Hebrews 6

1Enang tee Kumponing bakaang kara-koo okora'noo' Karistoo' tero Pako'pari'nii' noru'koong tee' nari' putu'ampiauka', teka napo' naunaue kato meriaing Karistoo'koo panka'maririning-pina'. Pava-koo natuku narung amutemu'ke unampampima keempampiauka' temurii' narung kara minkuampima. Temu'keta noru'eru' tee temurii' kara dii' oraka' nkonanka-ita boo'aapening-eta orarunsirarira bere'dariaing-koong. Napo' dii'ke noru'eru' tee Kumponing masika'antaveriaina'. 2Nii'ke tee temu'keta amutemurii' aarumo meeka'anta-koong nau-antararampiru', ee'noko bireng pante'. Dii'ke napo' noru'eri otong tee boo'keta daa' ee'noko tee simpe'murira miru'muriko doong kante tee' nari' o'norimaatoaina'. 3Tee' ee'na' tee Kumponinge taura'muriko kato nenke'ansitaa' nau-antarampiaing. 4Enang napo' tee berevere' unaunampampima minkuampiaroo'naang, ai' teing nantoong tutung araka-koo otorokotaa' dama'du toroariko napo' naninge bere'anta-koo makotua', aa'ning paning-etaing avuavu' mantompau' Tanuaang Meekung nari' kompaara. 5Ee'noko teinge mantompau' tee Kumponing bakaang kara-koo tarii'noo' ee'noko napo' mantompau' teing iri'nanka Kumponinge bakaning avurimaung ovorimpariri otoroaina'. 6Teing ee'ning napo' bei'bei'ariko naninge napo' bere'anta-koo makotua' teing. Tee' nkoarima Kumponing bauring aa'barata'koo napo' bii'ka taakavaamaung-pina' nkoaamaung sirapo'ka nantoonge poore'koo. 7Kansi'ke tee apo'uko ntong kompura keenkeenanka nantoonge keempaamaing piavoromana' tampa' du'antavuko Kumponinge manee-antavukoo'. 8Teka teie kansi'ke too'murintaa' dovang tonto du'antavuko tee binaa'omaung, ee'noko barakosi'koo makosi. Botue nta'koo tai-anta-koong tee. 9Teka ee maikori', bane tee' karoma nau-antaramping ninge dii' ee'ning masika'antarampiri otong tee dii' teing-pina' deea', teka domaang-aape-navung-koo otoring. 10Kumponing tee koonto'na' nari' nko, ee'noko diikaang nko-nko ee'noko piaa tamung doonko oovuauka'nung, tee ee'nung piaa Kumponing-koo oro'antaverimaung bakaning pakuererima temu'keta e'mung doong-koo basinoo'koo. 11Ee'noko dii' tee' nari' aa'na' nkorarii'naang piamorimang bera tee kapoo' dii'ke nemperimaung asi'noo'ka dii'koo dupeari taa'ni'poainoo'ke basi. 12Tee' nau-antarampimang dii' konteroriauka'na', teka siompereriai teing biikaang baito ninka iri' o'paa' ninka barenku maraka-antavuru'nanka okovurimaing. 13Tee' Kumponinge Eebaraami' maraka-antavuu'na' ee'noko siompuu'na' ooveriaing tee' daari meekung-koo naumurimana' ee', “Bakei biraankeransio' da' berentaramatoaing.” 14Tenang tee maraka-anta Eebaraami'koo nkovuu'nang, baka-koo masika' deto tamparu'nung naning tee masika' deto tamparapeu'nung otoaruko tee-koo dau basi. 15Ee'noko Eebaraami' tenaare-koo e'manui iri' oparava' teka mii'kuitaa' nemparu', ee'noko tee maraka-antavuu'nung biraanke nkavuu'. 16Nantoong tee tee-koo pankaing-koo teing-koo dau basi-koo masika' deto tamparimaung, ee'noko tenang-eta deto kapoo' minkuaavarupeu' tee kara pinka'nii' noru'aitaa'. 17Tee'koo masika' deto tampuma Kumponinge bakaang maraka-anta pinka'uu'nung nii'ke tee biraanke okomuriaininge ee' tasi'pampii'naang: bakaang kara maraka-antamuru'na' paariaravauka'nung. 18Tee tee Kumponinge kapoo' kenaanka aampari'koo makosi deeaing ninka bakaang kara pinka'uu'nung aa'ning ninka maraka-anta ee'noko masika' deto, teing ee'ning minkuvuma tosiaravarupeu'ning. Teing ee'ning-koo nii' Kumponing-koo nee'mariri o'norimaing aa'na' domang dontomuri pinka'mariri o'noring tee kapoo' naumurio' nempampimaung noru'ampiri. 19Tee niikaang nooruupi dama' domang-antamuriaing-koong tee tankanung-pina' ivepo' masipo' i'ma'ari otomaung, diiri'koo makotua', ai' narunge tee koonto' paning-koo kuunavaro-koo meepo' masipo' tumparara tee maraka-anta teka pinka'uu'nung; 20Tee ee'nara Jiisuu' nii'koo uro'ke beu'nung pakumurii'naang piristi' deto basi deemparara Melkesedek bakana' siompui ookara batei-koo tee' nari' otoo'naang.

will be added

X\