Ephesians 1

1Aung ane' karavoto~ ninge Paula'ke Jiisuu' Karistoo' bakaang kara-okomui-nkai Kumponinge miru'muio' dii' bakaning meekupoong Epesesie otorimaing daarirerompimang, dii' ee'ning Karistoo'koo baitorarimaatomaing. 2Biraanke ee'noko mooa dii'koo otoaing Kumponing Niuma-itaing ee'noko teieta Ovoring Jiisuu' Karistoo'. 3Tampara tampampiaing tee-koo tee Kumponing ee'noko Bauma teie niikaang Ovoring Jiisuu' Karistoo'ke, tee ee'nara Karistoo'koo kuunge biraankemuru' ookara biraankenankai Tanuaang Meekung-etaning paning-koo otoromainge. 4Aa'nong teroita kansi' mme' pupu'aravaruko-ita miru'muru' Karistoo'koo kuung o'noritaa' meeka'mariri o'norii'naang tuumpimaria' tee-koo dutakanoo'ke. 5Tee tee piaamuritaa' miru'muru' baurukaa' deemarii'naang Jiisuu' Karistoo'ke makosi-antamurio' baka bakaang piai, maroita. 6Teie tee' nkomuru' daangampampiaina' tee-koo avuavu' maneenung-koo Bauring Piaaru'koo kuunge avusiro'ari amuru'nung-koo. 7Karistoo'ke bakaang erenge moo'murira makosi-antamuriko Kumponinge niikaang oraka' nkonanka tonta'memurira unaa-antamuru'nung; 8Tee'koo bakei aa'na' maanto' bakaang piaae nii'koo piampuu'nunge, 9tee ee'nara bakaang mataue tavo'antavuu' bakaang noru' ninka Kumponinge sirapo'antamemurima kapoo' makensi'nung teie tavo'anta-koo piavoko' Karistoo'koo kuunge. 10Tee aung ee'nara: Uripo'keta teie marovuko' tee Karistoo'koo ookara naro'urii'naang bateinang makotuko aa'ning paning-nupoong ee'noko kansi'nupoong, ookara-koo bore' deempari. 11Ookara kapoo' tee Kumponinge matauvuma miru'umana' nkoaramaung, ee'noko nii' tee'ke Kumponinge bakaning deemarii'naang miru'muru' Karistoo'ankoi tutuntomaa tampuu'na'. 12Bakaang matau ee': Nii' urompiri Karistoo' nempampimainge nantoong daangang-antavarampiaing bakaang meenasi-koo. 13Ee'noko dii' ee'ning nari'ke, Karistoo'ankoi baitorariru'ning kara masikung taaraverira tee doorenang tampara dii' domanturiaing-koong. Ee'noko bakaning deentariko date'antaruri Tanuaang Meekung aruru' bakaning avurii'naang maraka-antavuu'nung. 14Tee Tanuaang Meekung nii' amuru'nung tee tasi'anta-koo nii'ke nkavampiaing ootukunung barenku tero naumuru'na'. Tee kompampirio' Kumponinge asi'na'mung dupe-antavui oko-antamuriaing, nii'ke tee daangampampiaina' meenasi-po'nung. 15Tee'koo ninge taaravamira dii' masika'anta oto'deruring Ovoring Jiisuu'koo ee'noko diikaang piaa ookara Kumponing bakaning meekupoong-koo, 16tenang-eta deto taararampira dotumaramaung kunsi-koo tantampima. 17Ee' eentamaramaung: Teie Kumponinge niikaang Ovoring Jiisuu' Karistoo' bakaange, Baumai Meenasi Okovenunge aruriaing tee Tanuaang matau dii'koo siraka'antavuaing bakaang kara-koo miru'noo' dii'ke tasi'peria'naang tee Kumponing. 18Ning eentamaramaung diikaang domang-koong dutai siraka'antaruriko dii'ke tasi'perii'naang tee barenku bokumurira bamuru'nung, ee'noko bakei aa'na' maanto' meenasi-po'ning otoromana' teing biraankenanka bakaning-koo meekupoong-koo maraka-antavuru'ning tankee'eeaining. 19Ee'noko napo' eentamaramaang tasi'perii'naang iri' aa'na' pankaing nii'koo baitomarimaing-koo sipuing, paaranang-koo makosi deeaung. 20Tee aa'nung iri' baukoni'ke kompui Karistoo' boo'keta daa'antavura tampavine-koo Kumponing-koo ba'nang-antavuu' paning-koo Ovoring-antavui. 21Teenoo' Ovorinoo' tee deu basi anantenaung-koo: ookara tare-nupoong, pankainuka, purinto'po'nupoong, ovontung ee'noko ootukunung amutemurii' miring-po'nupoong, enanariong ee'noko dama'nariong napo' nari'. 22Tee tee Kumponinge ookara kapoo'nanka Karistoo'koong kau'koo boong sipuma Karistoo' tee bore' deeng-antavuu' ookara kapoo'nanka-koo dootuu'nupoong tampa' pakuvuriaina', teing tee bakaang mono makosinuka. 23Ee'noko tee-pina' bore' mono ninka be'nu'ura dupearapeu'na' tee' nari' Karistoo' dupe-anta baka dupearavaing ootukuarara.

will be added

X\