Colossians 4

1Dii' tanata nkonuka, teing diikaning dii'koo mintoomparimaing makosina' tampa' nkovererimaatoai, ee' noru'eri, “Nii' tee'ke niikaang Tanata-nko paning-koo oto'memuring.” 2Kunsi-koo uaaroria' otoai onou tanterariri Kumponing-koo tampa' tamperima. 3Ee'noko nii' kunsi-koo pakumererimaatoai, Kumponinge nii' karanaang daate'memurii'naang tee doorenang tampara Karistoo' bakaang tero baku'ari otoko'nung daankiampiaina', tee tenaare aa'naare ning anke kiimatamari o'nong. 4Napo' ning kunsi-koo pakumeriai ninge tee kara tampa' siraka'antavampaina' tee' ninge minku-koo makosina' minkuama. 5Teing ninka mutaanang-nupoong ninka otori mataurariri nanirimaatoai batei tamung kera'peria'. 6Kara-koo mataurariri nari' karerima aroo'antana' karerimaatoai, ee'noko maku'erima to'biirariri karerimaatoaina'. 7Tikikasie tampa' naururiaing dii' teing ookara kapoo' ninge nkoamaing. Tee aung Tikikas tee nii'maiko' masikung, tee nii' ninka nari' Ovoring bakaang botovotonaa' kake'iiari mintoomparamaung Ovoring-koo. 8Ninge dii'anko botoamaang dii'ke nii' o'norina' noru'erii'naang ee'noko teie dii' napo' kuaa'antaruriai diikaang domang. 9Napo' Onesimas nari' Tikikas ninka botoamaang, tee napo' tee'ke tee narung nii'maiko' kake'iinung, tee diikanavuntu'nung narung. Tenaankai nauraariaing kapoo' ookara anke nkoaramaing. 10Aristakasie tampa' tang botovumaang dii'anko teie ni'ninka kiimatanava-koo nari' o'noremaunge, napo' teie Maaka'ke, Baanabas baara'ma'nunge, tampara tampumang dii'koo. Tee aung Maaka' tee dii'anko beko tee tampa' onkeonke'eriaing tee' naurampiru'na'. 11Narung napo' teie Jiisuu' Jasitasie tampa' tang dii'anko botovumaang. Anaanka nanaanka Ju'koonaanka masikaanka teing-koo mintoong-koo pakumaarimaing-koo Kumponing bakaang muu' kani-anta-koo. Tenaanka mmarang-koonaanka deempareko nari' o'noritaa' tampa' mantomaramaung. 12Napo' diikanavuntu'nunge Epaparasie dii'anko tampa' tang botovumaang, teie Jiisuu' Karistoo' bakaang botovotonaa'ke. Teie tee dii' kunsi-koo aa'na' iri'oi pakururimaung, dii' purintariri otorii'naang petaa'dori, ee'noko Kumponing bakaang pia koonto' tasi'periai dii'ke. 13Ninge tee tampa' masika' noru'ansi o'nong tee, tee'koo ninge ee' naurampimang: Tee tee bakei pore'omaung dii' Kolosi-nupoong tovang paku-koo, Leodesia'nupoong ee'noko Aiaapolis-nupoong. 14Napo' teie Luuke'ke niikaang dokutai domang-eta aa'na' piaavampimaunge Dimas ninka nari' tampa' tampuremaang dii'koo. 15Enang tee dii'ke nkaang tampa' tang teing nii'maikorori' Leodesia'ke otoromaing nauereriaing ee'noko teni Nimpa teing ninka nari' bakanava-koo dootuu'arimaing ninka. 16Aung ane' karavoto deeruaako taareverirai'nange dii'ke napo' dootuu'nupoong Leodesia'ke otoromaing-aape botoveriai teinge napo' deeruaavaina', ee'noko napo' tene' Leodesia'aape botoantu'nane' tee'ke, dii'ke napo' deerueriai. 17Ee'noko Akipas nauerima aa'periai, “Dake tee nko-nko Ovoringe aruu'nung tampa' dupe-antaveaing.” 18Aung tee anairu karavoto-koo basinairu ninge ninka ane' kompansi nkaang birenge daariamang tampa' tang botoanko nkaang taa'ni'anta ooverira tasi'memurii'naang. Kunsi-koo norunoru'merimatoai, ai' ning tee kiimata-koo sieenai dai'mari o'nong. Tee biraanke tee dii' ninka nari' otoaing. Ee', tee' nari'.

will be added

X\