Mark 10

1Jiisuu'ke temono sipura Judia'nameng-koo beu' Joo'dani-nari pako'uitaa'. Ee'noko nantoong karika' napo' tee-anko naro'aririo' kara nauvuru' teroita nauvuriko'na'. 2Ee'noko nii'ning Boto Keperuu'navitu nari' pororai'nange aavavaama aa'pau', “Naumeriai. Niikaang boto-koo ee naninge ba'aang bata'koo taura'pui otong?” 3Ee'noko aa'puru', “Teka aremurii' boto Moosesie aruru'?” 4Ee'noko bari'aama aa'pau', “Moosesie taura' avu'nisi naninge ba'aang si'koo piavora deeko' karavoto~ daarivuaing nampeesi toto'puing tasi'anta-koo, ee'noko ba'aang bata'uai.” 5Ee'noko Jiisuu'ke aa'puru', “Moosesie aung boto daarivuu'nung dii' dii'ka domang iveka'dariko. 6Teka Kumponinge ookara kapoo' pupu'uu'nang-eta minkuvuma aa'pui otong Daari Meekung-koo, ‘Kumponinge donkaani ee'noko manikuma nari' nkovuretu'.’ 7Ee'noko ‘Tee'koo donkaanie baumararing sipureta ba'aang ninka pinka'areaing, ee'noko tenaanka narung mono deempareaing.’ 8Tee'puu'noo'koo tenaanka kenaanka deea'. 9Tee'koo kapoo' Kumponinge be'nu'antavuu'nung naro'ka naninge tankaampuauka' nung.” 10Ee'noko teketa pava-koo toroarira bakaning barevare-nupoonge tampa' tasi'koo tana'au'. 11Ee'noko Jiisuu'ke aa'puru', “Tenang naninge ba'aang bata'uma oovunani nampupeu' ee'noko nampeesi ba'aang ninka teka orarivuing. 12Ee'noko ba'aange bata'uma ba'ung oovunara nampupeu' ee'noko nampeesi tee teka orarivuing.” 13Ee'noko nantoonge toire' oki'nareka' Jiisuu'anko po'antavaariko' teie kompurira biraankevurii'naang. Ee'noko teinge bakaning barevare-nupoonge poteaaru' tee-anko tavo'aariko. 14Ee'noko Jiisuu'ke oovurira iiraevuru' bakaning barevare-nupoong aa'purima, “Taura'perereriai toire' ning-anko po'koo, potevereria'. Kumponinge nantoong toire'pina' bere'arimaing bakaang muu'kooning. 15Masika' naurampimang ninge dii', baa tee naning Kumponing bakaang muu' tooto'ke bauta' nkavui aroo'aramana' kompuarura tee bakei tumparavauka'nung te' Kumponing bakaang muu'koo.” 16Ee'noko minku bakevura toire' naruna' boko'urima tanka' pante'uru' Kumponinge biraanke-koo. 17Tenang Jiisuu' nii'nameng-aape nanu' tutumparako naning narung kua'pari pora miinge keemparu' uro'kanoo' ee'noko aa'puu', “Nau-anta tampara, ninge aming kapoo' nkoamira domaang oparavauka'nung kompampaing?” 18Ee'noko Jiisuu'ke maku'uma aa'puu' tee, “Arekee'koo dake ning tampara tammemang? Nii'nara naning tampara otoa', Kumponing narung tampara. 19Dake Moosesi bakaang boto ee' oro' noru'ei otong: ‘Naning dupisi'eauka'. Nampeesi orarieauka'. bakiaa' nkoveauka'. Daang-koo tuutunampeauka'. Kapoo' kokonoveauka'. Daumararing deto noru'eresi pakuereaing.’” 20Ee'noko teie aa'puu', “Nau-anta, ninge oki'na'noo'keta aing ookara boto tanatavantu'ning.” 21Ee'noko Jiisuu'ke oovui piaavura aa'puu' tee, “Da' narung kapoo'koo makosia'. Bera ookara kapoo'nanka dakaning baavevera mooni' nkavera ata'oi'nuka averiai. Tee' nkovera paning-koong kavonanka oto'deruaing. Ee'noko teketa ning siomei poai.” 22Ee'noko aung kara taaravura aa'na' muri'ou', ee'noko domang manki'oitaa' tenkenuu', ai' aung naning tee maneenara. 23Ee'noko Jiisuu'ke oo'oovurima bakaning barevare-nupoong aa'puru', “Bakei pore' masikung manee-nupoong Kumponing bakaang muu'koo tung-koo.” 24Ee'noko bakaning barevare-nupoong aa'na' ta'ninau' tee'puio'. Ee'noko Jiisuu'ke napo' kara bari'evurima aa'puru', “Ee toire', bakei pore' masikung Kumponing bakaang muu'ke tung-koo teing maneeariri otoromanoo'koo noru' sipaamaing. 25Kaameli'navoro' bamaru'koong busi-koo kuunge tung-koo makotua', ee'noko naning maneenara-koo bakei aa'na' koonto' makotua' Kumponing bakaang muu'koo tung-koo.” 26Ee'noko teing aa'na' ta'ninaara bii'ka kareaama aa'pau', “Nka enang baa domaang moo'aravaing?” 27Ee'noko Jiisuu'ke teing oovurira aa'puru', “Nantoong bii'ka domaang moo'koo makosi deeaing, Kumponinge deeko' makosi, ai' teie ookara kapoo' nko-koo makosie.” 28Ee'noko Piitai karoma aa'puu', “Aung ee, teka nii' teing ookara kapoo' sipampira siontampimaing.” 29Ee'noko Jiisuu'ke aa'puu', “Masikung naurampimang, naninge aing sipuu'nung: pava, baumaraang, baurukaa', bakaang kansi' sipura ning-koo ee'noko nkaang kara tampara bereng-anta-koo, e'mung-eta dau basinoo' maku' nkavuaing daaku'pina' anke kansi'koo otoitaa'; 30Aa'noko: pava, baumaraang, baurukaa', kansi'. Ee'noko nantoonge turampaavai ee'noko dama'naroong-koo napo' domaang oparavaung okovuaing. 31Teka mmau' nantoong ureai otoromaing dama'ke dama'duariaing, ee'noko dama'duariri otoromaing ureaavai.” 32Ee'noko Jiisuu' uroitaa' Jerusalema'aape daanto taunge nanau', ee'noko ta'nimpariru' teing siompaako'ning avoreaama. Ee'noko bakaning nanai'keta kenaanka naro'urira minkunaavuru' dama'ke nkoaravaina' 33Aa'puru', “Ee aing, nii' teing Jerusalema'navuntu'koo deto merimang. Ee'noko teka ee'noo'ka naninge tooka kompui ning Tee Naning-naumpo' Paning-etaing taura'muu'naang aa'ning-koo Piristi'nuka-koo ovontung ee'noko boto naunuka; ee'noko teinge tee tuutunamaara ning boo'koo makosi tampaarai'nange sing-antamaavaing teing-koo Ju'deeaing-koo. 34Ee'noko teinge Ju'deeainge siisimaavai tutupaa'maama, ee'noko mura'maara dupisi'maavaing. Teketa beenang doong tankinuko napo' daa'maravaing.” 35Jeemisi namainta Jooni, Siebedi baurinketa, Jiisuu'anko poretu' aa'purema, “Nau-anta, kapoo' nkomemuree'naang piamoremang.” 36Ee'noko Jiisuu'ke aa'puretu', “Aming nkorerompee'naang piaroremang?” 37Ee'noko temaintai maku'urema aa'puretu', “Taura'mereaing nee' da' ninka ba'nang-koo, tenang dakaang meenasie kororuio' ovorintari ba'nantaravainang, narung tampavine-aape ee'noko narung mare'aanavine-aape.” 38Ee'noko Jiisuu'ke temainta aa'puretu', “Dee'ke tee kapoo' eentameresing noru'erea'. Dee'ke ee teru' ntonaru' oraka' dee'naru' ning naikampainaru' naikirepeu'? Ee'noko napo' sisikeera ninka meeka'antamaravaina' ee meeka'antararepeu'?” 39Ee'noko temaintai maku'urema aa'puretu', “Ee', nee' makosira.” Ee'noko Jiisuu'ke aa'puretu', “Ee', masika', kaapu-koo ninge naikampaing-koo naikireainge, ee'noko meeka'antamaravaina' meeka'antarareainge. 40Ee'noko ning taura' o'noa' miru'koo naning ning-koo tampavine-koo ee'noko mare'aanavine-aape ba'nang-anta-koo. Aung tee kapoo' Kumponing bakaang. Teie bampuu'na' ba'nampareaing.” 41Ee'noko teinge napo' nanai'ke tee' taaravaara Jeemisi namainta Jooni iikoo'aaretu'. 42Ee'noko Jiisuu'ke ookara naro' bokuvurira aa'puru', “Dii'ke ee noru'eri otong teing nantoong Ju'deeaing-kooninge biikaning ovontung miru'aarimaing iri'oromana' nantoong-koo. Ee'noko biikaning pankenankai biikaang iri'ke nantoong etuaarikoo'. 43Teka dii'koo tee' deea'. Naning dii'koong bore' oto'koo piavora diikaang pakupakunung otoai. 44Ee'noko naning dii'koo dau basi deeng-koo piavora botovotonaa' otoai ookara-koo. 45Ning Tee Naning-naumpo' Paning-etaing tee'ke, kansi'koo ovoring-pina' oto'koo moa', teka pakupakunung deemaraa'naang mou'nung, ee'noko nkaang domaang dua'koo teing-koo mmau' boo'keta simpiri'arii'naang.” 46Ee'noko Jerikoo'namono-koo tavo'ariru'. Te' otorokotaa' napo' tenkenau' Jiisuu' ee'noko bakaning barevare-nupoong. Ee'noko napo' nantoong karika' nari'. Ee'noko naning duta kaputu' taunge ba'nampari otoi nantoong mooni'koo eentavuriko'. Aung naning miring Batimiasi, Timiasi bauring. 47Ee'noko teie taaravura Jiisuu' Nasareti'nung tankinuko boku tutumpuu' aa'puma, “Jiisuu', Deevita' bakanaving-koong, piaameai ning.” 48Ee'noko nantoong karika'ke poteaama dooroomparaa'naang botoau'. Ee'noko tee'paako bakei aa'na' bokuma aa'puu', “Deevita' bakanaving-koong, piaameai ning.” 49Ee'noko Jiisuu'ke nasinura aa'puu', “Bokueriai.” Ee'noko bokuau' tee kaputu', aa'paama, “Doturari daa'daravai. Bokurumaang.” 50Ee'noko bakaang mononopa' dua'ura namu'ke daa'arara Jiisuu'anko beu'. 51Jiisuu'ke aa'puu', “Da' arekee' nkorama'naang piaroi?” Ee'noko naning kaputu'ke aa'puu', “Nau-anta Pankaing ee, ning duta bantang-antameaing.” 52Ee'noko Jiisuu'ke aa'puu', “Naniaing. Dakaang baitoi tamparu'kiing.” Ee'noko namu'ke bantora tee Jiisuu' siompuu' taunge nanuko.

will be added

X\