Jude 1

1Ning tee Juude', tee Jiisuu' Karistoo' bakaang botovotonaa' ee'noko Jeemisi baara'ma'nung. Ninge aung karavoto~ daariamang dii'anko dii' Kumponinge piaarurira bokururu'ning, teie Jiisuu' Karistoo'ke tarerurimaing. 2Tee piaa unaa-anta, mooa, ee'noko piaa Kumponing-etaing maneena' okoruriaing. 3Ee mmaikori', tero tee ninge Jiisuu'ke nii' ookara nari' domamuru'na' daarirerompii'naang noru'anko', teka enang noru' paarimarara nii'nung kapoo'koo daarirerompimang dii' puring-antarampii'naang Kumponing bakaang kara nii'ninge pituaa'neeng-koo orokoverererii'naang, ai' naro'ka bakevui amuru'nung nii'ke tare-koo, ee'noko paari-koo makotua'. 4Ninge tee' naurampimang nii'ning nau-antanuka Kumponing noru'aavaing dii'koo makenge tumpariko, aa'paama, “Tenang nii' Karistoo'navitu deemarira nii' makosi tamung kato piamoriaina' nko-koo, Kumponinge kiimata-koo amorompia', teie piaamurimaung-koo.” Teing tee' minkuaama Karistoo' penkempaamaung tee ee'nara daurarong~ masikung, niikaang Ovoring makosi, nii'nung otoa'. Kumponinge tero sira'puu'nung Daari Meekung-koo kuunge tee' teinge temurii' nantoonge barakosi' kompaavaina' botu basiarima. 5Teie Kumponinge naumurimaung aa'nou'nunge: Iisipi'keta nantoong domang-antavurira napo' teing-koo nii'ning tee masika'antavaavaruu'ning dama'ke boo'antavuru'. Tee' ee'na' tero tampa' noru'eru'na' napo' nauramping tasi'perii'naang. 6Napo' teing koosinunanka naumurimaunge. Tero bono' Kumponinge sipevuru'noo' dintu'aara bii'ka taura'paririo' Kumponinge te' biikanoo' oto'doma masipo'keta bata'uru'. Ee'noko Kumponinge taavi'urio' doong kante-koo tunumparava'noo'ke doonko otoromaung bera te'mung panka'mung simpe'uriaina'mung-koo basiariaing. 7Napo' tee' nari' teing osi pankeng Sodom, Komora', ee'noko nii'ning teke due'ke otoroko'ning oraka' nkoarikotaa' kera'pariru'. Kaukauro nkoaama bakiaa'eema donkaang donkaang ninka nari' oraka' nkoariko'. Tee'koo Kumponinge kiimata-koo nta'ke tai-antavurira o'antavuru' nii'ke noru'koo. 8Teka bane temurii'koong kiimata sira'pari otoko, teing aing nantoong tamung noone narung nau-antaraarima tee' nari' bii'ka biikaang mono orari-antavarimaung teing Sodom-nupoong nkoariko'na'. Teinge dimpa'aamaung tee Ovoring, ee'noko poore'aarikoo' teing koosinunanka~ Kumponinge nerampurima nkovuru'ning. 9Teka tee tero koosinung pankaing Maikol tee' nkoarava'. Tenang Sietani' ninka Moosesi bakaang mono boo'pario' nka-koo tata'eerema, bane pankainge, teka boonkoaritaa' teie Sietani' poore'uma kiimata-koo tampua' tee, teka aa'puu', “Ovoringe orokorui bake-antaruaing da'.” 10Teka teinge ainge nau-antanukai aming kapoo' noru'aavaung tamung kato poore'aakoo'. Ee'noko teing kau' karenaumonanka matauropananka-pina' onouaamana' onouaakoo'. Ee'noko kapoo' mono-aapenung onoue narunge noru'aamaing tamung kato nkoaama orariarikoo'. 11Piaaru'nuka teing, ai' teing teing Keini' bakanavung siompaamaing baara'ma'nung dupisi'ura barakosi' nkavuu'nung. Napo' Beelamu mooni' nka-koo daanameng-koo baka avario' dupisi'au'na' avarikoo'. Ee'noko Koora bakaning-pina' nari' Kumponing-koo bei'bei'arikoo', ee'noko nari' orari-anta kune'aakoo' tee' urikamu' Koora dovang doonko tumpariru'na' kansi' kamaankuio'. 12Ookara batei-koo Ovoring bakaang taamang dii'ke navurariri nkoverimaung-koo domang orara ninka poroma tee orari-antavaamaung tee diikaang navunavu. Dii' ninka nari' taamanirima amaiaa'oroa' bii'ka toonaakoo' duuku'arima. Teing aa'ning-pina' oro'nuka: kamo' kovere-pina', pionge avitoitoi nkavuko apo'uarukoo'. Napo' tee koi' sinang bi'uaruio' bita'au'nung bakei boo'. 13Napo' boo'a pirung-koong ta'da'parama koikoiri nkavuma avitoitoi sipuko oraka' oro'paramana' biikaang orara aarumo ninka tee' oro'nuka. Napo' teu-pina' beento'nu-pina' koonto'navunge nanuau-pina' oro'nuka tero miru'uru'ning tunumparava'noo'ke doong kante oto'koo. 14Napo' tee' nari' Iinokei tarampeearama~ teing aing minkuvuru' tenang Aadama-ita depeto parapara ~kenaanka-taa navarang-koo basiarako aa'puu'noo'ka, “Ooveriko, Ovoring tee bakaning koosinunanka karinga ninka nari' poroaing. 15Teie nantoong ookara simpe'urii'naang ee'noko teing Kumponing-koo kupi'nuka oreng tampurira tora'antavuriai tee-koo biikaang ookara oraka' nkonanka-koo bakei Kumponing too'dena' nkoaamaing-koo, napo' ookara kara ari'ariri'nanka Kumponing-koo minkuaakoo' ee'ninge bakaning kare-nupoonge.” 16Aing teing minkuminkuru ee'noko naro'keta tuumpi nkonuka, biikaang noru' karakaraa'koong pia narung sionuka, ampirinumpariri kareaamaing, ee'noko auraiarima bauta' tamung eentanuka. 17Teka ee mmaikori', dii'ke norunoru'eriaing tee kapoo'nanka niikaang Ovoring Jiisuu' Karistoo' bakaninge kara okovuri nkanukai dama'ke nkoaravaing sira'pau'na'. 18Aa'daaru', “Dama'ke asi'namu' poroaing teing Kumponing daang-antavai benkempaavaining Kumponing-koo kupi'oroitaa' biikaang noru' karakaraa'koong pia narung siompai.” 19Teing aing ee'ning tankatankaang nkoaamaing, kansi' bakaang onou-koo otoromaing, Tanuaang Meekung otoroaing. 20Teka dii', mmaikori', dii'ka deto kanirariaing diikaang masika'anta aa'na' meekung-koo. Kunsirariri tee ninka iri' ninka Tanuaang Meekung-etaing ninka. 21Otori te' otoriai Kumponing bakaang piaae kuung deempui otoinoo'ke, banainge nemperi tee Domang-anta niikaang Ovoring Jiisuu' Karistoo' piaarurira domaang oparavauka'noo' basi-antaruriaina'. 22Teing daang-koong nau-antanuka taaravaarima papaaravarimaing piaaverereri onou koong-antavererimaatoai. 23Nii'ning tampa' taararaariaining namu'ke mosianung-koong nta'keta batusi'erererima domang-antavereriai. Ee'noko napo' nii'ning Ovoring-anko bokuereriai tampa' nkoverererima, teka biikaang aarumo mono bakaang pia siona'koo maarerori pinka'dariaing, baaro'duriko teing pina' nari' dua'dari'neenga. 24Enang si'noora'dampima tee Piikonara bakaang tanata-koo napo' si'damping dii' dua'dariaroo'naang. Ee'noko teie dii' kiiroraa'antarurira bakanoo' osi meenasi-po'noo' basi-antaruriai doturotu ninka. 25Tee tee narung Kumponing masikung, niikaang domang-anta, tee ninka niikaang Ovoring Jiisuu' Karistoo' ninka. Otoaing tee meenasi tee Kumponing-koo, tee daurarong anka-ankang deempari, teing ookara kapoo' tanata tee, iri' okora' – urikamu', enang, ee'noko dama'ke ookara batei-koo. Ee', tee' nari'.

will be added

X\