Hebrews 8

1Enang minkuampirina'koong okora'noo' aung: Nii' tee tee' oro' piristi' pankaing oto'memuring, tee tampavine-koo ba'nanui otomaung teke Ovoring Pankaing ba'nanui tarearamanoo'ke paning-koo. 2Tee teke piristi' deempari tanatavaramaung teke meepo'ke dootuu'doma masipo'ke, naninge birenge donkong-antavua', Ovoringe baka nkovuu'noo' te'. 3Ookara piristi'nanka pankeng teing tee avuavu'nanka ee'noko boontunang nko-koo miru'aariko'ning, tee'koo bakei kapoo' nii'nung avuavu' otong teie Karistoo'ke piristi' pankaing deempari boontunampuaining. 4Aung-koo kansi'koo anke oto'koo dei tee piristi' deempari otoarupeu' bakei, nii'ning nii'namuu'kooning temu'keta otoromaing otoroko botoi miru'urio' avuavu' tavo'aamaing. 5Teing tee tamung uu'aa'noo'koo tanatavari dootuu'arimaung, paning-koo otoinoo' meepo' paara-antanoo'koo. Ai' tenang teie Moosesie teva meekava kaandesi-koonava kani-koo daruvuu'nang tee Kumponinge nau-antavuu' nkovuaina' aa'puma, “Ooveko dake ookara kapoo'nanka tee biikaang paaranang siompei nkoveaing tero naurantu'na' teka miinani-koo.” 6Teka masika'pari otoina'koo ee' otong, Kumponinge dama'nung kara naroong-anta bakei tampa' nkovuu' maraka-anta aa'na' tampenge dai'ura temu'nung boto ee'noko bakaning maraka-anta puru'uio', ee'noko Karistoo' tee kara naroong-anta-koong meu'nung deemparitaa' bakaang nko-nko paku-koong tee' nari' dau basinoo' aa'na' tampara temu'ning piristi' pankenanka kansi'kooning biikaang nko-nko puru'uitaa'. 7Tee tutuna'nung kara naroong-anta koonto' makosi dei tee kenaanka-nung oto'koong doona otoarupeu'. 8Teka teie makosi deeaung tampuu' Daari Meekung-koo aa'puu'noo'ka, “Ovoringe aa'pumaung: Nii'na'mung doong tavo'kuko ninge nerakung kara naroong-anta sipevorompaing Isireeli-nupoong-koo ee'noko Judia'nupoong-koo. 9Tee kara naroong-anta nerakung tee-pina' kara naroong-anta biikakatauro-koo nkoantu'nung-pina' deea' tenang ninge nkaang birenge baramparantu'nang Iisipi'nameensi'keta, ai' teinge tee kara sipevorontu'nung danto nari' siompaavaruu'nung-koo ning noru' o'noaruu' teing-koo. 10Aung tee kara naroong-anta ninge donkompama'naang otomaung teing-koo ookara Isireeli ba'dompenkuri-koo, Isireeli-nupoong-koo ee'noko Judia'nupoong-koo, doong urikeng tankinuko, aa'noaing, nkaang botonanka biikaang onou-koo sipampai biikaang domang-koo daariamira, ee'noko ning tee biikaang Kumponing o'noaing ee'noko teing nkaning nantoong otoroai. 11Ee'noko teinge napo' bii'maikorori' ee'noko biira'mainkaang nau-antavaariauka' ning-koo aa'paama, ‘Ovoring-koo barerariai,’ ai' ookarai tee ning noru'mai otoroaing oki'nareka'keta bera pankenanka-koo basie. 12Ai' ninge tee teing piaavaramira biikaang oraka' nkonanka-koo ampa'mora norunoru'arampaing napo'. Ovoringe tee'pumaang.” 13Teie nerakung kara naroong-anta minkuvuma tee tee tutuna'nung urika'antavuu'. Ee'noko tee urikung iri' otoarura due'ka paa'araa'naang.

will be added

X\