai, ‘Kapoo' nkavampiring,’ ee'noko tee okoruriaing. 25Ee'noko tenang donkoniri kunsirarima tonta'evurereriai kapoo' orara dii'koo nkoau'nanka. Ee'noko Diuma, paning-koo otomaunge napo' diikaang orara tonta'deruriai. 26Ee'noko napo' dii'ke nariong biikaang orara tonta'eriaruko Diuma paning-koo otomaunge diikaang aarumo orara tonta'koo makotua'.” 27Ee'noko Jerusalema'aape napo' toroariru' ee'noko Jiisuu' dootuu'nava pankava-koong-koo parang-koo kuunge nanuu'. Ee'noko piristi'koo ovontung, boto naunuka ee'noko nantoong-koo urang-antanuka Jiisuu'anko porou'. 28Ee'noko tana'aama aa'pau', “Tee aung aremurii' taura' otoko dake aing kapoo'nanka nkovemaatoing? Ee'noko napo' baie taura' aruio' nkovemaatoinge?” 29Ee'noko Jiisuu'ke kara bari'evurima aa'puru', “Enang aa' napo' ninge tana'dampiaing ee'noko dii'ke bari'meriko ninge napo' naurampiai tee taura' ning oto'memuko aing kapoo'nanka nkoamaung. 30Naumeriai, Jooni baie taura'puio' nantoong ntong-koo minkivurima meeka'antavuriko', Kumponinge ai' tamung nantoonge? Enang bari'meriai.” 31Ee'noko teing bii'ka nia'eema aa'peeko', “Are'pampia'naang? Aa'pampiko deeko', ‘Kumponinge,’ teie aa'murii'naang, ‘Teka aming-koo dii'ke Jooni masika'antaveriaruko'?’ 32Ee'noko aa'pampiko deeko', ‘Tamung nantoong-etaing,’ nantoonge tamaari'neenga, ai' teinge tee ookarai Jooni nakaronara Kumponing-etaing tasi'pai otong.” 33Ee'noko teinge Jiisuu' maku'aama aa'pau', “Nii'ke aa' noru'ampia'.” Ee'noko Jiisuu'ke aa'puru', “Nna' ninge napo' dii' naurampiaroo'naang baa tee ning taura' amuu'nung aing kapoo'nanka nko-koo.”

will be added

X\