Ephesians 2

1Nii'nang tee dii' doori otoriko' boto-toto' ee'noko oraka'nko nkoverima. Tee' nkoverima kansi'kooning biikaang aarumo narung siomperiko'. 2Sietani' siomperiko', ovonturi biikaang bore' auvi'au-eta bakaang muu' tareaamaing, tee ee'nara Kumponing siomeevanuka-koo meu'ke mintoomparamaung. 3Nii' ookara tee'ke tero niikaang orara aarumo-koo amarima karaa' dovange boo'koo niikaang mono ee'noko onou piavoko'na' nari' siompampiko'ning. Tee tee nii' domang oraka' o'norikotaa' Kumponing-nung kiimata kompampiaining akoing-pina' nari'. 4Teka teie Kumponinge piaae maanto'ke aa'na' piaamurikotaa' bane nii' boto toto'ke moompiri o'noriko domang-antamuru' Karistoo' ninka nari'; 5Tee tee Kumponing bakaang avusiro'ke tee' domamuru'. 6Ee'noko domamurira Karistoo' ninka nari' napo' daa'muru' nari' tare-nupoong o'norii'naang tee ninka paninaumariri. 7Aing ookara kapoo'nanka tampa' nkomurima tavo'antavuu' tee-koo Jiisuu' Karistoo'koo dama'navarang nau-anta-koo bakaang avusiro'ke maanto'ari otomana' paaranang-koo makosi deeaung. 8Ai' Kumponinge avusiro'ari domang-anta masika'antaveru'noo' deeko' domantariru'ning, dii'ka deea', bauta'durima. 9Kapoo' nkoveriko tee' domanturia' maku'koo. Maroita, naning daangampara'neeng-koo. 10Kumponinge tee nii' o'norina' nari' nkomuru'. Teie Jiisuu' Karistoo' bakaning deemuri nkomuru' tampara nko-nko nkoevompimaa'noo'naang o'nori tero miru'muru'na'. 11Tee'koo tero oraka' otoriko'noo'koo ampa'doriauka'nung. Dii' teroita Ju'deea', dopa' toto'dariaruko'ning, tamunsi'nupoong tantaariko'ning, a'noo' teing tamung dau naro' dopa' toto'ke meeka'antavarima. 12Ampa'doriauka'nung tero tee dii' Karistoo'koong noru' otoriaruko', Isireeli-nupoong-eta taapo' otoriko'ninge, Kumponinge kara maraka-antavui naroompuu'na'koo damisimainkue, kansi'koo naro' bi'dariri domaang isikung nkana' noru' otoa', Kumponing pakurupeu'nung otoa'. 13Teka enang dii' tee teroita Pako'pari'nii' domanturira tareruriaing-koong ninka tapo'darira Kumponing-anko po'antarurining bakaang erenge tero taapo' isipo' otoriko'noo'keta. 14Tee tee Karistoo' tee niikaang mooa-nko. Teie tee naro'ka tapo'muring aa'ning Ju'nupoong ee'noko Ju' deeaing. 15Bakaang mono boo'koo avaru'noo'ke teie tee teteva'uu' tee ku'nung turanturang-koong siivenke'muri otoko'nung nii'. Moosesi-nung boto teka bakevui, mono etu-koong. Aing ookara kapoo' ee' oro' nkovuu'ning nerakariong nkovurii'naang aa'ning-eta Ju'nupoong ee'noko Ju'deeaing teie baka naro'kavurira pinau-anta-koo. 16Aa'barata'koo boo'paru'noo' tee turanturang bake-antavuu'naang naro'kamurira ookavitura Kumponing-koo navitu-pina'. 17Teketa' pora teie karantavurima~ daankivuu' tee doorenang tampara mooa-po'nung ookavitura-koo aa'noko Ju'deeaing ee'noko Ju'nupoong, dii' isipo'ke taapo'ke otoriko'ning-koo ee'noko teing Ju'nupoong tee-anko due'nupoong-koo. 18Ai' tee tee teie taung nkomemurio' nii' ookavitura Bauma-anko be'koo makotumpiri otong tee narung Tanuaang Meekung-koo kuunge. 19Enang tee dii' akoing damisimainku otoria', teka dii' osikaiaang deentariri otoring teing ninka nii'ning bakaning meekupoong ninka nari', ee'noko Kumponinge tarevurimaing-kooning dii'. 20Dii' Kumponing-nava kani-nupoong tee' pau'deeri otoring teing-koo kara okovuri nkanuka ee'noko nakaronuka~koo dau, Jiisuu' Karistoo' tee ee'nara ookara-koo e'manianare' makosi, tumanung. 21Tee-koo ootukunung nari' be'nu'ariri otoi kaniari otomaung dootuu'nava pankava deempari Ovoring-koo. 22Ee'noko dii' nari' tee-koo otoritaa' tee-koo kanirariri otoring Kumponing oto'doma deentariri Tanuaang Meekung-koo kuunge.

will be added

X\