Hebrews 2

1Enang tee Bauring aa'na' pankaing deempari otoko ooampima tee' nari' aa'na' baroromariai bakaang kara-koo ampankeena'mori sipampi'neenga. 2Ooveriko tee doorenang koosinunankai Moosesi nauau'naare tee purinto'po'naare ee'noko ookara boto toto'paamainge tee moo' nkavaavaing maku'koo. 3Enang Ovoring Bauringe ee'narai bakei tampa' domamuriaina' dooremuriko arekee' nii'ke tee mosianung baari'ampipeu' bakaang kara sipampiri? Bakei makotua'! Teie ee'narai tutung nantoong daankivuriko'; 4Ee'noko teketa teie daankivuriko koonto' taaravau'ninge dama'ke napo' tampa' tasi'antamaaru' Kumponinge masikee-antavuio' aing aa'ning ninka: taa'ni'antananka, ta'nimpaarii'nanka, amutemurii' nko-nko purinto'nanka, ee'noko Tanuaang Meekung-etaing avuavu'nanka tankaampuu'ning teie piavou'na'. Tee tee Jiisuu'nung doorenang tampara ookara-koo dau basinoo'ka baroromperiaing. 5Napo' nii'nung kapoo' otong tasi'antamuriaing Jiisuu' tampa' taaravampii'naang, ai' Kumponinge tee otooto' dama'nung nii'ke minkuampimaung koosinunankai tare-koo barevuria'. 6Tee' nari' Daari Meekunge nii'noo'ka sira'pui otong, naninge aa'puu'noo'ka, “Bakei tokoona'koo dake teing nantoong tamung kansi'nupoong noru'eri tanataverimaung! 7Dake teing tamung oki'naa batei-koo depeto koosinunanka-ita boong sipering, teketa dake napo' teing deto pankaing-antaveru' araka ninka neramperi, ookara kapoo'nanka teing-koo kau'koo boonavete-koo sipera teinge tareaava'naang.” 8Enang tee ookara kapoo'nanka nii'ke tareampii'naang tampura nii'nung kapoo' nii'noo' tonta'ua' nii' niikaang tare-ita. A'noo' tee enang otoina' ookara kapoo' niikaang tare-koo kuunge mme' baru' ooampia'. 9Teka nii'ke Jiisuu' ooampiri otong tee ee'nara oki'naa batei-koo depeto sipuu'nung koosinunanka-koo boong, teketa enang teie boo' tora'puio' Kumponinge tee deto pankaing-antavura araka ninka nerampuu'. Ee', Kumponinge aa'na' avusiro'ari Jiisuu' boo' mantong-antavuu' nii'koo ookara-koo kansi'koo-nupoong-koo. 10Kumponinge tee baurukaa' kura'nari' doompeto paning-koo tampa' otoroainoo' tavo'urii'naang miru'urima teie Jiisuu' tutung baike kune'antavura makosi-antavuu' teing moo'uriaining biikaang urantanara deempari otoo'naang. Tee tee tee' makosina' teie Jiisuu'ke dupe-anta-koo ai' Kumponinge tero ookara kapoo' nkovuu'nunge miru'uu'na'. 11Enang tee ee'nara tee meeka'anta-nko ee'noko teing teie meeka'antanii'nuka tee narung oko'bosi' oto'evorong. Tee'koo tee maia'oa' teie teing baara'mainkaang tang-koo, daari meekunge minkuvuma aa'pumanoo'koo, 12“Ninge daankiampaing dakaang miring teing-koo mmaikori'koo, ee'noko teing dootuu'koo naro'arimaing-koo meu'ke ninge daangantampaing da'.” 13Ee'noko nii'noo'ke napo' aa'puu', “Ning Kumponing-koo noru' e'manansi o'noaing.” Ee'noko nii'noo'ke napo' ee' minkuvui otong, “Ning aung ee'nara, ee'noko teing toirekaa' ainge ning Kumponinge amuu'ning.” 14Aa'noko nii' teing baurukaa' ookara bio' dovang ereng-po'nupoong deemariko tee tee' nari' nii'pina' oro' deemparu' bakaang boo'ke Sietani' bake-antavui pesi'uu'naang, tee ee'nara boo'anta-koong iri' kompui otomaung, 15ee'noko nii' domaang isikung amurima unaa-antamurii'naang boo'koo amorompima temu'keta dai'mariri o'noriko'ning. 16Tasi'pari otong koosinunanka paku-koo tee' nkoarava' teka teing Eebaraami' ba'dompenku paku-koo tee' nkoaru'nung. 17Tee'koo nii'na' makotua', teka tee teing-pina' baara'mainkaang-pina' masika' Kumponinge nkovuu' tee piristi' tampara deto basi otoo'naang. Aa'nung piaa-po'nunge ee'noko mataa'i Kumponing bakaang pia siompario', ee'noko napo' Kumponing bakaang iira o'anta-koonge nantoong biikaang oraka' nkonanka-koo. 18Aa'nou'noo'koo teie baike ee'noko paara-anta mantompuu', tee'koo teie nii'ning pakuvuripeu' paara-anta kune'aavaining.

will be added

X\