Hebrews 1

1Tero urikamu' tee Kumponing niumaraang-koo oki'noo'na' taung avuntevunge karoko' amutemu'ke bakaning nakaro-nupoong~ karantavurima~. 2Teka aing-koo asi'ning doong-koo tee Bauring-koo karoma karamurimatoieeng nii', tee ee'nung ookara kapoo'nanka nkovuu'nung Kumponinge nauvuko, ee'noko tee tee ee'nung ookara kapoo' barenkunanka okovuu'naang miru'uu'nung. 3Bauringe tee Kumponing bakaang meenasi aa'na' arakavari sira'pukoo' ee'noko tee tee Kumponing siuraampi~, ee'noko ookara kapoo' tee bakaang karai purinto'ke kompui otong. Tenang teie niikaning oraka' nkonanka-ita kiiroraa'anta-koong nko-nko nkovurai' nange Kumponing-koo Tee Aa'na' Pankaing-koo tampanaang-koo ba'namparu' a'dei'ke ovorimpari otoo'naang. 4Tee tee aa'na' pankaing masikung deemparu' koosinunanka-koo dau basie. Ee'noko Bauring deempari otoko teie bakaang miringe pankainge nari' sira'pui otong, aa'na' tampara masikung teing koosinunanka biikaang-koo. 5Ai' urikamu' Kumponinge tee Bauring tampuma aa'puu' Daari Meekung-koo, “Da' tee nnuring, e'mung tee ninge daa'dansing.” Nii'nang ee Kumponinge koosinunanka-koo narung tee' minkuvuu'? Otoa'. 6Napo' tee'ke tenang teie tee Bauring kirokai a' kansi'koo botovuu'nang nauvurima aa'puu', “Ookarai koosinunankai Kumponing bakaninge tee ee'nung dootuu'aavaing.” 7Teka koosinunanka-koo Kumponing bakaang kara ee' daariari otong, “Teie koosinunanka, bakaning botovotonaa'nanka doving ee'noko urung-pina' aampari'antavurimaung.” 8Teka Bauring-koo napo' ee' daariari otong, “Dakanoo' ovorintari ba'nani'doma tee tee' nari' otomatoainoo' da' Kumponing, ee'noko dake tee dakanamuu' koonto'na' taa'ni'antarari tanataveri otoainge. 9Dake tee aarumo koonto' piaavemaung ee'noko aarumo boto-toto' munte'ekoo', tee'koo da' Kumponing dakaang Kumponinge duunie dotu-anta-koonge sisi'duu' pako'pari'duma da'maikori'koo dau basi otoo'naang.” 10Ee'noko napo' Bauring-koo ee' daariari otong, “Da' tee Ovoring aung kansi' ookutunung tutuntoma-ita nkoveu'nung, ee'noko paning dakaang birenge nkoveu'nunge. 11Teing teing paa'areaining, teka da' tee' nari' otoko. 12‘Napo' urika'pareai baarong-pina' ee'noko tee-pina' mononopa'pina' kai'aamana' kai'era paarieai, teka da' tee' nari' otoi otoaing, ee'noko dakaning mare'nanka botu basiaravauka'nunge.” 13Ee'noko napo' Bauring-koo miru'uma aa'puu', “Ning-koo tampavine-koo ba'naniai bera dakaning kare-nupoong da'koo kau'koo boonavete-koo siparampainoo'ke basi.” Teka koosinunanka-koo tee' minkuvua'. 14Ai' teing teing koosinunanka tamung pakupaku-nupoong tanuaananka teing barenku okovuri domampariaining paku-koo.

will be added

X\