Luke 14

1Nii'na'mung Doong Uaana'mung Jiisuu' taamang-koo beu'nung narung pankaing Boto Keperuu'navitu-koong bakanava'koo. Teinge Boto Keperuu'navitue Jiisuu' nempai tareaako'nung baanka'aava'naang. 2Teke naning narung Jiisuu'koo uro'kanoo'ke otoko' siipai mono doremparako'nung. 3Ee'noko Jiisuu'ke oovura nia'urima aa'puru' teing boto naunuka ee'noko Boto Keperuu'navitu, “Doong Uaana'mung ee taare-anta nko-koo makosi ai' makosi deea'?” 4Teka teing kareaava'. Teketa' teie kompura taare-antavura si'nara'uu'. 5Ee'noko teing aa'puru', “Dii'koo baa bauring-po'nung nii'noo' boromaka'navoro' oto'evuing dinkung-koo dua'ari dei ee teie iri'narung taaru'uarupeu' Doong Uaana'mung?” 6Ee'noko teing tenaare maku'koo makosiaavaruu'. 7Jiisuu'ke tee teka nantoong taamang-koo bokuaaru'ning tampoo' ba'nang-koo piavoroko oovurira kara dikito' nauvurima aa'puu', 8“Tenang nii'narai bokuruko da' nampeesi-koong-koo taamang-koo pankeng ba'namparimanoo' ba'naniauka' naning da'koo dau basi bokuvuing poko teie bokururepeu'nunge aa'du'neenga, ‘Aung ee, tonta'darako aung ba'nanuai;’ 9Ee'noko tenang da' maia'doitaa' boonko oko batari'darapeu'. 10Teka tenang bokuraako da' bera oko ba'naniai, ee'noko bokuruinge pora aa'duai, ‘Mmaiko', deto a'dei' ba'naniai.’ Tenang ookara-koo teke da' ninka taamang-koo nari' ba'nantariaining-koo miring pankaing nkavee'naang dake. 11Ai' toomo aung ee' oro': Baa naning baka deto nkoaramaung doonko batari'numpo' ee'noko tee naning baka boonko otomaung deto i'anumpo'.” 12Ee'noko Jiisuu'ke napo' nauvuma aa'puu' tee naning bokuvuu'nung, “Tenang dake paroro nkovema da'maikori' bokueriauka', aing aa'ning: daara'mainkaang, dakanamuiaang ee'noko kavokavoro-po'nupoong, dama'ke napo' bokuraara maku'ari'neeng. 13Teka tenang paroro nkovema aing ee' oro'nuka bokueriai: ata'oinku, kaikuu'nuka, kau' de'doonuka ee'noko kaputu'nuka. 14Tee' nkoveko tee Ovoringe da' biraankeruaing teinge bari'daavauka'noo'koo, ee'noko dama'ke te'mung koonto'nuka boo'keta daa'ariaina'mung Kumponinge tee-koo moo' aruaing.” 15Tenang teing-koo narunge Jiisuu' taaravura nari' ba'nampariri otoroko'ning-koonge aa'puu', “Biraanke-nupoong teing nantoong taamang-koo naikaavaining Kumponing bakaang muu' donkonuainoo'ke.” 16Teka Jiisuu'ke aa'puu', “Nii'na'mung narung naninge paroro pankaing nkovura karinga nantoong bokuvuru'nung. 17Ee'noko mororu'na'mung botovotonaa' botovuu' para' sipuma aa'puu'naang, ‘Poriai, taamang maamuari otong.’ 18Teka teing nari' para'ariri kareau'. Tutuna'nunge aa'puu', ‘Ninge kansi' nerakung moo'ansieeng; mera ooama'naang. Aung ee, tampa' naueaing ee, moaroo'naang.’ 19Ee'noko nii'nunge aa'puu', ‘Ninge boromaka'navong moo'aransieening mera paaravarama'naang. Aung ee, tampa' naueaing ee, moaroo'naang.’ 20Ee'noko nii'nunge napo' aa'puu', ‘Ning a'mung nampeesimarieeng; tee'koo moaroo'naang.’ 21“Tee tee enang botovotonaa' toroarara bakaang ovoring kontevorou'na' nauvuu'nung. Teketa' tee pava okonara iiravoi bakaang botovotonaa' aa'puu', ‘Beaing iri'narung taung pankenankai ee'noko oki'nareka'ke kantevei osi pankaing-kooninge ee'noko po'antaveriaing teing ata'oi'nuka ee'noko kaikuu'nuka ee'noko kau' de'doonuka ee'noko kaputu'nuka.’ 22Teketa tee' nkovura toroarara teie botovotonaa'ke aa'puu', ‘Ovoring ee, kapoo' botomeing ninge nkoansing, teka pava mme' maanto'ua'.’ 23Ee'noko teie ovoringe botovotonaa' aa'puu', ‘Taung pankaraunge naniaing ee'noko buru'buurunairue naniai. Ee'noko nantoong etueri kuung po'antaveriai nkanava maanto'aavaina'. 24Ee' nauramaang, teing tero bokuaranko kupi'orou'ning ookara mantonkaavauka'ning nkaang-koo paroro-koo.’” 25Nii'na'mung nantoong aa'na' karinga Jiisuu' ninka nari' Jerusalema'aape nanaama teie teing-aape bere'arara aa'puru' teing, 26“Tee naning ning-anko poainge tee ning aa'na' deto basinoo' pankaruntoonge noru'muaing aing aa'ning piaavurimanoo'keta dau basinoo': bauma, bauko, ba'aang, baurukaa', batatakaampi, baara'mainkaang, ba'marikaampi ee'noko tee baka bakaang domaang nari'. Makosi deeaung deeko' tee makotua' nkaang barevare-nung deempari oto'koo. 27Ee'noko baata teing ning siong-koo baike aa'barata'koo kune'koo taura'pariarupeu'ning teing makosiaava' nkaning barevare-nupoong deempariri oto'koo. 28“Dii'koo narunge pava pankava kani-koo piavora deeko' tutung ee ba'nanura norunoru'uarupeu' moo' noru'uu'naang teva bake-kooning makosi oto'evuing deeko'. 29Noru'ua' tamung tutumpuma tuuku-koo dorang pante'ura opuaruko ookarai ooaavaininge akapeu'aama bemkempaa'neeng tee. 30Aa'paa'neeng, ‘Aunge naninge kani tutumpura kanivuma o'koo makotuaruu'.’ 31“Nii'na' narung dauraronge nii'nara daurarong~ bata'uu'naang kare-koo ee tutung ba'nanura bakaning ninka mumunsiariarupeu' aa'paama, ‘Nii'ke ee oki'ning ninka kivora kokorei' piatooronuka ninka kenaanka kivora kokorei' piatooro bata'koo makosi, ai' makotumpia'?’ 32Ee'noko teie dauraronge makosi deeaung noru'ura deeko' tenang mme' isipo' otoroko teie kara nka-nupoong botovuripeu' mooaveereaina' nia'koo. 33Tee' nari' baa naning dii'koong ookara kapoo' bakaning-eta siparavarura deeko' tee nkaang barevare-nung deempari otoarupeu'.” 34“Tee'koo dii' miang-koo tasi'dariaing. Miang tee kapoo' tampara, teka deva'noo' opari dei, arekee' tarii'antavupeu' napo'? 35Tee aa' tee tee enang makotua' kapoo' nko-koo, tamung dua'koong deemparing. “Dii' punkang-po'nupoong deeko' enang taaraveriai!”

will be added

X\