James 3

1Ee mmaikori', nantoong mmau' nau-antananka deeng-antarariauka', ai' dii'ke tee noru'eri otong nii' nau-antanuka teing deepo' simpe'muriaining. 2Nii'ke ookarai amutemurii'ke bekoi'ampimaung kara sikuri'ke minkuampima, ee'noko naninge karoma kapoo' orara minkuvuauka'nung deeko' tee tee naning koonto' masikung, bakaang mono ootukunung tampa' tarearamaung. 3Napo' tevoro' oosinavoro' deeko', nii'ke aini oki'navu' karang-koo dusi'ampiko tevoro'koo koinampira tee ootukunavoro' nii' piamorimana' nanukoo' tevu' beeto'ampima botoampipeu'nairue. 4Napo' aarerinanka~ ooveriai, aa'na' pankenanka, piong purinto'ke bii'urimaing, teing tee'ke, oki'navento'koo boo'e-navento'koo kaputeninukai koong-antavaario' nanaamaunge piavoromanoo'ke. 5Napo' meneng tee'ke, tee oki'naa kapoo', teka kapoo' pankeng nkovuma daangamparapeu'. Pora' pankaing tee oki'namo'keta nta'ke taivumaung. 6Tee meneng teie nta'ke. Kapoo' orarai maanto' mono-koo meu'ke otomaung. Teke otoi toko-ita doompeto ookara mono orari-antavukoo' paro'uma mosianung okora'ario'. 7Ookara kapoo'nanka amutemurii' kau' karenaumo ee'noko barennanka napo' kakanaamaunanka ee'noko pirung-koonanka teing data-anta-koo makosi; data-antavaarimaung nantoonge. 8Teka naning otoa' meneng data-antavupeu'nung, tee dooroompari oto' deeaung, orara, ee'noko boo'kooninge doparopai maanto'ke. 9Teie narunge menenge nii'ke Kumponing tee Niuma tampara tampampimaung ee'noko napo' teie narunge menenge nantoong barakosi'arampikoo', teing Kumponing-pina' oro'antavuri nkovuru'ning. 10Teka tee narung karang-eta tampa' minkuampikoo'; napo' barakosi' minkuampikoo'. Ee mmaikori', tee' makosina' deea'. 11Arekee' tee pu'anta, dinkung narinkung-eta ntong tarii' ee'noko ntong tokaa' naro'ke bakoarepeu'? 12Arekee', mmaikori', tuare-navari-koo ee mou-koong sinang bi'upeu'? Napo' mo'ming-naving-koo ee bia-namoni' teke bi'upeu'? Makotua'. Napo' pirung-eta ntong tarii' nke'koo makosi deea'. 13Baa naning matau ee'noko norukasi' dii'koo? Makosi, tampa' otoi tee bakaang matau oro'antavuaing matauna' dooroompari tampa' nkovuma. 14Teka diikaang domang-koo mamairo ee'noko pankaing-pina' noru' otoko deeko', dii' matau-po'nupoong-pina' daangantarima kara masikung daka'periauka'. 15Tee' oro' noru'nanka teing paning-eta poa', teka teing aing kansi'kooning noru'; Tanuaang Meekung-etaning deea', Sietani'ketaning. 16Ai' are' tokoo mamairo, baka-noru', ee'noko pankaing-pina' noru' oro'paravainoo'ke teke turang otong ee'noko amutemurii' oraka'nko otong. 17Teka tee temurii' noru' matau paning-etaing tutuna' tee pituari oto' deeaung, teketa mooa-anta, banainge oto', noru' barorompari oto', piaae maanto', ee'noko nii'ning sinang tampeng, siivenke'ari noru' otoaruko, ampirinung dovang nari'. 18Ee'noko teinge mooa nkonukai tee mooa-koong sinang keempaakotaa' tee koompari oto' sinang kavaavaing.

will be added

X\