Galatians 5

1Karistoo' tee nii' unaa-antamuru' dotumarii'naang unaamori. Tee'koo naurampimang, ima'dariri donkoniriai, ee'noko doonko napo' kinkiniriauka' dai'nisinuka ninka nari' pake'deeri. 2Enang ninge Paula'ke bakei naurampimang, dii' teing Kumponing ninka naroontarii'naang piarorima dopa' toto'darima boto sionavung aroo'erima deeko', Karistoo'navung siperimaang pakururipeu'navung. 3Napo' unantampiri nauramping ninge dii', ookara dopa' toto'navung aroo'eriaining dii' tee ootukunung boto Moosesi-nung pukeveri siong-koo dai'dariri otoriaining. 4Aa'noo'naang, Karistoo'keta tee' toto'darii'naang dii' ee'ning Kumponing-ankoi koonto'nuka deentarii'naang piarorimaing tee boto siomperima, ee'noko dua'daririning-pina' otorii'naang bakaang avusiro'ari moo'navung-eta. 5Teka tee Tanuaang Meekunge pakumurio' baitomarima te'mung koonto'nuka taa'ni'moriaina'mung-koo nemariri o'noring. 6Nii' Jiisuu' Karistoo'koo kuung o'noritaa' dopa' toto' ee'noko toto' deeaung kapoo' deea', teka teie baitoi deeko' piaa ninka nkoaramaung. 7Dii' tee deikoo'koo tero tampa' kua'dariko'ning-pina' otoru'ning, enang baie napo' toto'antarurio' tee kara masikung sionavung siperi? 8Tee temurii' kara dii' daang aroo'antaruru'naare tee dii' bokururu'nung bakaang kara deea'. 9Tee-pina' kapoo' oki'noo' dera'ke ootukunung dera'antavupeu'na' teie naninge dii' nko-antaruru'nung. 10Masika' noru'ansi otong Ovoring-koo o'noi, dii'ke nkaang noru'koo taapo'ke nii'na' noru'eriauka'nung ee'noko baa tee naning dii' orari-antarurinung tee kiimata nkavuaing aa'nung tee ninge noru'ampa'. 11Ee mmaikori', nii'ninge aa'maamaung, “Paula'ke dopa' toto'navung daankivumaung.” Nka tee' deea', ai' ning aming-koo oraka' nkomaamang tevung boto sionavung-koo baukoree'nukai? Ninge tee' daankiansi dei tee daang-antavampeu' tee doorenang Jiisuu'ke nii' domaang moo'muru'nung-koong, aa'barata'koo boo'pari boto bakaang taretare bakevura, ee'noko teinge Ju'nupoonge too'dempaavarupeu'. 12Maiko' teing dopa'toto' siompaama dii' pore'antaraarimaing avitoitoi-koo bii'ka biikaang mono totototo'paripeu'nung. 13Dii' mmaikori' unaarori oto'koo bokururu'ning, teka unaarori oto'koo otori diikaang mono bakaang pia narung siong-koo taura'dariauka', teka piaareerima pakureeriai dii' nii'ning-koo botovotonaa'nuka noru'dariri. 14Ookara botonanka Moosesi-nung tee nanaare-koo dupeari otong ee' minkuvumanaare-koo: “Dake tee naning da'koo due'nung daka piaararamana' nari' tee' piaaveaing.” 15Teka oraka' nkoreerima orari-antareeri'neeng dii'ka. 16Teka enang aa'dampimang, Tanuaang Meekunge naururiaina' siomperiai ee'noko mono bakaang pia siomperiauka'. 17Ai' mono bakaang piai tee Tanuaang Meekung too'dempui otong ee'noko Tanuaang Meekung bakaang piai mono too'dempui otong, ai' anaanka tee turampeeremanaanka ee'noko dake kapoo' daka nkovepeu'nung otoa' tenaanka-koo narung taaravearura. 18Dake Tanuaang Meekung taaravera siompeaing deeko' da' tee boto-koo kuung otoa'. 19- 20Mono bakaang nko-nko ee'pina' sira'pari otong: nampeesi orari, kaukauro-nko, noru' ku'mi', maimaia'na' nko, kumponing tositosinanka siong, dopa-nko, oraka' noru', turang-nko, orarunsi ninka munte', iira bauko, mosii', kara-koo tata', siivenke', mamaironto', purinto'naru'ke kanu', tooreere dovang; 21Ninge enang tautaurampimang tero tautaurampiru'na': Teing tee' oro'nanka aarumo nkoaamaing Kumponing bakaang muu' aarenaavauka'nung barenku oko-koo. 22Teka tee sinang Tanuaang Meekung-etaing aung ee' oro': piaa, doturotu, mooa, da'deng iira deeaung, tampa' nko, avusiro', masika'anta, banainge oto', ee'noko baka pinka'ari oto'; 23Aing pote-koong boto otoa' bakei. 24Ee'noko teinge nantoong Jiisuu' Karistoo' bakaninge tee biikaang mono-aapena' noru' aa'barata'koo taakavau' teing bakaning karakaraa'nanka domange etuvurimaing ninka. 25Tanuaang Meekung-koo kuunge domamariri o'norimaung deeko', tee' nari' Tanuaang Meekung ninka nari' nanampimaatoaing siompampiri. 26Nii' kirokainku-pina' o'noriauka', ereanameereauka' ee'noko mamairomeeriauka'.

will be added

X\