Galatians 3

1Dii' Kalesia-nupoong bakei kanukanu'nanka! Arekee'koo dii'ke kara masikung siperi, ai' pa naninge doomaruringe? Nii'ke tee dii' naurarampiru'nung Jiisuu' Karistoo' baru' aa'na' siraka'antararampima koonto' dii'ke oovering-pina' tasi'antarampiri aa'barata'koo bi'ari dii'koo boo'paru'na'. 2Aung io' kapoo' narung dii'ke naumerii'naang: Dii'ke ee tee Tanuaang Meekung Moosesi-nung Boto siomperimaung-koo nkaveru'nung? A, Moosesi noru'eria' nkaveru', tee Jiisuu'koong doorenang tampara taaraverira baitorariru'nung-koo. 3Aa'na' kanu'dariri ampa'doru'nunge Tanuaang Meekung nkaveru'na', ee'nara nkaverira domang neraka'dariru'nung? Tee domang neraka'dariru'na' ee tamung mono bakaang iri'ke Tanuaang Meekung-eta taapo'ke dupeverii'naang noru'erimang? 4Teing kapoo' ivekeng tero mantontariru'ning enang ee tamunsi'nanka deemparing? Tee' nkoarapeu' daana'? 5Tee ee'nara dii' Tanuaang Meekung avusiro'ari aruru'nung ee'noko kapoo' ta'nimpaarii' purinto'nanka tavo'antarerurikoo'. Enang naumeriaing tee ee Moosesi-nung Boto siomperimaung-koo tee' biraankerurikoo' ai' doorenang tampara taaraverira baitorariru'nung-koo? Dii' aa' baitorariru'nung-koo tee' biraankerurimaung. 6Eebaraami' tee'ke, Daari Meekunge aa'pumana'koo: “Kumponing bakaang maraka-anta masika'antavuio' ee'noko Kumponinge bakaang masika'anta oovura naning koonto'nung tampuu'.” 7Tee'koo enang tasi'periaing Eebaraami' baurukaa' masikeng teing nantoong masika'anta-po'nupoong. 8Teroita daariari otomaung Kumponinge koonto'nuka tampuriaina' teing avitevitu Ju'deeaing baitoariko. Daari Meekunge naumurimaung Kumponinge Eebaraami'koo tee tampara doorenang daankivuu'na' aa'puu'noo'ka: “Ookarai avitevitue da'koo biraanke nkavaavaing.” 9Aung ee' miru'ari otong: Nantoong Kumponing-nung maraka-anta masika'antavaamaing tee, nari' biraanke nkavaamaung Eebaraami' ninka, masika'anta-po'nung ninka. 10Teka baata teing Moosesi-nung Boto siong-koo mantomparimaing teing bakaang barakosi'koo kuung otorong, ai' Daari Meekunge ee' minkuvumaung: “Baa tee naning Moosesi-nung boto siompui tee' nari' keperuu'aravauka'nung ookara batei-koo daariari otoina' pukevui tee barakosi'nii'.” 11Ee'noko napo' ee' sira'pari otong tee naning Kumponing ninka naroomparavarupeu' Moosesi-nung boto siompumaung-koo Daari Meekunge napo' aa'puu'na'koo: “Naning tee Kumponing baitovuko koonto' tampuainung domamparavaing.” 12Tee'koo Moosesi-nung boto sionavung makotua'navung deempari otong baito-aapenavung deearuko ee' minkuaramana'koo: “Naninge tee boto siompui nkovuaing tee teing nko-nkonanka nkovuaining-koo domamparavaing.” 13Teka Karistoo'ke moo'muru' nii' tee boto-koong barakosi'keta bakaang monoi barakosi' kune'ura nii' pari'antamurima, tee' Daari Meekunge minkuvumana' aa'puma, “Ookara barakosi'po'nupoong koi'koo bi'aariaining.” 14Jiisuu' Karistoo'ke tee' tora'puu' tee Kumponing-nung biraanke Eebaraami'koo minkuvuu'nung Ju'deeaing-koo poo'naang, tee-koo baitomarimaung-koo nii'ke Tanuaang Meekung nkavampiaing, tee bauta' maraka-antamuru'nung. 15Mmaikori' ee, enang kara miru'po'nung naurampii'naang nii' doong kante nkomarimana'koong. Noru'eriaing, kapoo' kara naninka kenaankai naroompurepeu'nung, ee'noko marakavareko narunge toto'puarupeu' ai' be'nu'uarupeu' bane naninka kansi'koonaanka marakavareko, ee'noko Kumponing bakaang maraka-anta toto'koo makosi deea' bakei. 16Enang tee Daari Meekung-koo otoina' tee Kumponinge Eebaraami' maraka-antavuretu' ba'dompeng ninka nari', ba'dompeng isi'isimpuaing. Daari Meekunge ee' minkuvua', “dakaning isi'isinanka ninka nari',” mmau'koo tampuma, teka narung minkuvuma ee' minkuvuu', “dakaang isi'ising ninka nari'.” Ee'noko tee isi'ising tee Karistoo' ee'nara miru'ari otong. 17Tee aung kapoo' ninge miru'ansinung: Teie botoi toto'puarupeu' dama'ke tavo'kuu'nunge mare' narung daaku'keta beenaumo kivora divu'kuio'. Tee Kumponinge kara naroong-antavui tero pinka'uu'nung ee'noko Moosesi-nung Botoi tee maraka-anta daang deeng-anta-koo makotua'. 18Nii'ke tevung boto sionavung siompampikotaa' Kumponing ninka naroomaripeu'nung dei tee ee' sira'parapeu'nung: tevung nii'na' oro'navung Kumponinge naroong-anta nka-koo, Eebaraami'ke siompuu'navung-pina' deea', ai' teie tee tamung Kumponing bakaang maraka-anta masika'antavuko Kumponinge bauta'ui tee ninka nari' naroonii' tampuu'. 19Enang aming-koo Moosesi-nung boto otong? Tee aa' tee oraka'nko otoko avuru'nung boto aarempaara oraka' nkoaamana' tasi'parii'naang. Kumponinge tee' nari' oto'koo miru'uu' bera tee isi'ising, Karistoo', tavo'kuainoo'ke basi, ee'nara tero maraka-antavuu' nung. Tee boto tee koosinunankai po'antavau'nung Moosesi nauaama kara-pare' Kumponing ee'noko teing nantoong-koo meu'ke. 20Teka tenang maraka-anta Kumponinge Eebaraami' avuu'nang Kumponinge naning otoaruko kara-pare' Eebaraami' koonto' nauvuu'. Tee'koo napo' tee maraka-anta deu basi Moosesi-nung boto-koo, ai' boto tee tamung nantoong-koo otong. 21Enang ee Moosesi-nung botoi Kumponing bakaang maraka-anta toto'pui otong? A, tee' aa' deea' bakei. Boto tee kapoo' nantoong domampuripeu'nung-pina' oro' otoi dei tee koomariri o'noripeu' tee boto siompampima. 22Teka Daari Meekunge tasi'antamuru' nii' ookara orara aarumo-koo kuunge dai'mariri paapaa'marimaing, boto sionavung-eta bere'marira Karistoo'koo baitomariaina' Kumponing ninka naroomarii'naang. Tee' nkomariko deeko' Kumponinge dupe-antavuaing tee bakaang maraka-anta koonto'nuka tampuriaing-koong teing masika'antavaamaing. 23Tenang masika'antanavung oro'paravaruko nii' botoi naro'ka parammuri o'noriko' dai'muritaa'nange bera masika'antanavung oro'paravainoo'ke basi. 24Tee boto tee niikaang nau-anta-pina' otoko' Karistoo'anko po'antamurii'naang masika'antanavunge Kumponing ninka naroomarii'naang. 25Teka enang tee masika'antanavung oro'pario' nii' tee enang botoi tanatamuria'. 26Enang tee Jiisuu' Karistoo'koo kuunge dii' ookara Kumponing baurukaa' deentaririning teie diikaang masika'antai. 27Dii' ookara ntong-koo minkie meeka'anta nkaverima Karistoo' bakaang tare-koo kuung poru'ning teing Karistoo'naunturi otoriaining, siivenke'deeria'. 28Ai' tee Karistoo'koo siivenke' otoa' ee'pina': Ju'nung ee'noko Ju'deeaung, botovotonaa' nuka ee'noko osikaiaang, nii'noo' donkaani napo' manikuma. Dii' teing navitu tee-koo kuung otori. 29Ee'noko enang Karistoo'koo kuung poring-koo dii' tee' nari' okoruriaing tee barenku Eebaraami'ketaing isi'ising-koong Kumponinge maraka-antavuu'nung.

will be added

X\