Ephesians 4

1Tee tee ninge Ovoring bakaang dai'nisie kontampiri botoramping makosina' bokururu'na' otorii'naang. 2Boonko noru'dariaing, banainge otori da'deng iiraroria'. Piaa oro'antaveri otorimaatoai tokoona' noru'deeria'. 3Tanuaang Meekunge tee dii' narung deeng-antarurining, teka aa'na' paarararimaatoai narung deentariri oto'koo mooareeri otorima. 4Mono tee narung otong nii'ke nko-antavampimaung Karistoo'nung, ee'noko Tanuaang Meekung tee narunge tee' nari' narung noru'koo oto'koo bokururu'nung. 5Ovoring narung otong, kapoo' masika'antavampimaung narunge, ntong-koo minkie meeka'anta narunge; 6Kumponing narunge tee Niuma nii' ookarai, nii' ookara taremuri niikaang birenge mintoomparama nii'koo kuung otomaung. 7Teka teieta bakaang maanto'ui oto'keta Karistoo'ke nii' kantemuru' namarana' teing avuavu'nanka tee' Daari Meekunge minkuvuu'na' aa'puma: 8“‘Tenang paning-koo deto koinura barampuri dai'nisinuka teie Ovoringe tankaampuru' tee avuavu'nanka teing nantoong.” 9Tee “deto koinuu'”-naare miru' aming? Tee aa' miru' ee': Tee tero napo' siaru'nung depeto kansi'koo boonavaro-koo. 10Tee ee'nara narung siaru'nung tee ee'nara napo' deto koinuu'nung paning-koo daunavaro-koo isipo' masipo' ootukunairu-koo maanto'antavaraa'naang. 11Ee'noko tee “avuavu' tankaampuru'”-naare miru' aming? Miru' aa' ee' oro': Nii'ning kara okovuri nkanuka deempuru', napo' nii'ning nakaronuka deempuru', nii'ning doorenang tampara daankivuma nanu'nuka deempuru' ee'noko nii'ning tanata nkonanka nau-antavaarima. 12Biikaang nko-nko Kumponing bakaning meekupoong bare-anta-koong dootuu'nupoong kake'iiariaina' ee'noko Karistoo' bakaang mono makosinuka panka'antavaavaina'. 13Bera tee nii' ookara narung deemariaing masika'anta-koo ee'noko Kumponing Bauring noru'na'koo, ee'noko naning-naummariri petaa'moriaing nari' basina' Karistoo' dakaosi'na' dupeari petaa'omana'. 14Teketa tee nantoong onou tasi'paa'nukai daang ampirinumparima~ aavamaariko toire' oki'nareka'pina' o'noriauka'nung amutemurii' daang-koong nau-anta siompampiritaa', aa'na' boo'ai nankara avitoitoi bii'urimana' dovinge uupuvuriko. 15Otoa', masikung narung minkuampima piaameeritaa' ootukumariri panka'mariaing Karistoo'naummariri, tee-koo kuung o'nori, niikaang bore' deemparako. 16Teie taremuriko nii' teing bakaang mono-koo-navio'nanka-pina' matauna' be'nu'mariri o'noring ee'noko naruna' makotumpiri pakumeeriaing nii' ookara tee ee'nara mono panka'antavampiri ee'noko purimariri piaae. 17Aung tee nkaang naunau dii' naurampimang Ovoring bakaang miringe dii' date'antarampima: Akoing tamunsi'nanka-pina' nkorariauka' kapoo' masikung deeaung siompaamaing-pina'. 18Teing biikaang noru' tee mutaanang, damisimainku teing tee-koo domaang Kumponinge amurimaung-koo. Aming-koo, nna' papaaranuka koonto', bore'ke deerenuka otorokotaa'. 19Anutua nkoarima maimaia'na' nko-koo avariri oto'nuka, naro'keta oko'okovurima aarumo ku'mi' nkoaamaing. 20Teka tee Karistoo'koo barerariru'na' tee' deea'. 21Dii'ke tee koonto' tampa' taaraveru' tee, ee'noko dii' tee-koo kuung otoritaa' bakaang kara masikung nauraariko barorontariru'. 22Urikanaung enang bakei kiru'dariaing teronung aarumo-koo otoriko'na'koong, mono narung bakaang noru' karaa'ke boo' tositosi-koong siompui otomaung dii' orari-anta-koona'. 23Diikaang onou ee'noko tanuaang neraka'antarariaing. 24Nerakanaung kuruntariai Kumponinge nkonii'naung, tee-pina' oro'naung, koonto'nuka, meeka'dariri otoriaina' masikung siomperi. 25Tee'koo enang bakerariaing tosi minku-eta. Masikung narung minkuerimatoaing tapo'deeri otorimaing ninka, ai' dii' teing narung mono-koo manta'deeri otong. 26Dii' iirarorima deeko' tee iira oramuriau deeng-antaveriauka'. Bointuriai duaa' mme' tumparavaruko. 27Sietani' doona aveauka' tee'. 28Tee bakisipung bakiaa' nko-ita bakearara bakaang birenge mintoong tampara kake'iiari nkovuai apuka'paravaing ninka tankaampuaina'. 29Kara orarananka minkueria' otoai, teka tampara to'biiari kara narung, pakureeri navureerima. Tee'koo taararaariaininge tee tampa' taararaariaing biraankeario'. 30Tee' nari' Tanuaang Meekung Kumponing bakaang orarunsi-antaveria' otoai, ai' tee Tanuaang Meekung tee Kumponing bakaang taa'ni'anta nii' moo'muriaing-koong asi'na'mung. 31Donta'dariri otorimaatoai aing aa'ning-eta', domang oraka' noru', iira, ioo', peusi', minkuminku ee'noko napo' too'de. 32Teka navureeri otorimaatoai dunsirunsi~antareerima, tonta'antareerima dii'ka Kumponinge Karistoo'koo kuunge tonta'antareruru'na'.

will be added

X\