Hebrews 9

1Enang tee tutuna'nung kara naroong-anta tee' nari' teing bakaning aarumonanka uu'aa'nanka otorong dootuu'koo sionumpo', ee'noko bakanava meekava a'nava kansi'koonava tee' otong, paara-anta-koonava. 2Teva ee'nava kaandesi-koo kaniau'nava kevarora-po'nava. Aivitunavaro-koo aing aa'ning otoroko': araka-pante', ee'noko batanang, ee'noko berete' tee batanang-koo dau otoko. Tevaro ee'navaro Meekavaro tampaako'navaro. 3Napo' kenaanka-nung ku'nung kuunavaro-koong otoko' kaandesi-koong da'nava, te' Meepo'keta Aa'na' Meepo' tampaako'noo'. 4Tevaro-koo batanang kooroi nkonii' ii tampa' nuuraa' paro'antaroma otoko' ee'noko tee bokita meekung kara naroong-anta-koong otoko' kooroi daka'nii' ookamenta-ita. Ee'noko tee bokita meekung-koo kuung aing aa'ning otoroko: utau kooro-koo ta'nanii', kuunge tee taamang maana' paning-etaing otoing; ee'noko napo' teruung Eeroni bakanaruung donsi'naruung puaravura sinampuu'naruung, ee'noko teing bentaning kapang-kooning kara naroong-anta daarinii' nari' otoko. 5Ee'noko tee-koo bokita-koong-koo da'nava-koo daue ereng sinki'di'aako' nantoong biikaang oraka' nkonanka kui-koo. Ee'noko seraping-ka kenaanka ta'nanii'ka teke daue donkonuresi otoreko', kupa'ke toompeeresi Kumponing bakaang meenasi oro'antavurema. Aing-koo nii'ke kapoo' ookara pukeampiri enang minkuampiarupeu'. 6Teva meekava tee' neriau'noo'keta teing piristi'nanka tee aivitunavaro-koo doong kante tumpariko' biikaang nko-nko dootuu'koong nkoaava'naang. 7Teka te' kuunavaro tamung tung-koo bakei meepo', piristi' pankaing narung deeko' tumparapeu', namare'koo namu'ke, napo' ereng nkavui deeko' tumparapeu' aa'ning-koo boontunamparaa'naang: teie baka ee'noko nantoonge noru'aava' oraka' nkoaako'ning-koo. 8Tee-koo aarumo-koo Tanuaang Meekunge naumurimaung tee taung kunsimariko Kumponinge tampa' noru'murira taaramuripeu'navung mme' sira'parava' tutuna'nung dootuu' donkonui otoko. 9Tevaro aivitunavaro tevaro taa'ni'anta-navaro teing aing doong-koo aung tutuna'nung kara naroong-antai kuung deempui otoining-koo aa'ning nkoaako'ning-koo avuavu' ee'noko boontunang; 10Teie temurii' botoi tee naning dootuu'aramaung bakaang pankaruntoong dupevui kiiroraa'antavuarupeu', aa'nung narunge taamang ee'noko ntong nai, amutemurii' aarumo ntonge meeka'anta, ee'noko nii'ning napo' mono-aapening aarumonanka kompui otoko' bera tenang teie nerakung kara naroong-antai urikung paari-antavuu'noo'ke basi. 11Teka tee Karistoo', tee Pako'pari'nii', tee tero pou' piristi' pankaing deempari kapoo'nanka tampenanka Kumponinge maraka-antavuru'ning nii' oko-anta-koo. Teketa tee dootuu'nava pankava masikava-koo dupe-antanii'nava paning-koo otoinava-koo koinuu' naninge birenge kanivuaruu'nava-koo, aa'nava aung kansi' nkovuu'na'keta oovuna' masika' nkonii'navai. 12Ee'noko koinuma naro'ka bakevui Meepo'keta Aa'na' Meepo' tumparu' ereng mee'mee'koong ee'noko boromaka'koong ninka deea', teka baka bakaang ereng nkavui bera teie moo'muru' o'paa'na'. 13Urikung dootuu'koo tee aing aa'ning nkoaama nantoong kiiroraa'antavaarima mono-aapening boto toto'paako'ning-koo: mee'mee'koong ee'noko boromaka'koong erenge ee'noko boromaka' kampianu-koo bio' tai-antavaako'nu-koonge sipunge teinge piarau'aariko' nantoong. 14Teka tee ereng Karistoo'koong tee bakei dau basinoo' purinto'. Tee Tanuaang Meekung ookara batei-koo otomaung bakaang iri' ninka Karistoo' tee baka avaru' Kumponing-koo, ee'noko kapoo' orara tee-koo otoa'. Tee'koo teie bakaang erenge tee deto basinoo' niikaang pankaruntoong kiiroraa'antamurimaung ee'noko boo'aapenung nko-nko-ita unaa-antamurikoo' Kumponing domantoo' makosina' dootuu'ampii'naang. 15Tee'koo Karistoo' tee meu'nung tee nerakung kara naroong-anta pinka'anta-koong, ee'noko tee temurii' naning deempario' nantoong teing Kumponinge miru'uru'ninge tee barenku maraka-antavuru'nung otooto' oparavauka'nung nkavaavaing, ai' tenang Karistoo' boo'paru'nang teie moo'uru'nung oraka' nkonanka-ita tutuna'nung kara naroong-anta siompai nkoariko'ning-eta. 16Tenang naning narunge bakaang kapoo'nanka nii'nung oko-antavuu'naang tampura tee booko, teie tee kara naroong-anta minkuvupeu', teka tee kara purinto' otoa' tee naning booaruko. 17Ai' temurii' kara nare'uarupeu' tenang tee naning karou'nung domampari otoko. Teka tee kara minkuvuu'nung boo'parako deeko' makotupeu'. 18Tee-pina' napo' tutuna'nung kara naroong-anta nare'ui otoaruko' ereng otoaruko. 19Tenang ookara botonanka Moosesie siraka'antavuu'nang ookara nantoong-koo teie tee boromaka' kampia-nanka-koong ee'noko mee'mee'nanka-koong ereng nkavuu' ee'noko ntong nari'; 20Ee'noko sipisipi'koong dapo urung koi'nave-koo marununave-koo dai'ura duu'pura mira'uu' ookeng-koo, boto-koong kara daarinii'nane' ee'noko nantoong-koo dau, aa'puma, “Aung tee ereng kara nare'anta-koong Kumponinge botorurima dii' naroong-antavuing.” 21Ee'noko napo' tee' nari' mira'uu' teie erenge ookara kapoo'nanka teva kaandesinava ee'noko teing dootuu'arima kompaako'ning nari'. 22Ee', masika', boto-koo kuunge daping ookara kapoo'nanka tee kiiroraa'antavaako' erenge, ee'noko tee' nari' ereng tuuvuaruko deeko' tee boto toto'nanka tonta'uarupeu'. 23Tenang teva meekava kaandesi-koonava daate'au'nang tee teing kapoo'nanka dootuu'kooning tee' makosina' kiiroraa'antavai meeka'antavaaru'ning tamung uu'aa'pina' otoroi teing-koo kapoo' masikeng-koo paning-kooning-koo. Teka Karistoo'ke te' masipo' Kumponing ninka naro'mariainoo' paning-koo daate'uma tee bakaang erenge meeka'anta-koo makosi teie deto basina' aa'na' tamparai. 24Ai' Karistoo' tee pava meekava nantoonge kaninii'nava-koo tumparava' tamung uu'aa' makosinava, teka paning masipo' tumparu', teke ee'noo'ke enang donkonui otong Kumponing-koo uro'kanoo'ke nii' pakumurima. 25Teke tee amutemu'ke boontunamparaa'naang tumparava' tee' piristi'nanka pankenanka mare' kante meekava-koo tumpariko'na' ereng oovunara bii'ka-koong deeaung avaava'naang. 26Tee' ee'na' boontunamparapeu'nung dei amutemu'ke sisikeera kune'umaatopeu' kansi' pupu'aru'noo'keta, teka enang bateinang-nanka-koo asiranoo'ke namu'ke oro'paru' ookutunung bateinang daka'pui tee oraka' nkonanka tonta'uu'naang baka boontunamparara. 27Kumponinge toomo aung: Nantoong tee namu'ke booroaing ee'noko tee-koo dama'due koosinampariaing. 28Tee'koo napo' Karistoo' teie, namu'ke boontunamparu' nantoong karinga biikaang oraka' nkonanka nkavuu'naang, ee'noko kemu'kana' poaing nantoong biikaang oraka' nkonanka napo' nka-koo deea', teka dupe-antavui domampurii'naang teing nantoong tee batei nempai otoroaining.

will be added

X\