Hebrews 12

1Bakei teing iri' oparia' Kumponing masika'antavaako'ning aa'na' karinga deempariritaa' teing kamo' pankaing koromurimaung-pina' otorong. Tee'koo enang teing nii' iri'antamaarima tee' oomaari otomaung-pina' noru'ampira nii'ke tee ookara manki'nanka ee'noko oraka' nkonanka nii'koo na'nampari dai'muri otomaing sipampira danto nari' iri' o'maria' kua'mariaing tee-koo deikoo'koo Kumponinge nii'koo uro'kanoo'ka miru'uu'nung-koo. 2Otori Jiisuu' narung-koo ookiri otorimaatoai, ee'nara niikaang masika'anta okovenung ee'noko dupe-antai. Ai' tee tee dotuaravaina' noru'ui avaru' tee sisikeera kune'koo aa'barata'koo; tee-koo maia'koo ampa'ou'; ee'noko enang tee Kumponing-koo tampavine-koo ba'nampari otong te' tanata nkoroma. 3Ee'nara ee' noru'eriaing: nantoonge orenge tee oraka' nkoaako tee baka avaru' tee tora'koo, dii' tee' oraka' nkoraariko domang aruaru'doriaroo'naang. 4Dii' orara aarumo dimpa'koo karirariko dupisi'daariainoo' mme' basiraria'. 5Ee'noko dii' ampa'doru'ning tee' Kumponinge puring-antaruri tautaururu'na' baurukaa' tanturi, Daari Meekunge aa'pumanoo'ka, “Ee nnuring, Ovoringe koong-antaruma kake'ii-antaruko tee tamunsi'nung-pina' noru'ema domang manki'doauka'. 6Ai' Ovoringe tee koong-antavurimaung teing piaavurimaing, ee'noko kiimatavurikoo' ookara baurukaa' tampurimaing.” 7Tee'koo koong-anta-koo bakei taura'darimaatoai. Kumponinge tee baurukaa'pina' nkorurimaung, ai' baa tee tooto' baumai koong-antavuaung otong? 8Dii' teie tee' koong-antaruriarui dei ookutuning koong-antavurimana' dii' teie baurukaa' masikeng deentariarupeu', tamung auning-kooning-pina' otoripeu'. 9Napo' ee' noru'eriai, niumatakaampi paramaaru'ning otorong koong-antamaariko teing-koo aroo'marimaing, tee-koo Niuma-koo tanuaang-aapenung-koo ee nii' deto basinoo' aroo'mariarupeu' domamuria'naang? 10Ai' teinge niumatakaampie tee batei oki'namu'koo oki'nareka' deemariko koong-antamaarimaung teing-koo makosina', teka teie Kumponinge deto basinoo' tampa' o'noriaina' koong-antamurimaung baka makosi-antamurimana' nari' meekupoong o'norii'naang. 11E'munung bateinang-koo ookara koong-antananka tee sisikeera-po'ning-pina' oro'paramang, tampa' dee'anta-pina' deea'. Teketa dama'ke koonto'nuka deemarira unaamori o'noriaing nii' baremarimaung-koo. 12Tee'koo Deto purintariai diikaang bireng aruaru'nanka ee'noko miing tarua'nanka iveka'dariai. 13Ee'noko tampa' koonto'navunge nanirimaatoai nii'ning dii'koo miing tarua'nuka apa'dekoari'neenga, teka unaavoroi otoroai. 14Ookara nantoong ninka mooa-koo oto'koo paarararimaatoai ee'noko meeka'dariri oto'koo. Naning meeka'paravaunge tee Ovoring oovuarupeu'. 15Tarerariaing nii'nunge Kumponing bakaang piaa bekoi'u'neenga, nii'namurii' ovoring siompui. Tee' oro' naning tonto doparopa-po'nung-pina' dii'koo dupura orari-antaruri'neenga. 16Tarerariaing nii'nung naning maniku' ninka bakiaa' nkovu'neenga nii'noo' Kumponing noru'uaruu'neenga Iiso-pina', tee-pina' bakaang barenku meekung miru'nii' baavevuu'nuung-pina' duu-koo daang-koo. 17Ee'noko dii'ke noru'eri otong dama'ke nkoaru'na' tee biraanke barenku okovenung-pina' nka-koo piavoko Kumponinge tompimpuu'. Taung paari-anta-koona' otoaruu' bane ta'due duu'paru' aa'na' besi'uma. 18Dii' teing miinani-koo kong-koo makosinoo' deea'noo' otoring tee' Isireeli-nupoong Sainai-namii-koo berou'na' aing aa'ning mantompaama: 19nta' aa'na' urung, mutaanang tunumparavaung, doroviru, tuuviri-koong aurong, ee'noko Kumponing-nung kara-koong aurong, ee'nung kara taaravaara avoreaama Moosesi nauau' bakearaa'naang, aa'puko, 20“Baa tee naning amii kompuko deeko' nantoonge kapange too'paama dupisi'aavaing, bane aremurii', kau' karenaumo deeko' dupisi'aavainge.” 21Aa'na' avo'avoro' oro'parako Moosesie aa'puu', “Ning aa'na' dankuranku'marama amoromaang.” 22Ee', dii' teing-pina' deea' kansi'koong-koo miinani-koo berou'ning-pina'; 23Teka dii' meepo' masipo' Saioni-namii-koo po'na' porining, osi pankamono-koo Kumponing Domantoo' bakanamono-koo, te' Jerusalema' paning-koonamono-koo, aing aa'ning otoromanamono-koo: 24koosinunanka mmau' deeru-paa'nanka naro' uumunuariri~ aa'na' neranii'nanka; Kumponing baurukaa' kirokainku naro'ariri dootuu'arimaing, paning-koo miring daarinii'nuka; Kumponing Ee'nara Kara-simpe' ookara biikaang; ee'noko teing nantoong tampeng dupe-antanii'nuka biikaning tanuaananka; ee'noko Jiisuu', tee Meu'nung nerakung kara naroong-anta-koong; ee'noko tee ereng meeka'anta-koo mira'nii'naru' nii' Kumponinge piaa-koong, Eebelo' bakaang ereng-pina' deea' mero' piavoma karou'naru'. 25Ooveri kupi'doria' otoriaing taara-koo tee karomatomaung. Tenang Kumponinge kansi'koonamii-eta' tautauvuriko kupi'orora kiimata-ita mmariaavaru'na' ooverira noru'eriaing dii' bakei aa'na' mmari'koo makosinuka deea' tenang paning-eta tautaururiko bei'bei'dariaing deeko'. 26Bakaang auronge tee temu'nung batei-koo kansi' biru'uko', teka enang tee maraka-antavari otong ee' minkuvuma, “Napo' asi'namu'ke ninge dankampampaing kansi' narung deea', napo' paning tee' nari'ke, ookeng.” 27Anaare karanaare aa'puinaare “Napo' asi'namu'ke” tenaare ee' miru'ari otong: Teie tee kapoo' dankampuaing tee paa'aravaing, teing tamung nkovuu'ning teie, teing kapoo' dankang-koo makosi deeaing bii'ka bire'ariri otoroaina'. 28Tee'koo nii'ke tampa' tampampimaatoaing tee paninung muu' nkavampiru'nung-koo dankang-koo makosi deeaung; 29Tee' nari' Kumponing-koo makosina' dootuu'marimatoaing mee'du'pimariri aa'na' amaiaa'mori, ai' niikaang Kumponing tee nta', ookara urusivumaung.

will be added

X\