Hebrews 13

1Dii' Karistoo'koo namaia' deentariri tee' nari' piaareeri otorimaatoai. 2Nantoong damisimainku diikanairu-koo poroko bau'ererima teke aasi'anta-koo ampa'doriauka' ee' noru'erima nii'ninge tee tee' nkoarima koosinunanka bau'aariko' noru'aava'. 3Teing kiimataroma otoroining domang dontong-anta-koo norunoru'ererimaatoai, dii' teing ninka nari' kiimatanava'koo otorining-pina' noru'darima. Ee'noko napo' teing nii'ninge oraka' nkoaarimaing norunoru'ererimaatoai, dii' teing ninka narung mono-kooning tasi'dariri. 4Nampeesi tee tampara, oraka' minku-koong deea'. Tee' nari' tampa' tanatavampiaing toto'pampia', ai' Kumponinge tee kiimatavuriaing teing bakiaa'ke otoromaing ee'noko nampeesi orariaakoo'. 5Oko'oko-koong aarumo dimpa'eri otomatoai ee'noko teing kapoo' ee'ning komperimaing dii'koo makosining-pina' noru'erimatoai, ai' Kumponinge tee aa'puu'nung, “Ninge tee bakei si'dampiauka'. Ookara batei-koo pakurampiri tee' nari' o'nomatoaing.” 6Tee'koo tasi'pampiri naruna' naruna' aa'pampimaung, “Ovoring tee nkaang pakupaku, ning amorompauka', bane baie arekee' nkomuko.” 7Teing diikaning urantananka Kumponing bakaang kara dii' nauraariko'ning napo' noru'ereriai. Jiisuu'koo ima'ariri biikaang domang tampa' botu basiariru'na' norunoru'erira tee' nari' teinge masika'antavaako'na' paaraveri otoriai. 8Jiisuu' Karistoo' bakaang aarumo tee tee' nari' otomatoaing, aa'noko ke'maaki', e'mung, ee'noko ookara doong-koo. 9Tee'koo amutemurii' dootuu'koong karai masikeng deeainge avitoitoi baranturiauka', taamang tovang-kooninge. Dii' Kumponing bakaang piaae diikaang domang puring-anta-koo makosi, teinge taamang-koong botonankai nantoonge minkuaamainge deea'. Nantoong teing siompaamaing pakuvuriarukoo'. 10Nii' teing paning-koo meepo' oto'memuring Kumponinge piaamuri otoko pakupaku nkavampimanoo' ee'noko teing teva dootuu'nava kaandesi-koonava tarenukai teka pakupaku nka-koo makosiaava'. 11Biikaninge piristi' pankainankai Meepo'keta Aa'na' Meepo' ereng po'antavaako' orara aarumo tonta'koo, teka teinge kau' karenaumonanka biikaning mononanka ereng dakoaarima tee-koo osi-koo taapo'ke tai-antavaariko'. 12Ee'noko tee' nari' Jiisuu' osi pankamono-koo taapo'ka baike kune'uu' nantoong meeka'antavurii'naang baka bakaang erenge. 13Tee'koo nii' pankavitu-eta urikung aarumo tareaamaing-eta taapo' tee-anko merira tee porepoore' tora'pampiaing teie tora'puu'na'. 14Ai' anke tee osi pankamono tee' nari' dootuu' okora'ario' otoainamono oto'memuria' tero Jerusalema' noru'ampiko'na', teka nii'ke besi'ampimang temono osi pankamono dama' tavo'aravainamono. 15Tee boontunang niikaang karange e'mung nkoampimatomaung tee sipampiauka'nung nii'ke, tee Kumponing-koo tampa' tang-koong bakaang Pako'pari'nii'ke, Karistoo'ke, tampa' nkomuru'nung-koo nii', bakaang miring sira'pampima. 16Teing kapoo' dii' oto'derurining tankaamperima kapoo' tampeng nko-koo si'dariauka'. Tee ee'nung temurii' boontunang Kumponing dotuaramaung. 17Teing urantananka biikaning kara siomperimatoai ee'noko teing-koo boong otorimaatoai, ai' dii' diikaang domang tee teinge tanatavai otong dama'ke Ovoringe simpe'uriko maku'aavaina' noru'ai. Teing taura'perereriko teinge dotuariri nkoaavaing, orarunsiaria'. Teing orarunsi-antavereriaing deeko' pakupaku-koo nkakiriauka'nung. 18Kunsi-koo pakumererimaatoaing, ai' nii'ke tee noru'ampiri otong domang kuaa'mori o'norina' ookara kapoo'koo tampara aarumo narung nko-koo piamori. 19Ninge baru' aa'na' kontampiri si'damping tee' nari' kunsi-koo pakumerimatoo'naang dii'anko da'deng meaina'. 20Teie Kumponinge niikaang Ovoring Jiisuu' boo'keta daa'uu' sipisipi'nanka tarenara pankaing deemparaa'naang bakaang erenge kara naroong-anta o'paa' pinka'ura moo'muru'nung-koo; 21Teie ee'narai Kumponinge mooa-po'nunge ookara kapoo'nanka tampeng bakaang pia siomperi nkoveriaing-koo aruriaing. Ee'noko tee ninka Jiisuu' Karistoo' ninka nii'koo mintoomparama kapoo' dotu-antavuaing nkovuu'naang piamomaang meenasie araka ninka doong kante Jiisuu' okovui otomatoaina'. Tee' nari'. 22Dii' mmaikori', ning enang dii'koo eentamaramaang dii'ke tampa' taaraverii'naang tee aung nkaang kara dii' daarirerompiring pakururiaing te' basinoo' baru' isipo' deea'. 23Dii'ke noru'eriaing tee nii'maiko' Timoti tee bakearing kiimata-doma-ita. Ning-anko due'ka pora deeko' beero'darampee'naang nee'ke. 24Tampara tamperiaing teing-koo diikaning urantanuka-koo, ee'noko teing ookara Kumponing bakaning. Teing Itali-nameensi'keta porou'ninge dii'koo tampara tampaamaang. 25Tee biraanke tee dii' ninka nari' otomatoaing. Ee', masikung.

will be added

X\