Luke 5

1Nii'na'mung tee Jiisuu' tee nuaru' Kaaleli'naru' due'ke donkonuio' nantoong mmau' porora paampa'aako' kara Kumponing bakaang taara-koo. 2Ee'noko teie teka kerenta bakaasining oovuko' nuaru'koo tapirua tavi' baranukai sipaara biikaning sionung duu'paako. 3Nareng-koo teing-koo bakaasi-koo Saimoni' bakanareng-koo aa'earara Saimoni' nia'uma aa'puu', “Daampeto oki'noo' naro' tuu'ei mereai.” Ee'noko teie tuu'uio' te' bakaasi-koo ba'nanui nau-antavuru'nung nantoong tereng-eta. 4Ee'noko kara bakearako teie Jiisuu'ke Saimoni' aa'puu', “Kankonoo' danto be'antavera dakaang sionung doonko dua'eai tavi' barang-koo.” 5Ee'noko Saimoni'ke maku'uma aa'puu', “Ovoring, nii' pore'moring ookutuna'mung muunga. Konkampia', teka botomeina'koo dake ninge doonko dua'ampaing tee sionung.” 6Ee'noko teinge tee' nkoaara tavi' uumono~ oraura~ avo'aaru'; 7Ee'noko biikaang sionung dererere'arako biikaning manta'nanka birenge bokuaaru'nung oovunareng-koo otoroko'ning porora pakuaarii'naang. Ee'noko teing porora ookeng bakaasining maanto'aara dapi' minkiariko'. 8Teka Saimoni' Piitai oovura tee, asikovura Jiisuu'koo kau'kanoo' kinkinura aa'puu', “Ovoring ee, ning naning orara, da'koo due' oto'koo makosi deea'.” 9Teing ookara Saimoni' ba'maikori' nari' asikovuru' teing tavi'nanka barampaaru'ning ooaarira. 10Jeemisi namainta Jooni napo' nari', Sebeti' baurinketa, Saimoni' ninka nari' manta'ka tavi' barang-koo. Ee'noko Jiisuu'ke Saimoni' aa'puu', “Aroreauka'nung. Enang-eta deto dake nantoong baramperimatoo'naang.” 11Ee'noko tenang teinge teing biikaning bakaasinanka tapiru duumeaarira~ ookara kapoo' sipaarira teinge tee siompau'. 12Jiisuu' nii'navuntu'koo teing-koo osinanka-koo otoko naning narung pou' oramuu'ke maanto'. Ee'noko tenang Jiisuu' oovura tee kinkinura eentavaru' tee-koo, aa'puma, “Ovoring, da' piarora deeko' dake ning kuimepeu'nung.” 13Ee'noko Jiisuu'ke bireng tovoro'arara kompuu' tee, aa'puma, “Piamoi otong. Enang kuiraring!” Ee'noko namu'ke tee oramuu'ke sipuu'. 14Ee'noko Jiisuu'ke naning nau-koo orokovura aa'puu', “Bera piristi'koo sira'antararavaing ee'noko boontunang nkoveai da' nantoong due'koo untu'anta-koong Moosesi bakaang botoi minkuvumana'.” 15Teka tee' minkuvuio' baru' aa'noo' doorenang bereravari nanuu'nung tee-koong, ee'noko mmau' nantoong porou' taara-koo ee'noko taare-anta nka-koo biikaning siipananka-koo. 16Teka nii'ning batei-koo mee'bora' sirakamaa'koo nantoong-eta tonta'arama teke kunsiarako'. 17Nii'na'mung teroong-koo Jiisuu' nau-antavarako Boto Keperuu'navitu ee'noko boto naunuka teke due'ke ba'nanai otoroko' ookara osinairu-eta porora aa'ning-eta: Kaaleli'navaro-ita, Judia'navaro-ita, ee'noko Jerusalema'keta. Ee'noko Ovoring bakaang purinto' tee ninka otoko' nantoong taare-anta-koo. 18Ee'noko nantoonge naning narung batanang-koo otoko po'antavau' dootavou'nung. Ee'noko teinge taung besi'aako' kuung po'antavaara Jiisuu'koo uro'kanoo' beng-koo. 19Teka karika'ke paampa'aio' doona ooaava' tee kuung po'anta-koo, ee'noko teinge daukava-koo koinaara teke to'ba'aara batanang-koo otoko siau'nung meu' Jiisuu'anko. 20Ee'noko tenang Jiisuu'ke teing tee tavo'au'ning biikaang baito oovura aa'puu' tee naning doota, “Aung ee, dakaning orarananka tonta'deronsing.” 21Ee'noko teinge boto naunuka ee'noko Boto Keperuu'navitu~ aa'ning ninka niania' tutumpau' aa'paama, “Aunge aming-koo Kumponing bauvaupaa'umaang? Naning otoa' orara aarumo tonta'upeu'nung, Kumponing narung deeko'.” 22Tenang Jiisuu'ke biikaning niania'nanka tasi'pura teie maku'urima aa'puru', “Dii' aming-koo diikaang domang-koo kuunge tee' munkururarimaang? 23Arera kara masika'poaruko ooverira ning makosi deeaung tammeripeu' aa'ning-koo, ee' minku-koo, ‘Dakaning orarananka tonta'deronsing,’ nii'na' ee' minku-koo, ‘Daa'darara naniai.’? 24Teka dii'ke iro' noru'merii'naang ning Tee Naning-naumpo' Paning-etaing tee purinto' oto'memuing anke kansi'koo o'noi orarananka tonta'koo...” Tee'pura tee naning doota aa'puu', “Ninge aa'damaang, ‘Daa'darara dakaang tani' nkavei naniai dakanava-koo.’” 25Ee'noko namu'ke, ooai otoko, tee daa'arara bempari otoko'nung tani' deto nkavui bakanava-koo beu', Kumponing daangampuma. 26Ee'noko ta'ninta'ning noru' paapaa'ke ookara dako'uru' ee'noko dankuranku'arima Kumponing daangampaama aa'pau', “Nii'ke e'mung kapoo' damisimainanka ooampiring.” 27Teketa tee kato tenkenura Jiisuu'ke naning taakisi-nka-nung oovuu'nung miring Liivai', taakisi nkavaako'nava-koo ba'nanuio' bakanavaro-koo. Teketa Jiisuu'ke aa'puu', “Ning siomeai.” Ee'noko Liivai'ke ookara kapoo'nanka sipura, deto donkonura tenang-eta deto tee siompui nanuu'nung. 28(-) 29Ee'noko Liivai'ke bakanava-koo paroro pankaing nkoevuu'nung Jiisuu'. Ee'noko teke karinga taakisi nkanuka ninka napo' nii'ning oovuning ninka nari' otoroko'ning teing ninka ee'ning ninka nari' ba'naniau'nung taamantomai. 30Ee'noko teing Boto Keperuu'navitu biikaning boto naunuka ninka minkuminkuaariko' bakaning barevare-nupoong-koo aa'paama, “Dii' aming-koo nari' taamanirimaang taakisi nkanuka ee'noko nantoong orenanka ninka nari'?” 31Ee'noko Jiisuu'ke maku'urima aa'puu', “Teing nantoong tampa' otoroining naninge nankai'urii'naang piavoroa', teka teing siipavoromaing naing piavoromaung. 32Ning nantoong tampenanka-anko moa'. Ning orenanka-koo mou'nung nauaranko bere'aria'naang.” 33Ee'noko teinge Jiisuu' aa'pau', “Jooni bakaning barevare-nupoong amutemu'ke unkumoarimaung kunsi ninka, ee'noko Boto Keperuu'navitu biikaning barevare-nupoong tee' nari'ke, teka da' dakaning nai narung-koo otoromaung tuaamparima.” 34Ee'noko Jiisuu'ke maku'urima aa'puru' teing, “Dii'ke ee teing baranee'navitu nampeesi-koo poromaing unkumo-antaverereripeu' tenang tee nampeesinara nari' otoroko teing ninka? 35Otong nii'ning doong tee nampeesinara teing-eta tonta'aravaina'mung. Ee'noko tenang teing doong-koo unkumoariaing.” 36Ee'noko Jiisuu'ke kara dikito' nauvuru'nung napo', aa'puma, “Naninge nerakara'koo mononopa'nara'koo nii'noo' dere'ura urikara' ninka naro'ka pate'uarupeu'. Tee' nkovuaing deeko' tee tamung orarivuu'naang tera' nerakara' dere'uinara' urikara' ninka pate'koo makotua'nara' ninka. 37Ee'noko napo' naninge nerakaru' uaininaru' urikaro'koo koo'uarupeu'. Tee' nkovuaing deeko' teru'ke nerakaru'ke urikaro' ta'da'pura piamparapeu' ee'noko tero' tee urikaro' oraru'kuainaro'. 38Teka nerakaru' uaininaru' tee nerakaro'koo koo'uaing. 39Ee'noko napo' naninge urikaru' uaininaru' naivura nerakaru'koo piavoarupeu' aa'puma, ‘Urikaru' aru' tamparu'.’”

will be added

X\