Luke 19

1Teketa Jiisuu' mme' Jerusalema'aape bema Jerikoo'namonoi tumparara osi-koo meeroo'ke tankinuko, ee'noko teke naning narung otoko'nung miring Sakiasi; 2Tee taakisi nkanuka-koong narung pankaing, ee'noko mooni'ke maanto'ke. 3Ee'noko tee Jiisuu' tasi'pui oo-koo piavou'nung, teka makotuaruu' nantoong karika'ke nee'aako naning apukung deemparama. 4Tee'koo uro'kanoo' kua'parara koi'navarie miring sikamoa'ke deto koinuu' Jiisuu' oovuu'naang tevunge tankinuaing noru'ui. 5Ee'noko tenang Jiisuu' te' basiarama deto ookuma oovura tee aa'puu', “Sakiasi, iri'narung depeto siraravai, ai' ning dakanava'koo e'mung o'noo'naang.” 6Tee'koo iri'narung depeto siarara dotuaritaa' onkeonke'uu' tee Jiisuu'. 7Ee'noko nantoonge ooaara tee minkuminkuau' aa'paama, “Naning orara bakanava-koo otoo'naang being.” 8Teka Sakiasie donkonura Ovoring aa'puu', “Aung ee Ovoring, nkaang kavonanka-koo namarang ata'oi'nuka avorompaing, ee'noko nii'nung naning kapoo' tamung nkaevontu'nung deeko' napo' karemu'pie ori'ampaing.” 9Ee'noko Jiisuu'ke aa'puu' tee, “E'mung domang-anta ava-koo poing, ai' aung teie narung, Eebaraami' baurukaa'koong. 10Ee'noko ning Tee Naning-naumpo' Paning-etaing tee nantoong pooarimaing ee' ee'na' besi'arama domamparama'naang mou'nung.” 11Tenang teinge aing kapoo'nanka taaravai otoroko Jiisuu'ke danto minkuvuma kara dikito' nauvuru' noru' koong-antavurii'naang. Ai' mmau' nantoonge daang ee' noru'aako'nung, Jiisuu' daurarong~ deempari Jerusalema' due'ka basiarara Rooma'nupoong bata'urii'naang Kumponing bakaang muu' dupe-antavuma. 12Tee'koo aa'puu' teie, “Naning narung ovoroo' nii'nameensi'koo isipo' nanuu'nung daurarong pankainge teka daurarong deeng-antavuko toroaraa'naang. 13Mme' bea' teie bakaning botovotonaa'nuka-koo nanai' bokuvurira narung daaku'namikuna' kantevuru'. Ee'noko aa'puru' teing, ‘Aing mintoong-antaveriaining bera ning toromaravainoo'ke basi.’ 14Teka bakaning osikaiaang-koo nii'ninge munte'aara tee-koo dama'due kara nkanuka botoaarima tee daurarong pankaing-anko aa'pau', ‘Nii' niikaang daurarong deeng-antaveauka'.’ Teka teie taaravuriaruu'. 15“Teketa tenang daurarong deeng-antavuio' toroarara tee botoaru'nung bakaning botovotonaa'nuka mooni' avuru'ning tee-anko porora sira'paava'naang bereng-antavau'na'. 16Ee'noko tutuna'nung tee-anko uro'kanoo' pora aa'puu', ‘Ovoring, dakaang mooni' narung daaku' ameu'namiku napo' kivora daaku'namiku deeng-antarerontu'nung.’ 17Ee'noko teie aa'puu' tee, ‘Bakei tampa' nkoraru'nung da' tampara botovotonaa'. Tee'koo tampa' oki'navu'koo kake'iiraru'na'koo da' enang kivora-namonori osi pankeng-koo tarenung deeng-antaramaang.’ 18“Ee'noko kenaanka-nung pou' tee-anko aa'puma, ‘Ovoring, dakaang mooni' narung daaku' ameu'namiku pa'noko' daaku'namiku deeng-antarerontu'nung.’ 19Ee'noko teie aa'puu' tee, ‘Da' enang pa'noko'namonori osi pankeng-koo tarenung deeng-antaramaang.’ 20“Teketa napo' nii'nara pora aa'puu', ‘Ovoring, dakaang mooni' narung daaku' ameu'namiku aing, baarong-koo dai'amira teka tareantu'namiku. 21Da' dataramparura tee', ai' da' tee naning ivekung. Dakaning botovotonaa'nuka pore'oromaatoko dama' pora derararaa'naang.’ 22Ee'noko teie dauraronge tee aa'puu', ‘Da' botovotonaa' orara masikung, tee' minkumeinaare ninge enang toro-antavama'naang da'koo. Masika' ee noru'mei otong naning ivekung? Nkaning botovotonaa'nuka pore'oromatoko dama' mora deramaramaung ee? 23Tee' noru'mei deeko' arekee'koo nkaang mooni' beeng-koo sipearuu', toromarara nii'ning taakore'ning ninka nkavampeu'nung?’ 24“Ee'noko tee dauraronge teing nantoong due'ke donkonai otoroko'ning aa'puru', ‘Tee mooni' pari'eriai tee aung, ee'noko tee kivora daaku'namiku oto'evuing averiai.’ 25Ee'noko teinge aa'pau' tee, ‘Ovoring, aung aa' kivora daaku'namiku oto'evuing mmau' oto'evung.’ 26Teka teie aa'puu', ‘Ninge naurampimang dii' aa'dampima, teing ookara kapoo' basi-antavaamaing dau basinoo' napo' avu'koong, ee'noko tee naning kapoo' basi-antavuaung teing oto'evuining naro'ka pari'koong. 27Teka teing nkaning too'de-nupoong ninge tare-koo piavoroaing tee teing po'antavererira anka ning-koo dutakanoo'ka dupisi'erereriaing.’” 28Ee'noko tenang aung ee' oro' kapoo' minkuvura uroi Jerusalema'aape deto beu'. 29Ee'noko tenang Jerusalema' due'arama teing-koo osi kemonora aa'ning Bepasi ee'noko Beetani teke Olive'po'namii-koo teie bakaning-koo barevare-nupoong-koo kenaankara uro'ke botovuretu' aa'purema, 30“Amonoka'koo du'dareai. Te' du'dareta doonkii'nu kampianu ooveree'naang bi'ari otoko naning mme' ba'nanuau. Dapa'ereta a' po'antavereai. 31Naninge nia'durema aa'dureko, ‘Avoro' aming-koo dapa'eremang?’ ee' minkuereai, ‘Ovoring avoro'koo nko-nko oto'evung.’” 32Teketa tee tenaanka botovuretu'naankai bereta tee' nari' nauvuretu'na' oovuretu'nung. 33Ee'noko dapa'ureko tevoro' kampia-navoro' oko-nupoonge aa'paaretu', “Aming-koo avoro' kampia-navoro' dapa'eremang?” 34Ee'noko tenaankai aa'puretu', “Ovoring avoro'koo nko-nko oto'evung.” 35Ee'noko tenaankai Jiisuu'anko po'antavuretu'nung tevoro', ee'noko biikaang baaronge tani'aara Jiisuu' teu-koo dau ba'nang-antavau'. 36Ee'noko tevoro'ke nanuko nantoonge baaronankai biikaninge taung tani'aako'. 37Teketa tee Olive'po'namii booru'uma~ Jerusalema'aape due'arama oro'parako teing ookara karika' barevare-nupoong doturotu tutumpariru' Kumponing daangampaama bokiaama teing nko-nko iirakutananka ooaako'ning-koo aa'paama, 38“Biraanke-po'nung tee aung daurarong Kumponing bakaang miring-koo pomaang! Mooa ee'noko tee meenasi a'dei'ke paning-koo otoaing.” 39Ee'noko nii'ninge Boto Keperuu'navitue karika'kooninge aa'pau' tee, “Nau-anta, orokoveriai dakaning barevare-nupoong tee' minku-koo.” 40Ee'noko teie maku'uma aa'puu', “Ninge naurampimang aing dooroompariko deeko' aing kapananka deto bokiaama tee' minkuaapeu'.” 41Ee'noko tenang Jerusalema' due' pora te' osi pankamono oovuma birompuru' temono-nupoong, aa'puma, 42“Baka'e, e'mung dii'ke tasi'peri dei tampa', ninge mooa-koo basi-antarampipeu'na' dii', teka enang tee dii'keta duta-ita baku'aring. 43Pomaang te'mung doong tenang diikaning kare-nupoonge porora kororai ku'nuntaariaina'mung taamang moo'eriauka' bera peerai taruriko teinge o'daari doonko kansi'koo dua'raariai diikaning pavananka nari', teing-kooning kapananka tuurampaama; 44Aming-koo, nna' Kumponinge dii' piaaruri beero'duriko tasi'periaung-koo.” 45- 46Ee'noko Jiisuu' Jerusalema' basiararai'nange, parang-koo tumparara pava dootuu'nava pankava-koong-koo, nantoong sipisipi' dovang parekanumpo' baaveveeko'ning bata' tutumpuru'nung. aa'purima teing, “Daari Meekung-koo tee ee' daariari otong, ‘Nkaang pava tee pava kunsinava deempari otoainava.’ Teka dii'ke ‘bakiaa' nkonuka biikanoo'’ deeng-antavering.” 47Teketa doong kante kara nau-antavuriko' pava dootuu'nava pankava-koo. Ee'noko piristi'koo ovontunge ee'noko boto naunukai ee'noko pankenge taung besi'aako' Jiisuu' dupisi'aava'naang. 48Teka teinge kapoo' nkoaapeu'ning ooaava', ai' nantoong dompirompi'oroko'nung bakaang kara taara-koo.

will be added

X\