Luke 20

1Nii'na'mung Jiisuu'ke teke dootuu'nava pankava-koong parang-koo daankiarama doorenang tampara nau-antavuriko'; 2Teketa teinge piristi'koo ovontung ee'noko boto naunuka, nantoong-koo urang-antanuka ninka tee-anko pororai'nange aa'pau', “Naumeriai dake aremurii' taura' otoko dake aing kapoo'nanka nkovemaatoinge, baie aruu'nunge tee taura'?” 3Teie maku'urima aa'puu', “Iro' ninge dii' napo' tana'dampiko naumeriaing dii'ke. 4Baie taura'puio' Joonie nantoong ntong-koo minkivurima meeka'antavuriko', Kumponinge ai' tamung nantoonge?” 5Ee'noko teing bii'ka nia'eema aa'peeko', “Are'pampia'naang? Aa'pampiko deeko', ‘Kumponinge,’ teie aa'murii'naang, ‘Teka dii'ke aming-koo Jooni masika'antaveriaruko'?’ 6Teka aa'pampiko deeko', ‘Tamung nantoong-etaing,’ ookarai nantoonge kapange dupisi'maarii'naang, ai' teinge tee Jooni nakaronara Kumponing-etaing tasi'pai otong.” 7Teketa aa'pau' maku'aama, “Nii'ke aa' noru'ampia' baie pa taura'puio'.” 8Ee'noko Jiisuu'ke aa'puru' teing, “Ee', ninge tee'ke naurampiaroo'naang baa tee ning taura' amuu'nung aing kapoo'nanka nko-koo.” 9Ee'noko Jiisuu'ke kato nau-antavurima aung kara dikito' nauvuru' teing nantoong, “Naning narunge mintoonau uaininau keempuu'nung, teketa nii'ning nantoong tenau tare-antavurira nii'nameensi'koo tenkenuu' pankaroong otoo'naang teke. 10Ee'noko tenang batei sinang kavu'koong makotuio' teie narung bakaang botovotonaa' botovuu' teing-anko uaini tare nkonuka-anko nii'ning sinang baarauni-koong~ tenau-koo nkaevua'naang. Teka teinge tenau tare nkonukai tee botovotonaa' murasiavaama bata'au' tee baarauni avaava'. 11Teketa teie napo' nii'nung botovotonaa' botovuu'. Tee ee'nung napo' tee' nari' mura'aama maimaia'na' nkoaama bata'au' tee baarauni avaava'. 12Ee'noko napo' tee' nari' teie ovoringe beenaumo-nung botovuu', ee'noko tee aung ereng-antavaara dama'du dua'au'. 13“Teketa teie uaininau ovoringe aa'puu', ‘Enang aming nkoama'naang? Enang aa' tee nnuring kirokai ninge aa'na' piaavamaung botoampaing. Teing pa amaiaa'oropeu' tee-koo.’ 14Teka tenang teinge tare nkonukai tee bauring ooaara bii'ka kareaama aa'paako', ‘Tee aung ee'nung barenku okovuaing. Aia' dupisi'ampiai tee barenku okomuriaina'.’ 15Ee'noko teinge tee uaininau-eta dama'du dua'aara teka dupisi'au' tee. Enang arekee' nkovuriaing teie tenau okovenunge? 16Teie aa' tee teing tare nkonuka-anko pora tavurima opuriaing, ee'noko nii'ning oko-antavuriaing.” Tenang teinge taaravaara tee aung minkunaa aa'pau', “Ee aing, teing aa' oo nii'ke tee' nkoau'na' nkoampiarupeu'.” 17Teka teie oo'oovurima teing aa'puru', “Nko temurii' nko-koo makosiriaung deeko' anaare Daari Meekung-koonaare aming miru'ari otong, ‘Tere' ee'nare' kapanare' pava kaninukai poore'aama dua'au'nare' ookutunava-koo e'manianare' tumanare' deempario' tasi'pau' dama'ke.’? 18Ookara nantoong tere'koo tasi'paava' tupampariaining tee bii'ka pisira'ariaing, bera baa tee naning tere' dau dua'aravaing tee tere'ke puutuvuaing.” 19Ee'noko teketa tenang boto naunuka ee'noko piristi'koo ovontung tasi'pariru' teie tee kara dikito' teing too'antavuri minkuvurio'. Ee'noko tenang ee'nang taung besi'au' Jiisuu' dai'aavainavung, teka nantoong-koo avoreau'. 20Tee tee teinge keuai otoko'nung makensi'navitu botoaarima tee-anko barevare-nupoong masikeng-pina' oro'pariri avakareaava'naang, ee'noko kara minkuvuaining-koo oranaare taaravaara deeko' ovo'ma'koo tavo'aava'naang. 21Teinge nia'aama aa'pau' tee, “Nau-anta ee, nii'ke noru'dampiri otong da' koonto'na' karema nau-antamerimaung, tankaang-anta-pina' oro'daravaunge, teka bakei masika' Kumponing bakanavung naumerimaung. 22Arekee', nii'ke Ju'nupoonge ee daurarong~ pankaing, Siisa', Rooma'nung taakisi avu'koo makosi ai' makosi deea'?” 23Teka teie biikaang avakare tasi'pura aa'puru' teing, 24“Io' mooni'nu naumeriai. Au-koo aung bore' uu'aa' baa-koong aa'nung miring daariari otong?” Teinge aa'pau', “Siisa'koong.” 25Teketa teie aa'puru' teing, “Tee tee averiaing teing kapoo' Siisa' bakaning tee-anko ee'noko Kumponing bakaning Kumponing-aape averiai.” 26Tee' maku'urio' doona ooaava' baanka'aapeu'na' nantoong-koo uro'ka, teka ta'ninaara dooroompariru' teing. 27Teketa napo' Noru' Pitunavitu-koong~ nii'ning Jiisuu'anko niania' ninka porou'. Teing teing boo'keta napo' daa' masika'antavaava'navitu. Tevitu-koo nii'ning Jiisuu'anko porora avakareaama ee'pina' nia'au'nung, 28“Nau-anta, Mosesie aung boto daarimemuru'nung, ‘Naning narung booko ba'aang otoko toire' otoai tee donkaani baara'ma'nunge nampuai teni naaro tee ninka bataata boo'paru'nung tooto' paravevuree'naang.’ 29Urikamu' tee namaia' naro'ka ~kenaanka-taa otoroko'nung. Ee'noko tutuna'nung nampeesiarara boo'paru' bauring otoa'. 30Ee'noko baara'ma'nunge teni manikuma nampura tee' nari' boo'paru' bauring otoa'. Teketa beenaumo-nunge; 31Tee' nari' temaia'koo ookara-koo ~kenaanka-taa-koo nkoaru'. Ookara boorou' biurukaa' otoroa'. 32Ee'noko asi'na'moo teni nani manikuma boo'paru'. 33Enang te'mung asirana'mung boo'nuka daa'ariaina'mung temaia'koo arera ba'aang deemparavainani? Ai' ookara ~kenaanka-taae nampau'nanie teni.” 34Ee'noko Jiisuu'ke aa'puru' teing, 35“Aung emu'nung batei-koo donkaang ee'noko maniku' nampeesiarimaung, teka dama'nung batei-koo teing Kumponinge makosi-antavuriaining boo'keta daa'arira oto'koo tee teing nampeesiariauka'ning, 36ai' teing tee napo' boo'koo makosinuka deea'; aming-koo, nna' koosinunanka-pina' oro'nanka deempariko. Teing boo'keta daa'ariainoo'koo Kumponinge baurukaa' deempariri otoroaing. 37Moosesie ee'narai tee' nau-antamuru'nunge teing boo'nuka domampariaing-koong kara. Bakaang dariraari-koo Kumponinge tuu'doi'navari tamung urusivuko'navari-eta karoma Moosesi aa'puu', ‘Ning tee Kumponing teing aing aa'ning biikaang: Eebaraami', Aisake', Jeekopi'. Teing ninka komeeri O'noi O'nomaung ning.’ 38Tee' minkuvuu'nung-koo tasi'pampiri otong ookara bakaning deempariri domantoo'nuka otorong Kumponing bakaang duta-koo, boo'nuka deea'.” 39Ee'noko napo' nii'ning boto naunukai maku'aama aa'pau', “Nau-anta, da' tampa' kareing.” 40Teketa tee, teing ookara nantoong avoreau' Jiisuu' nii'ning niania' nia'koo. 41Teketa Jiisuu'ke biikaang noru' tante-anta-koo aa'puru' teing, “Arekee'koo nantoonge aa'paamaung, ‘Tee naning Kumponinge tero Pako'pari'uu'nung nantoong domampuri tarevuriainoo'koo tee Deevita' bakanaving-koong deempari tavo'araa'naang.’? 42Ai' Deevita'ke baka aa'puu'noo'koo tee-koo Buuku Kena-koo, 43‘Teie Ovoringe nkaang Ovoring aa'puu', “A' ning-koo tampavine-koo ba'naniai bera ninge dakaning kare-nupoong dakaang kau' patu'nanka deeng-antarerompainoo'ke basi.” ’ 44Tee' minkuvuma Deevita'ke tee Pako'pari'nii' Ovoring Kumponing-pina' basi tampuu'nung. Enang Kumponing deemparako arekee' napo' Deevita' bakanaving-koong tampaapeu'?” 45Ee'noko ookara nantoonge taaravaio' teie aa'puru' bakaning barevare-nupoong, 46“Tarerariai teing boto naunuka-koo biikaang aarumoi baaro'antaraari'neeng. Teing mononopa' isikeng ninka avitoitoi nanu'koo piavoromaing. Ee'noko nantoonge pankaing-antavaarii'naang piavorokoo' baaveromanairu-koo. Napo' pava dootuu'nairu-koo ba'nava'nani'nanka tampeng-koo ba'naniaakoo' nantoonge ankampaaria'naang, ee'noko paroro kante-koo pankeng-pina' noru'aarii'naang piavorokoo'. 47Ee'noko naaroonku biikaning pava ookeng daping opo' dunkumpaama kunsi isikenge dakaraka'paakoo' oraka' noru'aari'neeng-koo. Teing teing ee'ning pankaing kiimata nkavaavaining.”

will be added

X\