IIBURU 4

1Tee'koo amorompiri pinka'mariaing dii'koo nii'ning asiranoo'ke Kumponinge aa'puri'neenga, “Dii' bekoi'daririning, nkanoo' uaaroma tuntariauka'ning.” Ai' teie maraka-antavari nii' naumurimaung bakanoo' uaaroma tung-koo tero urikupoong nauvuru'na' nari'. 2Aa'noko tee tampara doorenang uaaroma tumariaing-koong tee nii'koo pou' tee' teing-koo pou'na', teka teie doorenange teinge taaravau'nunge teing pakuvuria' masika'antavaavarura pinka'aavaruio' domang-koo. 3Nii' ee'ning tee masika'antavampimaing teing te' uaaroma tung-koo makotumpirining, ai' nii' bekoi'maria' teing-pina' daari meekung-koo aa'puru'ning-pina', “Iiramora marakamarama aa'pantu', ‘Teing nkanoo' uaaroma bakei tumpariauka'ning.’” Enang anaarei tee te' uaaroma masika' nari' otomatomana' tasi'antamuri otong ai' otoaruko-pina' tee' minkuvua', teka otoko, temu'keta, kansi' pupu'ura bakevuu'na'mung-eta nari' tung-antavuripeu'. 4Noru'ampiri otong, ai' te'mung uaana'mung tutuna'na'mung ~ke'munta-taa-na'mung daari meekunge naumurimana'mung aa'puma, “Kumponing tee ~ke'munta-taa-na'mung uaavou'nung ookara nkovuu'ning-eta.” 5Ee'noko tenaare tutung minkuansinaare anka masikee-antavui otong daari meekung-koo aa'pumanoo'ke, “Teing nkanoo' uaaroma bakei tumpariauka'ning.” 6Teing temu'navarang doorenang tampara tamung taaravau'ning teing te' uaaroma tumpariaruu'ning masika'antavaavarura. Teka te' uaaroma mme' makotui otong nii'ning tung-koo. 7Ai' dama'ke Deevita' karantavuma~ Kumponinge nii'na'mung bateina'mung uaana' mung miru'uu' “e'mung” tampuma, Moosesi tero nauvuu'na' siompui. Anaare ee'naare tero minkuansinaare daari meekung-koo ee' otoinoo'ka, “E'mung bakaang aurong taaraverira domang kapantoriauka'.” 8Te' ee'noo' uaaroma okora' masipo' teie minkuvuu'noo' te' kansi' Keenani-navora' deea', Josiua'ke be'antavuru'noo'. Tee' miru'ari dei dama'ke pankaroompuio' Kumponinge napo' tee' nari' minkuvuarupeu' “e'mung” tovang minkuvuma. 9Tee tee enang sira'pari otong Kumponing bakaning teing makosi uaavoroaining tee' Kumponing te'mung ~ke'munta-taa-na'mung uaavou'na'. 10Ai' baa tee Kumponing bakanoo' uaaroma tumparapeu'nung tee baka bakaang nko-nko nko-koo bakearapeu'nung-pina' otong tee' nari' Kumponinge ookara kapoo' nkovura bakearu'na'. 11Aia', tee'koo niikaang domang-eta paaramariaing te' uaaroma tung-koo nii'koo narunge teing urikupoong taarapiikavariko'na' siompurira tee' nari' dua'ara'neeng. 12Ai' tee Kumponing bakaang kara tee domaang-po'nung, tanteari oto', aa'na' irinto' tee bainatu ookamenta irinii' divu'ui. Naning tupu'ui meu' ke'me'ura sira'pupeu' aa'ning: tanuaanoo', uraanoo', koo' be'nu'nairu ee'noko ma'ma'nairu. Nantoong biikaning onounanka-koo kuunge otoina' masika' tasi'antaevurikoo' maroaamana' nari'. 13Ee'noko Kumponinge oo-koo kapoo' baku'arapeu'nung otoa', teka ookara kapoo'nanka nkovuru'ning sira'pariri tavempari otorong bakaang duta-koo, tee-koo simpe'muriko maku'ampiaing-koo. 14Tee'koo niikaang domang danto nari' pinka'mariri o'noriaing niikaang masika'anta-koo sira'marimaung-koo, ai' nii' teing pankaing piristi' oto'memuring paninanka aarempui beu'nung Kumponing-koo due', tee ee'nara Jiisuu', tee Kumponing Bauring. 15Tee tee napo' nii' niikaning aruaru'nanka-koo nari' dee'omaung bakei, ai' tee ee'nara nii'pina' nari' ookutunairu-koo paaranii', teka dua'arava'. 16Enang tee tampara piristi' pankaing otoko to'biimariri kunsimarima due'mariaing te' Kumponing bakanoo' ovorimpari ba'nani'doma, pakupaku tamung nkaroma deempario' piaamurira avusiro'ari pakumuriaina' makotumpiaruko.


Copyright
Learn More

will be added

X\