Acts 8

1Ee'noko Sooloi tee tampa' noru'uu' tee' Sitiveni boo'paru'na'. Ee'noko te'mung-eta deto aa'na' oraka' nkoaaru'nung teing dootuu'nupoong teka Jerusalema'ka, ee'noko teing teketa purarenka'eu' avitoitoi aa'ning-koo Judia' ee'noko Sameria'nameensi'koo, nka teing kara okovuri nkanuka tenkenaava'. 2Teka nii'ninge Kumponing-koo mee'du'piariri otoroko'ninge dako'au' tee Sitiveni aa'na' birompaama. 3Teka teie Sooloi tee tooreerevuriko' teing dootuu'nupoong pava kantevui tumparama bera donkaang ee'noko manii' barampurima kiimatanava-koo sipuriko'. 4Enang tee teing purarenka'ariru'ning avitoitoi nanaama Kumponing bakaang kara daankiau'. 5Pilipi' tee Sameria' osi pankaing-koo beu' ee'noko teing-koo daankiarama aa'puu', “Jiisuu' tee naning Kumponinge tero Pako'pari'uu'nung~ nantoong domampuri tarevuriainoo'koo.” 6Ee'noko tenang karingai tee taaravaara ee'noko ooaama taa'ni'antananka teie nkovuko'ning domang-eta barorompariko' Pilipi'ke minkuvuko'ning-koo. 7Ai' nantoong mmau' ma'narie orenge koriaariko'ning unaavoroko' tenang ma'nari uiarima taapo' teing-eta bakoariko, ee'noko nantoong karinga dootananka ee'noko kaikuu'nanka unaavoroko'. 8Bera tee temono-nupoong aa'na' dotuariko'nung. 9Teka teke osi pankamono-koo tee naning miring Saimoni' aa'na' biivimparama otoko'nung ma'nari biikaang iri'ke ta'nimpaarii' nkovuma. 10Pankaroong bakaang bankinie aavavuriko bera teinge Sameria'nupoonge asikovurima siompaako'; 11Ee'noko teinge ookarai temono-koo otoroko'ninge ee'noko biikaning ovontunankai tee narung barorompaako' aa'paama, “Aung naning nii'nara Kumponing piikonara deto basi.” 12Teka tenang Pilipi'ke doorenang tampara daankivuu' Kumponing bakaang muu'koong ee'noko tee muu' tarevuaing Kumponinge tero Pako'pari'uu'nung tee miring Jiisuu'. Teinge tee taaravaara ookara, donkaang ee'noko manii' masika'antavaara ntong-koo minkiarira meeka'antavariru'. 13Tee Saimoni' ee'nara bere'arara nari' masika'antavau', ee'noko dama'ke ntong-koo minkiarara meeka'antavarara Pilipi' ninka nari' nanureko', bera taa'ni'antananka ee'noko nko-nko ta'nimpaarii'nanka oovuma asikovuko'. 14Enang tee kara okovuri nkanukai Jerusalema'keta ee' taaravau', “Sameria'nupoonge Kumponing bakaang kara taaravaing.” Ee'noko teinge Piita naanka Jooni te' botoaaretu'. 15Bera te' poreta kunsiaaretu' temono-nupoonge Tanuaang Meekung nkavaava'naang. 16Ai' teing ookara tee Tanuaang Meekunge mme' korivuria', tamung ntong-koo minkiarira meeka'antavariru'ning Jiisuu' Ovoring bakaang miring-koo. 17Bera tenang teing-koo tenaankai beekaang bireng pante'aaresio' Tanuaang Meekung nkavau'. 18Enang Saimoni'ke tee tenaankai kara-okovuresi-nkarai bireng pante'aareko Tanuaang Meekung nkavaako oovura, temurii' iri' mooni'ke moo'koo piavou'. 19Ee'noko bera aa'puu', “Ning amereai tee temurii' iri', ee'noko baa naning ninge nkaang tanka' pante'ampaing Tanuaang Meekung nkavuaing.” 20Teka Piitai aa'puu' tee, “Tee ninka dakaang mooni' ninka da' nari' paa'daravaing ee' noru'emaatomaung-koo Kumponing bakaang avuavu' mooni'ke pa moo'koo makosi. 21Da' dakaang deea' aung ee' oro' kapoo' nko-koo, ai' da' dakaang domang tee koomparava' Kumponing-ankoi. 22Kiimata-koo aroreitaa' deeko' bere'daravai da' teieta aung-eta dakaang onou orara-ita, ee'noko kunsiraravai Ovoring-koo dakaning oreng tonta'deruaina' baka makosivura deeko'. 23Ai' da' tee ninge mamairoi maanto' ooramaang ee'noko oraka'nkoi dai'dui otong.” 24Ee'noko Saimoni'ke maku'uma aa'puu', “Dee' kunsirareaing Ovoring-koo teing kapoo'nanka minkuveresining ning-koo basiaravauka'na'.” 25Ee'noko tenaankai Jiisuu' mintoomparako oovureko'na' sira'puresi nauaaretu' teing Sameria'navuntu'koo otorou'ning, ee'noko Ovoring bakaang kara daankivuretu'. Teketa Jerusalema'aape toroaretu' daankivurema tee doorenang tampara osinanka mmau'koo Sameria'nameensi'kooning-koo. 26Teka narunge koosinunge~ Ovoring bakaange Pilipi' aa'puu', “Danto beaing tevung-koo taunavung Jerusalema'keta Kasa-aape be'navung-koo.” Tevung ee'navung teke mee'bora'ke nanu'navung. 27Ee'noko tee i'amparara nanuma narung Itiopia'koong oovuu', naning pankaing, do'ma'nii', teni Kandesi, Itiopia'nupoong biikanani ovorinaang bakaang mooni' tarenara; 28Ee'nara Jerusalema'aape pou' dootuu'araa'naang ee'noko toroarako' teketa' bakaang kaarisi-koo ba'nanui deeruvuma nanuko' Daari Meekung teie temu'nung nakaronarai Aisaia'ke daarivuu'nung. 29Ee'noko Tanuaang Meekunge Pilipi' aa'puu', “Deto bera kaarisi-ankoi due'ke nari' naniai.” 30Teketa Pilipi' kua'paru' tee-anko ee'noko teie tee temu'nung nakaronung Aisaia'ke daarivuu'nung deeruvuko taaravuu'. Ee'noko tee Itiopia'koong nia'uma aa'puu', “Dake ee tee kapoo' deeruematomaung tasi'pemaang?” 31Ee'noko teie aa'puu', “Arekee' ninge tasi'pampeu' naninge pakumuaruko?” Ee'noko Pilipi' bokuvuu' deto koinura tee-anko ba'nanuu'naang. 32Tee kara Daari Meekung-koo deeruvuko'naare anaare: “Kumponing bakaang bautara dupisi'aava'naang nkoaako karang kamaankuauka'nung tee' nari' sipisipi'nu amakoarapeu'na' nantoonge tavu'doma barampai beroko. 33“Teinge poore'aama kara koonto'na' simpe'evaavauka'. Teing nantoong bakanavarang-kooning bakei aa'nupoong: tee bakaang domaang teie, kansi'keta koonto' tonta'aavaing.” 34Ee'noko teie Itiopia'nunge Pilipi' aa'puu', “Ee aung, teie nakaronarai baa tee' minkuvuu'? Baka minkuaru' ai' nii'nung tee' minkuvuu'?” 35Tenang ee'nang Pilipi' karoma tenaare Daari Meekung-koong deeruvuu'naare-ita tutumpuma tampara doorenang Jiisuu' Karistoo'koong nauvuu'. 36Ee'noko teketa nanurema taunge ntong-po'noo' basiaretu'. Ee'noko teie Itiopia'koonge aa'puu', “Ooveko ntong aung. Aminge avo'mupeu' ning enang ntong-koo minkimarara meeka'anta-koo?” 37Pilipi'ke aa'puu', “Tee aa' kapoo' otoa', dakaang domang-eta koonto' masika'antaveing deeko'.” Ee'noko teie maku'uma aa'puu', “Masika'antavansi o'nong tee Jiisuu' tee naning nii' domamuri taremuriainoo'koo tero Pako'pari'nii', Kumponing Bauring.” 38Ee'noko tee ee'nara botoaru' tee bakaang kaarisi te' datearaa'naang, ee'noko tenaanka ookaanka Pilipi' ee'noko tee Itiopia'koong doonko ntong-koo siareta Pilipi'ke teka ntong-koo minkivura meeka'antavuu'. 39Ee'noko tenang ntong-eta deto taapo' poreko Tanuaang Meekunge Ovoring bakaange Pilipi' namu'ke deto batusi'uu', ee'noko teie Itiopia'koonge napo' kemu'kana' oovuaruu' teka. Teketa dotuarama danto nanuu' bakanoo'aape. 40Teketa Pilipi' Asotasi-navuntu'koo oro'paru', ee'noko teke tankinuma ookara osi-koo tee doorenang tampara daankivuma nanuu' bera Sisaria' basiaru'.

will be added

X\