Luke 7

1Tenang Jiisuu'ke bakaang daankinang bakearara taaravau'noo'keta tumparu'nung tee Kapaneume'navuntu'koo. 2Teke tee naning narung daaku' piatooronuka tarenara otoko' bakaang botovotonaa' teie aa'na' piaavuko'nung siipavou'nung boo'koo tumpituumpi. 3Tenang teie Jiisuu' taaravura Ju'koong Ovontung botovuru' tee-anko nia'aako pora taare-antavuu'naang bakaang botovotonaa'. 4Ee'noko tenang teing Jiisuu'anko porora teing aa'na' eentavariru'nung aa'paama, 5“Tee tee naning tampara aung, dake paku-koo makosi, ai' teie tee nii' Ju'nupoong pakumurimaung ee'noko niikaang dootuu'nava kanimemuru'.” 6Ee'noko Jiisuu' teing ninka nari' beu'. Tenang tee pava due' basiarako teie daaku' tarenarai ba'maikori' nii'ning botovuru' Jiisuu'anko aa'puma, “Ovoring, daka baru' pore'antararavauka', ai' ning tee makosi deea' da' nkanoo' pava-koo kuung po'koo. 7Tee'koo ning ninka daangamarama da'anko moa', teka dake tamung karai minkueko nkaang botovotonaa' taarevoaing. 8Ninge da' pankaing tasi'damira tee' minkuamaang, ai' ning tee napo' nii'noo' basi-koo iri'koo kuung o'nong piatooronuka tare-koong-koo. Ee'noko nii'nung aa'panko dei, ‘Beai,’ tee bepeu'. Ee'noko nii'nung aa'panko dei, ‘Poai,’ tee popeu'. Ee'noko nkaang botovotonaa' aa'panko, ‘Aung nkoveai,’ teie nkovupeu' tee.” 9Tenang Jiisuu'ke tee' taaravura ta'ninuu' tee-koo, ee'noko dama'du bere'arara karika'koo siompaako'ning-koo karoma aa'puu', “Ninge naurampimang dii': temu'keta aung amurii' baito pankaing ooampaung bane Isireeli-nupoong ninka nari' o'norimaunge.” 10Ee'noko tenang teing botovuru'ning toroarira pava-koo teinge ooau'nung tee botovotonaa' taarevora otoko. 11Batei oki'namu'koo teketa' Jiisuu' nii'namono-koo osi pankaing-koo beu'nung Neini' tampaamanamono-koo. Ee'noko bakaning barevare-nupoong ee'noko nantoong karinga nari' tee ninka berou'nunge. 12Osi-koo karanaang due'arako naning boo'paru'nung nkavai siariko' temono-ita. Aung tee bauring narung masikung anie baukoi, ee'noko teni teie bauko naaro. Ee'noko nantoong karinga teni ninka nari' poroko'. 13Ee'noko tenang Ovoringe oovura bakaang domang aa'na' piaavou' teni-koo, ee'noko aa'puu', “Birontaravauka'.” 14Ee'noko teie pora kompuu' tee kave, ee'noko teing nkavaako'ning dantavarira donkonai otorou'. Ee'noko teie aa'puu', “Nemaka, ninge aa'damaang da', ‘Daa'daravai.’” 15Ee'noko tee naning boo' deto ba'nanura kara tutumparu', ee'noko Jiisuu'ke tee teni bauko avuu'. 16Avoro'ke amporo'uru' teing ookara. Ee'noko teinge Kumponing daangampau' aa'paama, “Nakaronara Kumponing-etaing nii'koo meu'ke anke daa'aring; Kumponinge nii' bakaning beero'muring!” 17Ee'noko teie aunge doorenange tee-koonge ookara Judia'navaro punkaraampuu'nung ee'noko te' korovui otoinairu nari'. 18Emu' tee, Jooni Minkinara kiimatanava-koo otoko bakaning barevare-nupoong tee-anko berora nauau'nung aing ookara kapoo'nanka Jiisuu'ke nkovuko'ning. 19Ee'noko Joonie kenaankara bakaning-koo barevare-nupoong-koo bokuvureta Ovoring-anko botovuretu'nung aa'puma, “Aa'pereai, ‘Da' ee tee tavo'kuaing-koong, ai' mme' nii'nung nempampiainge?’” 20Ee'noko tenang tenaanka poreta tee-anko aa'puretu'nung, “Jooni Minkinarai nee' da'anko botomuresinung aa'puma: ‘Da' ee tee tavo'aravaing-koong, ai' mme' nii'nung nempampiainge?’” 21Ee'noko tenaankai Joonie botovuretu'naankai maku'noo' nempuresi otoko Jiisuu'ke karinga amutemurii' siipa-po'nupoong taare-antavuru', nii'ning oramurii' siipa avo'avoro' otoroining ee'noko nii'ning tanuaananka oreng-po'nupoong. Ee'noko kaputu'nuka mmau' bantang-antavuru'nunge. 22Ee'noko teie aa'puretu'nung tenaanka, “Bereta nauereai tee Jooni Minkinara kapoo' dee'ke ooveresining ee'noko taaraveresining, aa'noining: kaputu'nuka banteaama ookai, kau' de'doonuka nanai, oramuu'po'nupoong kiiroraa'ariri ee'noko kipaunuka taareai, boo'nuka daa'ariri, ata'oinku tampara doorenang daankianko taaravai. 23Ee'noko biraankearavaing tee naning ning-koo date'pari baitoaravaing, ee'noko nkaang nko-nko akovee' mare'uauka'.” 24Tenang Jooni Minkinara bakanaanka kara nkara toroaresio' Jiisuu'ke kara-nau tutumpuru' nantoong karinga Jooni minkuvuma; ee'noko aa'puu', “Dii'ke aremurii' naning doore taaraverira mee'bora' sirakamaa'koo ooverii'naang beriko' karika'duri? Naning tunsi-paaka onou avitoitoi eeari oto' oo-koo te' beriarupeu', ape'? 25Napo' naning nepu'arama kirokaiari otomaung oo-koo beria', ape' aing? Ai' teing nantoong baarong tampenge nopa'arimaing, ee'noko kavo mmau'po'nupoong-pina' otoromaing dauraronanka biikaning-koo pava-koo oovereripeu', mee'bora' sirakamaa'koo deea'. 26Teka arekee' masika' oro' oo-koo beriko' dii', ai' narung nakaronara? Ee', tee bakei nakaronara masikung Kumponing-etaing emu' ninge naurampimang dii', tee tee aa'nung ookara nakaronuka-koo dau basie tee. 27Ai' aung ee'nara miru'ui Daari Meekung-koo ee' minkuari otong Kumponinge bauring temu' nauvuu'noo'ka aa'puma, ‘Ee aung, ninge botoampaing nkaang kara-nka da'koo uro'ke tee taung maamu-antareruaing uroitaa'.’ 28Emu' ninge aa'dampimang dii', Jooni Minkinara tee ookara nantoong tee-koo uro'ke ponto'ariru'ning-koo tee deto basi pankaing, teka ninge ee' naurampimang, enang-eta deto baa tee ninge tare-koo aroo'aravaing, bane Kumponing bakaang muu'koo oki'narai, teie tee Jooni puru'ui otoaing.” 29Ookarai nantoonge ee'noko taakisi nkanukai taaravau'nung tee. Aing teing ee'ning Kumponing bakaang kara koonto' tasi'paara aroo'aako Joonie ntong-koo minkivurira meeka'antavuru'ning. 30Teka teing Boto Keperuu'navitu ee'noko teing boto naunuka Kumponing bakaang miru' teing-koo kontevorora Joonie ntong-koo minkivuma meeka'anta-koo taura'pariaruu'. 31Tee'koo Jiisuu'ke napo' aa'puu', “Dii' nantoong emu'navarang ninge aminge pa miru'dampipeu'? Arekee' naurampiko dii'ka tasi'daripeu' diikaang aarumo? 32Dii' teing toire'pina' oro'nanka baaveroma ba'naniai turampeemaing bii'ka aa'peema, ‘Kovi puunterorompiko konterorima neekarariarukoo'. Ai'nontu'mariko dii' birontariarukoo'.’ Tee' nari' oorampimaung nee' tokomererimaing. 33Jooni Minkinara porai'nange taamang tovang uaini kerempuko konterorima aa'periko', ‘Tee ma'naang-po'nung.’ 34Ee'noko ning Tee Naning-naumpo' Paning-etaing mora taamanama tuaamarako napo' konterorima aa'merimaung, ‘Aung ooveriai taamang ee'noko uaini nai bauko, taakisi nkanuka ee'noko nii'ning orenge bii'maiko'ke.’ 35Teka Kumponinge avutevu'muresi botomuresina' sinampuko dii'ke bakaang matau tasi'periaing.” 36Teketa' nii'nunge Boto Keperuu'navitu-koonge Jiisuu' bokuvuu'nung tee ninka taamanuree'naang, ee'noko bakanava-koo kuung tumpareta taamantoma ba'namparu'nung. 37Ee'noko ta'nimpaarii'na' nanie manikumai oranie temono-koonanie taaravura tee taamanuko Boto Keperuu'navitu-koong bakanava-koo, duuni tampa' nuuraa'po'naro' nkavui pou'. 38Ee'noko teni pora Jiisuu'koo dama'du donkonuu'nung kau'kanoo'ke biromparama. Bakaang kau' ta'due duu'puko' ee'noko piu'uko' bakaang dapoi bore'koonge, ee'noko kau' bakaang nuunuvuko' ee'noko duunie sisi'uu' tampa' nuuraa'ke. 39Emu' teie Boto Keperuu'navitu-koonge bokuvuu'nunge tee oovura baka-koo aa'puko', “Aung naning nakaronara dei noru'upeu' ani baa aremurii' manikuma kompumatomai aung, ai' ani teni orani.” 40Ee'noko Jiisuu'ke bakaang noru' tasi'pura aa'puu'nung tee, “Saimoni', ning kapoo' oto'memumang da' naurama'naang otoing.” Ee'noko teie maku'uma aa'puu', “Aming ee, nau-anta?” 41Jiisuu'ke aa'puu', “Narung naning otoko'nung tee-koo kenaanka naninkai komaaru nkovuretu'nung. Narunge pa'noko' daaku' namikuri nkavuu', napo' nii'nunge pa'noko' kivora namikuri. 42Teketa tenaankai bari'koo makoturearuio' teie tenaanka tonta'antavevuretu' ookaanka. Emu' tenaanka-koo arera teie aa'na' pankaruntoompupeu'na' oro'pari?” 43Saimoni'ke maku'uma aa'puu'nung, “Tee naning baru' aa'na' tonta'antaevuu'nung-pina' noru'amaang.” Ee'noko Jiisuu'ke aa'puu' tee, “Dake masika' minkueing.” 44Teketa' teni-aape manikuma-aape bere'arara Saimoni' aa'puu'nung, “Dake ee ani manikuma oovemaang? Ning a' dakanava-koo tumarako dake niikaang toomo siompei ning ntong amea' kau' duu'koo, teka anie duu'muing nkaang kau' bakaang ta'due ee'noko dapoi bakaange piu'mui. 45Dake napo' onkeonke'mema nuunumea', teka tenang ning a' kuung moinoo'keta' teni siparava' ning-koong kau' nuunu-koo. 46Dake ning-koong bore' duunie sisi'mea', teka anie nkaang kau' duunie sisi'muing tampa' nuuraa'ke. 47Tee'koo ninge nauramaang da': Ani bakaning orarananka mmau' tonta'ario' piaa pankaing oro'antavuing, teka baa tee bakaning oraka' nkonanka-koo oki'ning tonta'arako piaa oki'noo' oro'antavumaung.” 48Tenang tee Jiisuu'ke teni aa'puu', “Dakaning orarananka tonta'deronsing.” 49Teketa teing teke nari' taamanaako'ning kara tutumpariru' nung bii'ka aa'paama, “Aung baa naning aa'nung orarananka tonta'ukoo'?” 50Ee'noko teie aa'puu'nung teni manikuma, “Dakaange baitoi moo'duinani. Mooa ninka naniaing.”

will be added

X\