Hebrews 11

1Enang tee tee masika'anta tee ee'nung tee biraanke nempampimaung-koo okora'noo' deempari otong, tee ee'nung noru' purinto' tasi'anta-koong tee kapoo' oro'paravaung. 2Teing urikupoong koonto'nuka Kumponinge tampeng tampuru' tee-koo masika'antavau'nung-koo. 3Tee ninka masika'anta ninka Kumponinge naumuriko tasi'pamping ee'narai paning ee'noko kansi' ee'noko ookara bateinananka nari' bakaang kara ninka pupu'uu', bera aa'nou' teing kapoo' ooampimaing tavo'aru' kapoo' ooampiaing-eta. 4Eebelo'ke tee ninka masika'anta ninka boontunang tampara avuu' Kumponing, Keeni bakaang puru'ui. Ee'noko Kumponinge bakaang masika'anta-koo oovura makosi-antavuu' naning koonto' tang-koo, bakaang boontunang makotuio' taa'ni'antavuma. Bane boo'paru', nka teie bakaang masika'antai tee mme' karoi otong. 5Iinokei tampa' masika'antavuio' Kumponinge deto paning-koo nkavuu' boo' tora'puaruu'na'. Besi'aama ooaava' Kumponinge nkavuio' tee. Tenang tutung nkavua' Kumponinge tee sira'puu' Iinokei tee dotu-antavuu'nung. 6Ee'noko naninge masika'anta otoa' Kumponing dotu-antavuarupeu'. Baa tee naning Kumponing-koo due'aravainge teie tee aing aa'ning tutung masika'antavuaing: Kumponing tee otong, ee'noko teie tee tampa' moo'uriaing teing nantoong tee besi'aamaing kake'iiariri. 7Napo' Nooa' tee'ke, Kumponing-koo mee'du'piari teie kara masika'antavura aaka'nareng ta'nampuu' tee baurukaa' ninka domamparii'naang, Kumponinge siingoravuio' kapoo'koo mme' oro'paravaung-koo. Nooa'ke tee' nkoarama ookara nantoong kansi'koo-nupoong kiimata-koo-nupoong sira'puru'. Ee'noko Kumponinge tee naning koonto' tampuu', barenku-pina' miru'ui masika'antavuko oovura. 8Eebaraami' tee' nari'ke, masika'anta-po'nung. Tee'koo Kumponinge bokuvura nii'noo'aape te' tokoo maraka-antavuu'noo' tee avuu'naang botovuio' meumpura tenkenuu' tamung noru'ua' tokoo beainoo'. 9Teketa tee ninka masika'anta narung ninka damisimaiari otou' temeensi'koo maraka-antavuu'nameensi'koo, akokameensi'pina' noru'uma, kaandesi-koo kaniarama nanuko'. Ee'noko bauring Aisake' tee'ke, napo' tee Jeekopi' ba'dompeng nari' barenku okonakang Eebaraami' ninka maraka-antavuru'nakang deempariri. 10Ai' teie tee uro'kanoo'ka oovuko' temono osi pankamono e'manui oto'namono Kumponinge kanivuu'namono. 11Ee'noko napo' Seera'ke tee ninka masika'anta ninka iri' nkavuu' tooto' ke'de-koo poontoaraa'naang bane teni ee'nani pareaamanoo' divu'ke, ee'noko tenie tee maraka Kumponinge daamparavaunge avuu'nung-koo aroo'ari bauring tampa' paravuu'. 12Tee tee naning narung-eta baru' aa'na' pankara-ita nantoong karinga berempariru' mmau'noo' beento'nanka paning-kooning-pina', ee'noko napo' piisi'nanka pirung tapirue otoromaing-pina' deeru-paa'nanka, tee' nari' Kumponinge napo' maraka-antavuu'na'. 13Teka teing aing ookara mme' masika'antavai boorou' kapoo' tee maraka-antavuru'nung ooaava', teka tamung isipo'keta nuuruupiaama aa'na' dotuariko' kansi'koo damisimainku sira'pariri kiimata-nupoong-pina' otoroi, osikaiaampuripeu'na' paaravaria'. 14Ai' teing temurii' nantoong tee' sira'paarimaing tee teing tasi'pariri otorong osi nii'noo' datavoroi otoroainoo' besi'aama. 15Te' osi porou'noo' norunoru'aava'. Norunoru'ai dei tee napo' doona ooaapeu' toro-koong. 16Teka tee te'noo' osi tampoo' oto'koo piavoromaing, te' ee'noo' paning-koonoo'. Tee' masika' noru'ampiri otong teie osi pankaing maamu-antaevuru'nung-koo. 17Napo' tee'ke tee Eebaraami' bakaang masika'anta ninka boontunampuu' tee bauring narung masikung kirokai Aisake' Kumponinge paaravuio'; 18Tero tee Kumponinge Eebaraami' maraka-antavuma aa'puu', “Aisake' baurukaa' teing da' okoruining tamparampaining.” 19Ee'noko dama'ke Kumponinge paaravuko tee Eebaraami' aroo'aru' tee baka bauring boontuvuu'naang, ee'pina' noru'uma, “Kumponinge tee nantoong napo' domang-anta-koo makosi, bane boo'nuka.” Ee'noko masika' Eebaraami'ke bauring boo'keta nkavuu'nung-pina' otong. 20Napo' tee'ke teie Aisake'ke Kumponinge nauvuio' masika'antavura baurinketa Kumponinge biraankevureaina' nauvuretu', temainta Jeekopi' namainta Iiso. 21Napo' tee'ke teie Jeekopi'ke boo'ke due'ura Kumponinge maraka-antavuu'na' masika'antavui Josepa' baurinketa kante Kumponinge biraankevureaina' nauvuretu', donsi'koo doonsinu'ari doonko kinkinura dootuu'arama. 22Napo' tee'ke teie Josepa'ke masika'antavuu' tee Kumponing bakaang maraka-anta Isireeli-nupoong tenkenaavaina' Iisipi'keta te' maraka-antavuru'noo' osi, ee'noko tenang boo'ke due'ura tee maraka-anta masika'antavui minkuarama botoaru' dako'aava'naang te' Kumponinge be'antavuriainoo'. 23Moosesi baumararing tee'ke, bane dauraronge~ toire' donkaang tavu'koo botovuriko'nang teringe avororea' baku'uresi otoko' beekuri kaara-koo tee tooto' kirokai oovureta ponto'ario' Kumponing bakaang biraanke masika'antavuresi. 24Napo' Moosesie tee' nari'ke, Ju'nupoong biikaang biraanke dama'nung masika'antavui tee bane Peero' baurange bauring deempuko, teka tenang panka'parara orokoarako'. 25Kumponing bakaning ninka nari' arikung tora'koo piavora tee-koo orara aarumo-koo kuunge batei oki'namu'koo otoi dotuaraa'naang piavoaruko', 26ee' noru'uma: baru' Kumponing bakaang Pako'pari'nii' nempui baike kune'koo tampa' masika' tee barenku nkavupeu'nung Iisipi'nunge dauraronge deing puru'ui otong moo' dama'ke nkavuaing noru'ui. 27Napo' tee'ke tee biraanke masika'antavui Moosesi Iisipi'keta tenkenuu' avoroa' tee-koo daurarong bakaang iira-koo, ee'noko teke tee' nari' masikeevui otoko' Kumponing oo-paa' dutai oovuing-pina' otoi. 28Ee'noko dama'ke napo' Kumponinge tenkeng-antavuriaina' nauvuio' Moosesie masika'antavura tee Paroro Baari'koong~ nkovuu' erenge karanaang siinkiaama tee koosinung~ boo'koonge biurukaa' donkaang tutuna'nupoong kompuriaroo'naang Iisipi'nupoong biurukaa' besi'urima. 29Napo' teing Isireeli-nupoonge naro'ke Kumponinge barampurio' masika'antavai tee pirung miring Urung pako'au' kansi'pina' koverenoo'ke kato, teka teing Iisipi'kooning kare-nupoong bata'aarima tee' nari' pako'koo paaravaama teke ke'nuru'ariru'. 30Napo' tee' nari' Kumponinge botovuru'na' masika'antavai Jerikoo'nung parang ~ke'munta-taa doonge koroaio' pesi'aru'. 31Ee'noko tenie oranie Reeapi'ke tee', masika'antavura booaruu' teing ninka bakanariong Jerikoo'nupoong ninka taarapiikanuka ninka nari', teni domang-anta piavora tenaanka tapoka nkora Isireeli-koonaanka onkeonke'ureta pakuvuretu'noo'koo. 32Ee'noko aming kapoo' nii'nung minkuama'naang? Ai' bateinang baru' makotua' aing aa'ning minku-koong: Kidion, Barak, Samson, Jepta', Deevita' naanka ee'noko Samuela', ee'noko teing nii'ning nakaro-nupoong~ Kumponing bakaning. 33Teinge Kumponing masika'antavaama dauraronanka mmau' depetoaaru'nung, nantoong orenanka etuaarima koong-antavaaru'. Kapoo' Kumponinge teing-koo maraka-antavuu'ning kompau'. Laioni-nanka-koo karang avo'aaru'. 34Teinge nta' karauviaana sirivaa'au'. Bainatu-koo i'ang-eta tampa' mmariau'. Bane aruaru'nukai teka paaravaama teinge apoo'aariko'. Tavu'koo iirakutavariko' ee'noko damisimainku piatooronuka~ mmari'antavaariko'. 35Nii'ning maniku' dotuariko' biikaning boorou'ning domampariko. Ee'noko napo' nii'ning-koo teinge too'de-nupoonge oraka' nari' oto'koo etuaariko teing koonto' aroo'aria', teka baike tora'koo taura'pariko' boo'keta daa'arima tampara otooto'koo otoroaina' noru'ariri. 36Teing-koo nii'ninge aing aa'ning tora'paako': akapeu', mura', dai'dovampaarima kiimatavaariko'. 37Kapange too'paarima dupisi'aariko', soo'ke meu' ke'me'aariko', bainatu dovange dupisi'aarima. Ata'aama sipisipi' dovang-koong mee'mee' dopa' kurumpariri nanaako'ning oraka' nkoaarima pore'antavaariko'. 38Teing baru' aa'na' tampeng anke kansi'koo osikaiaang ninka nari' oto'koo, makotua'. Tee'koo avitoitoi nanaama aa'ning-koo otoroko': mee'bora' sirakamaa'koo, miinairu-koo, kumpenairu-koo ee'noko kuvinairu-koo anke kansi'koo. 39Teka bane teing baito-koo miring-po'nupoong, teka teinge tee nkavaava' ookara kapoo' Kumponinge maraka-antavuu'nung. 40Teka tee Kumponinge tampa' masika' o'noriaina' uro'kanoo'ka noru'ui teinge tutung opai nka-koo taura'puriaruu' nii' ninka nari' nkavampiaing deemparako.

will be added

X\