Ephesians 3

1Tee'koo eentamaramaung dii'koo, ning ee'nara Paula', dii' pakurampimaung-koo dai'nisi Jiisuu' Karistoo' bakaang. 2- 3Dii'ke taarameru' dee'ma tee kapoo' makensi'nung daarirerompiring-koonaare ning-koo sira'pura Kumponinge makosi-antamuu'na' bakaang piaa dii' nau-anta-koo. 4Anka deeruerima ooveriaing tampa' tasi'pamana' tee kapoo' makensi'nung Karistoo'koong. 5Urikavarang pankaraamuriko tee sira'paravaruko' tee aung tee' enang Tanuaang Meekunge sira'antavuina' teing-koo bakaning-koo kara okovuri nkanuka-koo ee'noko nakaronuka-koo. 6Tee ee'nara makensi'nung tee aung kapoo' teing ee'ning Ju' deeaing nii' ninka tapo'meering Ju'nupoong ninka nari' barenku nkavampii'naang narung mono-kooning deemariri ee'noko narung maraka-anta-kooning Kumponinge deing, tee ee'nara Jiisuu' Karistoo'ke dupe-antavuu'nung tampara doorenang tavo'ura. 7Kumponinge tee maneenung taura' amuu' aung ee'nara doorenang tampara ookara nantoong nau-koong, makosi-antamui bakaang iri'ke. 8Ning-koo ee'nung-koo bakaning meekupoong ootukunung-eta asiranung masikung-koo Kumponinge tampa' taura'mui amuu'nung daankiama'naang teing-koo Ju'deeaing-koo tee doorenang tampara Karistoo'nung avuavu'koong bono'dopa. 9Ee'noko naumuu' siraka'antavama'naang ookara-koo tee Kumponing bakaang miru' makensi'nung. 10Uripo'keta tee teie ee'narai ootukunung kapoo' nkovuu'nunge tee baka noru'ui otoko' enang bakaning dootuu'nupoong donkompurinamu' sira'paraa'naang avatevaro mataunanka aa'ning-koo ovontung ee'noko iri'po'nupoong paning-nairu-kooning-koo. 11Tee ookara nkoaru'ning tee dupe-anta-koo tee Kumponing bakaang onou pupu'doma dopa-ita marovuu' tee-koo Jiisuu' Karistoo' niikaang Ovoring-koo teke taavoarara oparaa'naang. 12Ee'noko tee ninka narung deemariri masika'antavampima tasi'pampiri Kumponing-anko due'marira karavampiaing amaiaa'moria'. 13Tee tee enang kontampiri si'damping aa'dampima, tarua'doriauka' teing arikananka ninge dii' pakurampima kune'amaing-koo dii' meenasi-koo basi-anta-koong onoueri. 14- 15Tee tee tee tutumpama naurampirina' Kumponinge tampa' nkoruru'nung-koo tee'koo ning kinkinama eentamaramaung Niuma-koo aa'nung-koo ootukuna'kantu paning-kooning ee'noko kansi'kooning miring tampariri otong. 16Kunsimarama ee' eentamaramaung: Teie bakaang avuavu' maanto'ui oto'keta aruriaing tee purinto' ee'noko iri' tanuaang Meekung-etaing diikaang pankaruntoong-koo otoaing, ee'noko Karistoo' diikaang domang-koo unaavoi otoi otoaing baitoverio'. 17Napo' eentamaramaang piaa-koo daue du'durira ari'aruritaa' iveka'darii'naang, 18ee'noko tee' nari' makosirariri otoritaa' tampa' tasi'perii'naang ookara ninka Kumponing bakaning meekupoong ninka ookanairu-eta paaranang-koo makotua' tee piaa Karistoo'nung. 19Tee dii'ke mantomperi noru'erii'naang tee piaa punkaang~paa' dii' maanto'duri otoriaina' Kumponing-pina' nari' nariari oto'ke ookarai. 20Daangang otoaing Kumponing-koo deekoronoo' basiropa nkovumaung-koo eenta ee'noko noru'marimanoo'keta dau basinoo' tee ninka bakaang iri' nii'koo mintoomparamaung ninka. 21Ee'nara daangampampimaatoaing dootuu'koo naro'marima Jiisuu' Karistoo'ke pakumurio', ookavarantue doomeeritaa' botu kong paa'na'. Ee', tee' ee'na'.

will be added

X\