Colossians 1

1Ning tee Paula' Jiisuu' Karistoo'ke kara okomui nkavama'naang miru'muu'nung Kumponing piavou'na'. Aung Timoti mmaiko' nari' pakumui daarirerorompimang dii' nee'maikorori' teke Kolosi-navuntu'koo otorining, dii' Karistoo'koo mutekaro'dariri baitorarimaing, Kumponing bakaning meekupoong; 2Biraanke ee'noko mooa dii'koo otoaing Kumponing Niuma-itaing. 3- 4Epaparasie naumuresio' taaravampetu' tee diikaang masika'anta Jiisuu' Karistoo'koo ee'noko napo' tee diikaang piaa nari' teing-koo nii'ning Kumponing bakaning meekupoong-koo ookara-koo. Tee'koo nee'ke tee neekaang kunsi-koo ookara batei-koo tampara tampampemaung tee-koo Kumponing tee niikaang Ovoring Jiisuu' Karistoo' Bauma-koo. 5Dii'ke nemperimaung nooruupieri tee biraanke Kumponinge te' paning-koo kinkonteruru'nung dama'ke komperiaing, ee'noko tee nooruupi te' okora'ario' dii' tee' baitorariri piaareerimaung tenang tee doorenang masikung ee'noko tampara tutung nauraario' taaraveru'nang-eta. 6Ookara kansi'koo teie doorenang tamparai mmau' nantoong bere'antavurima biikaang aarumo paari-antavurimaung tee' nari' dii'koo mintoomparamaatomana' te'mung-eta doompeto tee Kumponing-nung piaa otoina' masika' punkaamperitaa' tutung taaraveru'na'mung-eta. 7Tee tee aung doorenang tampara dii'ke teie Epaparasie, nii' ninka nari' narung botovotonaa'ke aa'na' piaavampimaunge, naururio' taaraveru'nung, tee nkaang noru' siompui dii'ankoi kake'iiari mintoomparamaung Karistoo'koo kuunge. 8Teie napo' nee' naumuretu' tee' piaareerimana' Tanuaang Meekung-koo kuunge. 9Tee'koo nee'ke dii'koo tutung taaravampetu'noo'keta kunsi-koo uaamoreaung dii'ke noru'erii'naang tee bakaang pia dii'ke dupe-anta-koo, ee'noko maanto'antararii'naang teie Tanuaang-aapenung noru'ke ee'noko mataue. 10Tee' kunsimarekoo' dii'ke aa'noo'naang: tampa' Ovoring-koo makosina' otoriai ookamentai tee dotu-antaveriaina', sinang tampara nkaveriai tee-koo ookara nko-nko tampara-koo, ee'noko Kumponing aa'na' punkaamperi~ noru'eriai. 11Napo' tee'ke nee' kunsimaremaunge dii' puring-antarurii'naang teie iri'ke deto basie Kumponing-etainge meenasi-po'nunge tee kapoo' ivekeng tavo'kuaining-koo tampa' nari' purintariri dotu ninka mii'kiri otorii'naang. 12Ee'noko doturariri Niuma-koo tampa' tamperimaatoai nii' ookara makosi-antamuru'nung-koo tee barenku nka-koo, teing ninka nii'ning Kumponing bakaning meekupoong ninka nari' araka-kooning ninka. 13Ai' Kumponinge tee nii' Sietani' bakaang muu' mutaanang-eta moo'muru'nung ee'noko teie Bauring aa'na' piaavumaung bakaang muu'aape kuung po'antamuru'. 14Teie bakaang erenge boorimurima orara aarumo bakaang iri'keta unaa-antamuru'. 15Tee tee Karistoo' tee Kumponing oro'paravaung-koong siuraampi~ tee Kumponing masika' otoina' oro'antavumaung, Karistoo', tee Ovoring, uro'mara' makosi, ookara kapoo'nanka Kumponinge nkovuru'ning-koo dau basi. 16Ai' Karistoo'ke tee Kumponing-koo kuunge ookara kapoo'nanka nkovuru'nung kansi' kooning ee'noko paning-kooning, ooarampimaing ee'noko oo-paa'ning, teing tanuaananka ee'noko biikaang ovontunanka nari', piatooronuka~ pina' avatevaatang-koo otoroining. Teing Karistoo'ke nkovuru'ning, ee'noko Kumponinge Karistoo'koo boong oto'koo miru'uru'ning. 17Tee tee ookara kapoo'nanka nkoaravaruko otoko', ee'noko ookara kapoo'nanka teie kompuri otoko deeko' otoromaung. 18Ee'noko tee tee bore' bakanavitu dootuu'nupoong-koo. Ee'noko bakanavitu teing tee-koong mono makosinuka. Ee'noko tee tee ookara-koo okora'. Tee tutuna'nung boo'keta daa'koo. Tee'koo tee tee ookara-koo bore' deempari otomaung. 19Ai' Kumponinge tee bakaang tampara aarumo ookara Bauring-koo miru'ura tee-koo dupeario' oto'antavuu'. 20Ee'noko tee-koo Jiisuu'koo kuunge Kumponinge ookara kapoo'nanka osikoimpuru', aa'noko kansi'kooning ee'noko paning-kooning, mooa tavo'ura bakaang erenge aa'barata'koo booma. 21Ee'noko dii' tee'ke nari' osikointuru'ninge, tero tee Kumponing-eta isipo' otoriko'ning tee-koo kare-nupoong deentariri, diikaning norunoru'nanka siomperima ee'noko nko-nko oreng. 22Ee' dii' teing enang Kumponing ninka napo' navu-antanii'nuka bauring bakaang monoi naning-naumpario' boo'koo taura'puu'nung-koo, dii' kiiroraa'daririo' meeka'nisinuka baka-koo uro'kanoo' po'antarurii'naang. 23Teka dii' teing enang be'nu'antarariri otoriaing diikaang masika'anta ninka, tampa' e'maniri pinka'dariri. Teieta nempampimaung-koong noorupi-eta diiri'dariauka' tenang tee doorenang tampara taaraveru'nang nkaveru'nung-eta. Ai' tee tee doorenang tampara ookara-koo nantoong Kumponinge paninga boonamenge nkovuru'ning-koo daankiampimaung. Ning Paula' teie tee doorenang nkavui nanu' deemaru'nung. 24Ning tee enang dotumaramang teing manki'nanka kune'amaing-koo dii' pakurampima, ai' tee' nkomarama nkaang monoi dupe-antavamaung teing sisikeerananka Karistoo'ke miru'muu'ning tora'koo bakanavitu dootuu'nupoong pakuarama, bakaang mono makosinavitu. 25Ning tee Kumponinge baka botomuio' dootuu'nupoong biikaang kara-pare' deemaru'nung dii' paku-koo, tee Kumponing bakaang kara opansi sira'panko dii'ke noru'erii'naang. 26Tee kapoo' makensi'nung otomaung mare' mmau'koo ee'noko napo' teing-koo nantoong kansi'koo-nupoong-koo, teka enang asi'namu' sira'paring teing-koo bakaning meekupoong. 27Kumponing bakaang pia tee teing ookara nantoong amutemurii' noru'anta-koo tee kapoo' makensi'nung tampara masikung, Ju' naing deea'. Tee kapoo' makensi'nung tee aung ee' oro', Karistoo' tee dii'koo kuung otong ee'noko dii'ke tee enang nemperi otong bokururira paning-koo be'antarurii'naang. 28Nii'ke tee tee doorenang Karistoo'koong ookara nantoong sirakura' nau-antavarampimaung amutemurii' noru'nanka-koo pakuarampima, teing ookara Karistoo'koo petaa'oroaina' tautauarampima. 29Tee'koo ning pore' kompamaung aa'na' mintoomarama Ovoring bakaang iri'koo e'manansi tukomuko mintoomaramaung-koo.

will be added

X\