Galatians 4

1Tee ee'pina' minkuamaang, tee naning oki'nara barenku okovupeu'nung tee tenang oki'na'pari botovotonaa' ninka nari' basira, bane teie ookara-koo dau basiari barenku okovuaing panka'parara. 2Tenang oki'na'pari otoko tee nii'ninge tanatavai otoko otong tee kavokavoro-nanka bakaning ee'noko tee aung tooto' bera batei baumai miru'uu'noo' basi. 3Nii' tee' nari'ke, tenang Kumponinge oko-antamuriainang batei mme' tavo'kuaruko kapoo'nanka kanto'puaing kansi'aapening-koo bi'mariri aavu'mariko'~ barenku kong-koo. 4Teka tenang batei dupevui makotuio' Kumponinge bauring botovuu'; 5Tee ponto'aru' nani-koo manikuma-koo. Moosesi-nung boto-koo kuunge ponto'aru' moo'urii'naang teing nantoong Moosesi-nung botoi kuung deempuri otoroko'ning nii' baurukaa' oko-antanii'nuka o'norii'naang. 6Tee'koo dii' okovui baurukaa' deentariko Kumponinge Bauring-koong Tanuaang botovuu' niikaang domang-koo kuunge taa'ni'poi karantamuriko~ dotumarima aa'pampii'naang, Mma' ee, Mma'. 7Tee tee enang Kumponinge tampa' nkoruio' da' tee enang bautara-ita bakeraring ee'noko tee da' bauring deentaring, ee'noko bauring deeko' tee da' barenku okoruinung. 8Tero tee tenang dake Kumponing noru'earuko'nang da' tee dai'dari otoko' teinge kapoo'nanka makotua'nanka kumponinanka deeng-anta-koo. 9Teka enang dake Kumponing noru'eing, ai' aa' da' Kumponinge noru'dui. Tee'koo enang aming-koo da' napo' tororari teing kapoo'nanka kanto'puaing ninka dai'dari otoo'naang, teing ninka toomo sitovuru'nanka, aruaru'nankai ee'noko aavu'arimaing? 10Dii'ke tee temurii'koo aa'ning siompererimaung doong a'munte'mung, kaara averaa'teveraa' ee'noko mare' amatemare' Kumponing ninka naroontariaina' besi'erima. 11Dii'ke ning ariri'antamering ee' noru'amira, “Ning dee'ma dii' paku-koo tamung pore'mou'.” 12Mmaikori' ee, ning boto-ita taapo' tonta'maring tee' dii' taapo' otoriko'na'. Tee' nari' bere'darira o'noriaing. 13Dii'ke noru'eri otong tenang tee siipai siipa-antamuio' datemarara o'noi dii'koo tutung daankimaru', nka dii'ke ning oraka' nkomeria'. 14Bane siipa-koo oraka' o'noi pore'antarampiko maareroria' ning-koo, baru' oraka' noru'meria', teka bakei Kumponing-nung koosinung~pina' maneena' nkomeru', Jiisuu' Karistoo' nkoveripeu'na' makosina'. 15Arerai tee biraanke ning-koo enang? Aa'nung dii'ke piaamerima dapi' duta banke'darima ameriko' pakumerii'naang. 16Ning enang ee dii'ke munte'merimang kara masikung naurampiru'nung-koo? 17A, tamung munte'meriauka'nung teinge navuraariko dii' orari-anta-koo. Ning-ankoita siivenke'antaraariko dii'ke teing daangamperererii'naang piavoromang. 18A'noo' nantoonge dii' masika' paku-koo navuraariko deeko' ookara-koo tampa' ee'noko ning dii' ninka nari' o'noko naro' deea'. 19Ee mmaikori', ning pareaava'naang sisikeeravoromana' sisikeeramomang dii'koo, dii' napo' ponto'anta-koo Karistoo' napo' dii'koo domang-koo tampa' taa'ni'anta-koo bera taa'ni'poainoo'ke basi. 20Piaana' ning tee dii' ninka nari' o'noria'. Dii' makosina' kara-koo piamomaang, nka enang papaaramaring diikaang aarumo-koo isipo' otoriko. 21Naumeaing dake Moosesi-nung boto-koo kuung oto'koo piaromaunge, tee boto ee taaraveaung dake? 22Daari Meekunge ee' minkuvumaung: Eebaraami' baurinketa kenaankara otoreko', narung teni Seera' bauring, teni ovorinani, Eebaraami' ba'aang. Ee'noko narung teni Eekaa' bauring, teni tamung Seera' bakaang botovotonaa', dai'nisinani. 23Teka tee teni dai'nisinani bauring tee Eebaraami' mono-namenge noru'ari nampuio' tee tooto' bauring paraevuu'nung tee barenku nka-koo makosi deea', ee'noko tee teni bisiira dai'arava'nani bauring tee Eebaraami' Kumponinge miru'uio' nampuu'nung-koo maraka-anta siompuio' tee tooto' bauring paraevuu'nung tee barenku nka-koo makosi. 24Aung tee minkunaa paara-anta-po'nung. Anaanka manikumaara tee kenaanka kara naroong-anta Kumponing-etaing siong-antavaresi otong. Navung naroong-antanavung tee Moosesi-nung boto sionavung, Sainai-namii-koo nauvuru'navung. Arebia-nupoonge temii Sainai-namii tee Eekaa'namii tampaamaung. Ee'noko teni Eekaa', Eebaraami' ba'aang dai'nisinani, teni Jerusalema'navuntu' miru'ari otong, Ju'nupoong biikaang osi pankaing. 25Ee'noko teing Ju'nupoonge Moosesi-nung boto siong-koo paaravaama Kumponing ninka naroompariaining-pina' noru'arimainge biukoree'ai otoromanamono temono. Ee'noko teing teing temono baurukaa' tee boto-koo dai'nisinuka deempariri otorong. 26Teka nii' niikaang osi pankaing Jerusalema' paning-koong, ee'noko temono tee Moosesi-nung botoi dai'arava'namono. 27Daari Meekunge Jerusalema' paning-koong dama'ke oro'paravaing teronung-koo deto basi tampuu' manikuma-pina' kara nauvuma aa'puu'na'koo: “Doturaravaing da' bisiira pareai. Ta'nina' duuru'kiai bane da' tooto' mantompeai. Ai' Kumponinge da' teni daka-pina' otomai maraka-antaruing teni kura'nari' bioko deentaraa'naang teni ba'ung-po'nani puru'ei.” 28Mmaikori' ee, nii' enang dai'arava'nani bauring pina', Aisake' pina' o'norining, maraka-antanavunge ponto'nii'nuka. 29Ee'noko tee tee' nari' tee tooto' mono siompui ponto'aru'nunge oraka' nkovuko'na' tee Aisake', Tanuaang Meekung bakaang iri'ke ponto'aru'nung, tee' nari' enang nkomaarimaung nii' teinge mono-namenge noru'ariri Kumponing ninka naroong-koo paaravaamainge. 30Teka teie Daari Meekunge arekee' minkuvumaung? “Bata'eaing teni dai'nisinani ee'noko tee bauring, ai' tee dai'nisinani bauring tee barenku okovuauka'nung tee ninka teni dai'aravai bauring ninka nari'.” 31Tee tee enang, ee mmaikori', nii' dai'nisinani baurukaa' deea' teka dai'aravai baurukaa' nii'.

will be added

X\