Galatians 2

1Teketa kivora-ita karenaumo mare' tankinuko Jerusalema'aape meu' napo' Banabas ninka, Taitas nari' bokuansi. 2Kumponinge botomuio' nanantu' ee'noko tee doorenang tampara teing-koo Ju'deeaing-koo daankiamaung napo' teing teka nauarantu', miring-po'nupoong naing biikanairu-koo, ee' noru'ama: Aung kapoo' ning pore'momaung nii'ning porora daang deeng-antavaa'neeng. 3Nka tee teinge aroo'au' bane nii'ning baka-bokunanka kontevoroio' tee-koo Taitas ni'ninka nari' moretu'nung dopa' toto'pamparuu'nung-koo dootuu' aapearako. Teing tee makensi'navitu nii'maikorori' tamparima maroita kuung porou'ning baakenemaarii'naang tee tampara otooto'koo Jiisuu' Karistoo'ke nii' amuru'nung Moosesi-nung botoi dai'ari oto'keta tonta'antamurima; 4Teinge nii' dai'anta-koona' tee' minkumaaru' nii' unaamori o'norining. Nka tee teinge nii' ninka nari' miring-po'nupoonge nkaang tampara doorenang aroo'aara botomaaria' Taitas dopa' toto'koo Kiriki'nung deemparako, Ju'deeaung. 5Oki'noo' aroo' o'noria', bane batei oki'namu'koo. Tee kara koonto' doorenang tampara-koong orari-anta-koo taura'parampia' dii' noru'darampima. 6Teing tee miring-po'nupoong deempariri kapoo' deea' ning-koo, ai' ookara teing nari' oro'nuka Kumponing-koo. Nka teinge tee miring-po'nupoonge nii' ninka nari' o'noru'ninge kapoo' nii'ning be'nu'antavai minkuaava' ninge minkuantu'ning-koo daua. 7Bakei otoa'. Teinge tee ning noru'mau' Kumponinge ning aroo'mui botomuu'nung tee doorenang tampara okomui bereng-antavama'naang teing-koo Ju'deeaing-koo tee' nari' Piita oko-antavura botovuu'na' Ju'nupoong-koo. 8Ai' ning tee Kumponinge iri' amuio' tampa' mintoomarako teing-koo Ju'deeaing-koo tasi'mau', tee' nari' Piita kara-oko-antavuio' tampa' mintoomparako'na' Ju'nupoong-koo. 9Tee avuavu' Kumponinge deing tasi'paama Jeemisi dovange, Siipas ee'noko Jooni, teing ee'ning oko'bosi'nuka tampaarimainge dootuu'koo, nee' Banabas naanka Paula' bireng batu'maaretu' nee' teing ninka manta'ka taa'ni'antamaarema nee' Ju'deeaing-anko meree'naang ee'noko teing Ju'nupoong-anko beroo'naang. 10Teketa tee narung kapoo' masikung nko-koo naumaaretu' nee'ke, teing ata'oinku pakuarampee'naang, tee' ee'na' aa'na' piamou'na'ke. 11Teka tenang Siipas Antioki'navuntu'koo pou'nang ninge tee duta-koo karavama turampantu' kiimata-koo makosina' nkoario'. 12Ee' otong: Nii'ning nantoong mme' poroaruko Jeemisi-ankoita Siipas Ju'deeaing ninka tampa' nari' taamanaako'. Teka te' tavo'ariko dopa'toto'navitu-pina' mantompuri dama'du-aape kai'aru' ee'noko tonta'aru' teing tero navuariko'ning-ankoita. 13Ee'noko tee' nkoarako teinge nii'ninge Ju'nupoonge Karistoo' siompaako'ninge tampara doorenang-koong aarumo nari' daka'pai siompau' tee. Ee'noko aa'nou' Banabas nari' barampau' tevunge oravunge. 14Teka tenang tampa' siompaavaruko tee aarumo tampara doorenang-koong ninge ooamira Piita turampantu' ookara-koo dutakanoo'ka ee' minkuama, “Bane da' Ju'nupoong-koonge niikaang aarumo sipei Ju'deeaung-pina' nkoraramaung. Tee' nkorarakotaa' arekee' enang tororari bere'antaverimang Ju'deeaing Ju'pina' otoroo'naang?” Tee'pantu'. 15Aming-koo, nna' bane nii' Ju'koo meu'ke ponto'mariru'ning Ju'deeaing oreng-koo deea', teka nii'ke noru'ampiri otong Kumponinge naning koonto' tampuaung Moosesi-nung boto siompumaung-koo, teka Jiisuu' Karistoo' masika'antavumaung-koo deeko'. 16Ee'noko nii'ke Jiisuu' Karistoo' baitoampiru' Kumponing ninka naroomariri o'norii'naang Karistoo' masika'antavampimaung-koo, boto siompampimaung-koo deea'. Ee'koo, naning otoa' boto siompumaung-koo Kumponinge koonto' tampupeu'nung. 17Enang tee Kumponinge koonto'nuka tammuriaina' besi'ampiri Karistoo' bakanavung siompampima nii'namurii' aarumo-koo basi-antamuriko deeko', Moosesi-nung botoi taura'puaung-koo, tee-koo aarumo-koo arekee' minkuampii'naang nii'ke? Ee' ee minkuampii'naang, “Karistoo'ke orara aarumo-koo basi-antamuring.”? A, tee' aa' deea' bakei. 18Ninge oong boto aarempansinung sira'marapeu' napo' daa'amira tee aarumo boto sionge domang-koong, tee tampara doorenang daankiama pesi'ankotaa' napo' sipamira tee. 19Nka tee ninge daa'ampauka'nung, ai' ninge tee Moosesi-nung boto siompamaa' noko teie teka totora'muu' nkaang sionsiong-koo ning boo'koo tuumpimura. Tee' ooansirai'nange bere'maru' Karistoo'koo bi'antamari tee ninka aa'barata'koo tero moontu'nung-pina' o'noi Kumponing-ankoi domamaraa'naang. 20Tee ning nari' Karistoo' ninka aa'barata'koo bi'mari moontu'nung deemaritaa' enang tee domaang ning-koo kuunge otoing koonto' ning-koong deea', teka tee-koo Karistoo' kuunge domampari otong ning-koo. Ee'noko nkaang otooto' enang o'nomaung anke kansi'koo Kumponing Bauring masika'antavansi domamari o'nomaung, ee'nara piaamura avaru'nung ning-koo boo'paraa'naang. 21Kumponinge naning koonto' tampupeu'nung dei aarumo boto sionge domang-koong paaravuko deeko', Karistoo'nung boo' tamunsi'nung deemparapeu'. Tee'koo temurii' aarumo napo' daa'ampauka'nung Kumponinge avusiro'ari tampa' nkomuu'na' tamunsi'nung deempara'neeng-koo.

will be added

X\