James 1

1Aung ane' karavoto~ ninge Jeemisie daariamang tee Kumponing ee'noko tee Jiisuu' Karistoo'daang beekaang botovotonaa'ke. Tampa' tampamang dii'koo kivora-ita kenaanka muu' Isireeli-nupoong-koo avitoitoi purarenka'dariri otorimaing-koo. 2Ee mmaikori', ni'ninka nari' Jiisuu'koo baitorarimaing, doturoturariri otorimaatoaing tenang kapoo' avutevu' parapaarananka kune'erima. 3Ai' dii'ke tee noru'eri otong tenang diikaang masika'anta teie parapaarai paararuriko tee, da'deng apukaruu'kiria' otorimaatoai. 4Ee'noko tee' pinka'dariri otorikotaa' koonto' ima'dariai Kumponing bakaang pia narung tampa' siomperima ookusii'eri, nii'noo' siperia'. 5Dii'koo naning narung matau-koo apuka'parara tee Kumponing nia'uaing, tee ookara nantoong-koo avusiro', domang manki'oa', ee'noko teie avuaing tee. 6Teka tee baito ninka eentavaravaing noru' keekoo'arava', ai' tee keekoo'aramaung tee tee-pina' boo'a dovinge avitoitoi bereravumaung. 7- 8Teie naninge ee' noru'uai: Naning noru' kenaankai tee kapoo' nkavuarupeu' Ovoring-eta, bakaang aarumo ookara naro'ke pinka'aravaung deemparako. 9Teing ata'oinku nii'maikorori' teing dotuariai Kumponinge deto kompurimaung-koo. 10Ee'noko teing nantoong mmau'po'nupoong tee dotuariai Kumponinge doonko otoromanoo' tasi'antavuru'nung-koo, ai' teing tee-pina' kaakaa' napo' namu'ke boomaung. 11Duaa' tee uipaarii' naapu ninka daa'aramaung ee'noko baa'nanka mara'antavukoo', napo' kaakaa'nanka dua'arikoo' ee'noko tampa' oro'noo' tenang paa'arakoo'. Tee' nari' napo' teing nantoong mmau' kavo-po'nupoong paa'ariaing teing biikaning nko-nkonanka nkoaamaing. 12Biraanke-nupoong teing nantoong parapaaranankai apukaruu'antavuriaung-koo, ai' te'mung ookara parapaarananka puru'aara teing tee biikaang moo' nkasiiaavaing, tee domang-anta Kumponinge maraka-antavuru'nung teing-koo tee pankaruntoompaamaing-koo. 13Tenang naninge parapaara kune'uma tosiarama aa'puauka', “Kumponinge orara nko-koo paaramumaang,” ai' naninge Kumponing orara nko-koo paaravuarupeu' ee'noko teie baka naning tee' paaravuarupeu'. 14Teka tee nantoonge kantena' parapaara kune'aako teie biikaang karaa' orarai narunge teing tosivurima barampurikoo' orara aarumo nko-koo. 15Teka tee karaa' domang-koo nare'ukotaa' oraka'nko basi-antavuu'naang, ee'noko teketa otokotaa' orara aarumo panka'parara boo' basiaraa'naang. 16Ee mmaikori' piaarampimaing, tarerariai dii'ka tosirarima nii'na' noru'eri'neeng, ai' Kumponing tee orara nko-koo paaramuriaung. 17Ookara kapoo' paning-eta pomaing teing tampeng naing, ee'noko ookara avuavu'nanka tampeng masikeng teing Kumponinge nii'koo depeto po'antavumaing tee Ookara Araka Okonara deempario'. Tee aampari'arava' araka narung naumurimaung. Mutaananameng tee-koo otoa'. 18Teie nii' baurukaa' deeng-antamuru' bakaang kara masikung taara-antamurira. Baka piavora tee' nkomuru' nii' tutuna'nupoong o'norii'naang ookara bakaning nkovuru'nanka-koo. 19Ee mmaikori' piaarampimaing, tee aung noru'eriaing: Ookara naruna' naruna' namu'ke kara taaraverimaatoai, teka maku'koo ee'noko iira-koo iri'naruntaria' otoai, 20ai' naning bakaang iirai aarumo koonto' Kumponing bakaang narung tavo'antavuaung. 21Tee'koo teing aing aa'ning enang siperiai: aarumo ku'mi' ee'noko domang orarai maanto'ui oto'; ee'noko tee kara Kumponing bakaang dii'koo keempuko baroromperira aroo'eriai, tee tenaarei dii' domang-anta-koo makosinaare. 22Tee kara tamung taaraverima tosirariauka', teka taaraverima nkoverimatoai. 23- 24Ai' dii'ke ampa'dori siomperiaung deeko' dii' teing tee-pina' naning bakaang oing oorara-koo ooarama tenkenura namu'ke ampa'opeu' bakaang oing oro'oro'na'. 25Teka tee Kumponing bakaang kara koonto' unaa-anta-koong, ee'noko baa tee naning tee kara kuung oovumatoaing kapoo' nauvumaung nko-koo ampa'oa', teie tee bakaang nko-nko-koo kuunge biraanke nkavuaing. 26Naning dootuu'nung tamparama bakaang karang makosina' minkuvuaung tee, bakaang domang tosi-antavarapeu' ee'noko bakaang dootuu' daange. 27Tee dootuu'koong aarumo kiiroraa' masikung ee'noko pituaravaung Niuma Kumponing-koo uro'kanoo'ke tee aung: Naning maantuaara' ee'noko teing naaroonku beero'urima pakuvurimatoai ee'noko naning baka tanatavari otoai kansi' bakaang aarumo orari-antavu'neeng-koo.

will be added

X\