James 4

1Aminankai tee tata' dovang turanturang, kare tavo'antavumaung dii'koo meu'ke? Tee aa' tee teinge diikaning karaa'ke naruna' naruna' domang manki'antaruriko kare basiaramaung. 2Dii'ke karaa'erimaing nka-koo makosiriaruma nii'ning mamairorarima dupisi'erererimaung. Napo' dii'ke nii'ning oto'evoromaing kong-koo kevi'erima tavu' tutumperimaung pari'ererii'naang teing. Teka dii'ke nkaveriaung aa'noma: nii'nang Kumponing-koo eentarariaruma. 3Ee'noko nii'nang bane nia'eriko Kumponinge aruriaung tamung karakaraa'koo oto'derurii'naang piarorimaung-koo, Kumponing dotu-antana' noru'eriaruma. 4Dii' bakei nampeesi orariaamaing-pina' makosinuka, ai' dii'ke Kumponing bakaning miru'nii'nukai kansi' bakaang aarumo karaa'erima Kumponing ninka aa'na' munte'nupoong deeng-antararimaung. Ee', baa tee naning kansi'aapening piaavuaing tee baka Kumponing ninka turani' deemparing. 5Arekee' noru'erimang? Daari Meekunge ee daang minkuvuu' aa'puma, “Tee Tanuaang Meekung Kumponinge nii'koo otoo'naang amuru'nunge tee nii' karaa'muri pia-antamurimaung Kumponing-koo narung-koo aroo'mariri o'norii'naang.”? 6Ee'noko Kumponinge tee' tampa' nkomurima teie napo' piaamuri bakanavung siong-koo pakumurimaung bakaning tampa' nkonanka-koo dau pau'ui. Tee'koo Daari Meekunge aa'pumaung, “Kumponinge turampurimaung teing baka daanganuka, ee'noko piaavuri pakuvurikoo' teing boonko noru'ariri otoromaing.” 7Tee'koo Kumponing-koo boonko otori tee Sietani' turamperimatoai dii'ankoita mmaruaina'. 8Kumponing-koo due'antarariai ee'noko tee Kumponing due'aravai dii'koo. Dii' oraka' nkorarimaing bere'darira tampa' nari' nkorarimatoaing, ee'noko dii' tunsi paakanuka noru' narung deentariri domang kiiroraa'po'nupoong otorimaatoai. 9Orarunsirarima birontarimatoai diikaang oraka' nkonanka tasi'perima. Teing-koo benkeng siperi maia'doriai. Doturotu siperima napo' mi'miinkirorimatoai. 10Ee'noko Ovoring-koo tee' amaiaa'doriko teie deto i'anturiai. 11Ee mmaikori', dii'ka oraka' minkureeria' otoai. Baa tee naning ba'maiko' oraka' minkuvuma simpe'umaunge tee boto oraka' minkuvuma simpe'umaung. Teka dake tee boto simpe'eaing deeko' da' boto siong deea', da' makotua'na' boto simpe' deeng-antararamang. 12Nii' narung daurarong~ boto amurimaung oto'memuring, ee'noko teie deeko' simpe'muriaing. Napo' teie deeko' makosi nantoong domang-anta-koo nii'noo' orari-anta-koo. Ai' da' Kumponing-pina' basi noru'darama ee tee' simpe'erimaunge nantoong? 13Arerai da' aa'pemaatomaung, “E'mung nii'noo' tane' deeko' temono-ita temono-koo mee'naang ee'noko namare' teke o'noai baavenang-koo mooni' barampama.” 14Dake aa' tane' noru'ea' dakaang otooto'koo otoaina', ai' da' tee tee-pina' kamo' batei oki'namu'koo oro'parama namu'ke paa'aramaung-pina'. 15Teka dake aa'pei dei makosi, “Ovoring bakaang pia-koo deeko' nii' domamariri aunanka nkoarampiaing.” 16Teka dii' ee' nkorarimaung, miring pankaintarima daangantarimaung. Tee tee' oro' baka daangang tee orara. 17Tee'koo tee naning aarumo koonto' noru'ui, teka nkovua' otong, tee tee oraka' nkoaramang.

will be added

X\