Hebrews 3

1Ee mmaikori', paning-eta miru'murio' nari' meeka'marimaing, deto noru'ampiaing tee Jiisuu', ee'nara Kumponinge kara oko-antavura botovuio' pou'nung ee'noko tee tee piristi' pankaing, tee ee'nara nii'ke sirakura' masikee-antavampimaung. 2Tee tee Jiisuu' mataa'iari otoko' tee-koo tee botovuu'nung-koo tee' ee'na' nari' Moosesi mataa'iari otoko' Kumponing bakanarempo' ookutunarempo' tanatavurima. 3Teka Jiisuu' baru' aa'na' makosi tampuu' miring pankaing nka-koo, nerang-po'nung, Moosesi bakaang miring puru'ui. Tee' nari' aa'nomana' narung nareempo' okovui otomaung tereempo'koo pankainge. 4Muu' kante tee', namuu'na' nii'ning nantoong okovoroi otorong, teka teing ookeng okovenung tee Kumponing narung. 5Teka Moosesi tee Kumponing bakanamuiaang-koo botovotonaa' deempari kara-nau-koo mataa'iari nauvuriko' tee naning dama'ke Kumponinge sira'puainung domampuriaing teing minkuvuma. 6Teka tee Karistoo' tee Kumponing bakanamuiaang-koo mataa'iaru' Kumponing bauring deempari okovui, ee'noko nii' ee'ning teing bakanamuiaang-kooning deemariri o'noring nemariri pinka'mariri o'noriaing deeko', dotumariri amaiaa'moria' o'noriaing toroarara domamuriainoo'koo. 7Tee'koo Tanuaang Meekunge minkuvumana' nari' aa'dampimang, 8“E'mung bakaang aurong taaraverira domang kapantoriauka' teinge diikakatauroi nkoarima ereanamaako'na'. Tenang Iisipi'keta teke mee'bora' sirakamaa'ke baramparanko'nang Keenang-navora'koo unaavoroaina' noru'ama, bane ninge nkaang nko-nko purinto'po'ninge pakuaranko ooaitaa', teka masika'antamaavaruko'; 9Teinge bakei ereanamaako' karenaumo kivora mare'koo teke pooariri. 10Tee' nkoarima iirang-antamaio' aa'pantu', ‘Teing ookara doong-koo biikaang domang tee pooaramaung. Nkaang aarumo noru'aavarukoo'.’ 11Tee' noru'ama aa'na' iiramorai'nange marakamarama aa'pantu', ‘Teing teing nkanoo' uaaroma tumpariauka'ning.’” 12Tee'koo dii' mmaikori' aa'dampimang, tanatarariaing dii' dii'ka oraka' nkorari'neeng, tee Domang-anta Kumponinge Tero Pako'pari'nii' nii' taremuriainoo'koo masika'antaveriaruma dua'dari'neeng teieta Kumponing domantoo' iri'po'nung-eta. 13Teka doona mme' otoko tautaureeriaing ookara doong-koo “e'mung” tang-koo makosining-koo, dii'koo narung orara-koonge noru'ke tosivuma domang kapang-antavu'neenga. 14Ai' nii' Karistoo'koo, Tee Pako'pari'nii'koo, nari' tampa' noru'mariri o'noriaining deeko' bera botu basinoo'ke, nii' teing tee ninka nari' biraankemariri manta'nuka o'noriaing. Teka enang batei aung nii' pinka'mariri o'noriainang. Ampa'moriauka'nung Kumponinge tautaumurima ee' daarivuu'na', 15“E'mung bakaang aurong taaraverira domang kapantoriauka' teinge diikakatauroi nkoarima bei'bei'maako'na'.” 16Ee'noko teing baata nantoong ninge minkuaramatomaing Kumponing bakaang aurong taaravau'ning teie teing karavuriko teketa tee teinge ereanavaako'? Tee aa' teinge ee'ninge Iisipi'keta tenkenau'ninge Moosesi siompai. 17Ee'noko teing baata Kumponing iirang-antavaako'ning teing-koo ookara mare' karenaumo kivora-koo kuunge? Tee aa' teinge ee'ninge oraka'nko nkoau'nung ee'noko maku'koo boo'pariru' teka mee'bora' sirakamaa'koo. 18Ee'noko teing baatai Kumponinge marakavarama bakanoo' uaaroma tumpariaroo' naang tampuru'ning? Tee aa' teing ee'ning tee meumpaavaruko'ning nauvurima tee' minkuvuu'nung. 19Tee'koo enang nii'ke tasi'pampiring teing bakanoo' uaaroma tung-koo taura'puriaruu'ning masika'antavaavaruio'.

will be added

X\