Ephesians 6

1Toire'ke tee diumaraang Ovoring-koo tampa' taaraverererimaatoaing, ai' aung tee dii' diikaang nko-nko. 2Daari Meekung-koo ee' otong, “Daumararing deto noru'eresi pakuereaing. Tee' nkorarama tee anke kansi'koo pankaroong tampa' otoaing.” 3Aung tee tutuna'nung boto Kumponing-etaing maraka-anta ninka mavo'pari otoing. 4Dii'ke biumaraange diurukaa' iirang-antana' nkovereria' otoai, teka tampa' tanataverereriai Karistoo' bakana' kake'ii-antavereri, bakaang kara bare-antavererima. 5Dii' dai'nisinukai teing dii' tanataraarimaing anke kansi'koo makosina' ankampereri mataa'irariri siompererimaatoai tunsi paakararia', tee' Karistoo' dotu-antana' noru'eri. 6Nantoonge ooraarii'naang tampa' nari' mintoontaria' otoai ako' dotu-anta-koo, teka dii' Karistoo' bakaning botovotonaa'nuka deentariko domange tampa' noru'eri mintoontariaing Kumponing-koo. 7Doturoturariri pakuereriaing kara siomperi – Kumponing noru'eri, nantoong noru' ereria'. 8Noru'eri otong Ovoringe tee nantoong ookara kapoo' tampa' nkoaamana'koo tampa' maku'uriaing aa'ning dai'nisinuka ee'noko dai'ariaing nari'. 9Dii' oko-nupoonge tee tampa' tarevereriainge teing diikaning tee' nari', mau'mau'ereria' ee' noru'erima: “Nii' ookara taremurimaung otong teke paning-koo nari' noru'muri, duukung sipuaunge.” 10Asirang-koo ee' naurampii'naang: Purintariri otoriaing Ovoring-koo bakaang iri' iirakuta ninka. 11Nopa'dariaing ootukununge Kumponing bakaang mononopa' tavu'koonge tee ninka nari' Sietani'ke aavaruriko dimpa'eriaina'. 12Aming-koo, nna' nii' tee nantoong tumuusinanka ninka tameeria', teka aa'ning ninka: ma'nari-koo ovontung avatevaatang-koo neriariri otoroi Sietani'koo kuunge, paning-nairu-kooning-koo oravitu bakei maare ninka tameering, mutaanang-aapei ootukunung kansi' booni'antanuka enanaroong-koo. 13Tee'koo nopa'dariaing teie Kumponing bakaang mononopa'ke ootukununge dii' dimpa'dariaina' doong ora'mung basiarako, ee'noko kare oparako dii' tee tee' nari' tampa' donkoniri otoriaing. 14Tee tee tampa' pinka'dariri donkoniriaing. Kara masikunge tokoni'pina' tokorariai. Koompari oto' si'daravai murukeu-nee'pina'. 15Maamurariri otoriai tee tampara doorenang mooa-koong nkavui nanu'koo tee' piatooronuka~koo tutung kau'koo boonamante~ baraa'arimana' maamuariri. 16Napo' teing ookara ninka baito komperiai kapatau kompaamana' tumpari' nta'po'ning sirivaa'uko taamparavaing teie orarai, Sietani'ke, bai'uko. 17Ee'noko deto komperiaing tee domang-anta Kumponinge aruru'nung tee-pina' diikaang baakopo. Napo' komperiai tee Kumponing bakaang kara tee-pina' bainatu tavu'koong Tanuaang Meekung-etaing. 18Tee' Tanuaang Meekunge pakururimana'koo ookara batei-koo kunsirarimatoai amutemurii' paku nka-koo baitorarima. Ee'noko tee' nkorarima muung ee'noko doong mantontariri eentaevurerereriai Kumponing bakaning meekupoong ootukunairu-koo. 19Ning tee'ke kunsi-koo pakumeriai tenang ninge kara daankiama'naang nkomarako naumuaining-koo, tampara doorenang makempari otoko'nung noru'antavarampaina' amaiaa'moa'. 20Temurii' kara nka-koo botomuu'nung deemarako entamemuriaing amorompa' daankiampaina' makosina' bane dai'mari o'noitaa'. 21Enang tee ninge Tikikas dii'anko botoamaang tee mmaiko' masikung ee'noko Ovoring-koo mintoomparama mutekaro'arakoo'. 22Teie naururiaing nii' o'norina' ee'noko ninge nkoamaing kapoo', ee'noko diikaang domang kuaa'antaruriaing. 23Mooa ee'noko piaa tee ninka masika'anta tee dii'koo ntara'mainkaang-koo otoaing Kumponing Niuma-ita ee'noko tee Ovoring Jiisuu' Karistoo'keta. 24Biraanke otoaing dii'koo niikaang Ovoring Jiisuu' Karistoo' piaa o'paa'ke piaaverimaing-koo ookara-koo. Tee' nari'.

will be added

X\