Acts 4

1Ee'noko tenang Jooni naankai Piita teing nantoong karavaareko teing piristi'nanka ee'noko pava dootuu'nava pankava orokovui tarenuka~koong bore' ee'noko teing Noru' Pitunavitu~ te' tenaanka-anko porou'. 2Porora teing aa'na' iiravorou' taaravaara tenaankai Jiisuu' daankivurema nantoong boo'keta daa'ariaing minkuvureko. 3Ee'noko aa'na' kamunoo'uio' teinge tenaanka dai'aareta kiimatanava'koo sipaaretu' bera dauna'mung-koo basinoo' otoree'naang. 4Teka mmau'ke tenaanka-koo tee kara taaravau'ninge masika'antavau'. Ee'noko deerunoo'koo teing nantoong bere'ariru'ning pa'noko' kokorei'koo~ basi. 5Teketa dauna'mung Ju'nupoong koompaara'navitu naro'ariru' aa'ning tarenuka, pankenanka ee'noko boto naunuka. 6Aanasi, tee ookara-koo dau basi piristi', ee'noko teing donkaang tee ninka Kaiapasi, Jooni ee'noko Aleksanda' narung puata'kooning nari' porou' te' Jerusalema'. 7Ee'noko tenang teinge tenaanka meu' ba'nang-antavaareta nia'aareko' aa'paarema, “Iri' ee'noko miring baa bakaange tee aung amurii' nkoveremang dee'ke?” 8Teketa' tee Piita Tanuaang Meekunge maanto'ui aa'puru' teing, “Dii' tarenuka ee'noko nantoong-kooning pankenanka, taaramerereriai. 9Dii'ke e'mung nii'na' noru'erima tuutunamererimaatomaung deeko' kapoo' tampara nkoampetu'nung-koo aung-koo kau' doota-koo, ee'noko tee' taarevou'na' noru'koo piaroriko deeko' makosi. 10Naurarampiko tee aung tasi'periaing dii'ke ee'noko ookarai Isireeli-nupoonge tee Jiisuu' Nasareti'nung tee Domamuri Taremuriainoo'koo Tero Pako'pari'nii' bakaang miring ninka tee' nkoampesing. Tee ee'nung, dii'ke aa'barata'koo dupisi'eriko Kumponinge boo'keta daa'uu'nung, tee bakaang iri'ke aung naning dii'koo dutakanoo'ke tampa' otoi donkonui otong. 11Daari Meekunge tee naning Pako'pari'nii' miru'ui ee' minkuvuu'nung, ‘Are' ee'nare' kapanare' dii'ke pava kaninukai poore'erima dua'eru'nare' enang ookutunava-koo e'manianare' tumanare' deempario' tasi'periaing!’ 12Ee'noko nii'nung domaang moo'muripeu'nung otoa', Jiisuu' narung. Bakei, ookutunairu-koo paning-koo boonameng-koo nii'nung otoa' bakaang miring bokuampiko domamuripeu'nung.” 13Enang tee teinge tenaanka Piita naanka ee'noko Jooni avororea' deravareko ooaareta ta'ninau'nung, tamunsi'naanka, tampa' barearearuu'naanka-pina' noru'aarema. Teketa tasi'paaretu' Jiisuu' ninka nari' otoreko'naanka. 14Teka tee naning taarevou'nung tenaanka-koo due' donkonuio' ooaama teinge kapoo' minku-koo makosiaavaruu' tenaanka too'deng-koo. 15Bera koompaara'navitue dama'du botoaareta bii'ka makenge minkuarima aa'pau', 16“Arekee' nkoarampii'naang nii'ke anaanka? Ai' ookara Jerusalema'nupoonge tee noru'ai otong ta'nimpaarii' pankaing nkovuresing, ee'noko nii'ke penkempampiarupeu'. 17Teka nantoong-koo avitoitoi beremparavaroo'naang deeko' potearampiaing anaanka napo' aung ninka miring ninka naning karavureauka'na'.” 18Teketa tee napo' bokuaareta poteaaretu' koonto' minkuvurearoo'naang ee'noko nau-antavaarearoo'naang Jiisuu' bakaang miring-koo. 19Teka Piita ee'noko Jooni naankai maku'aarema teing aa'paaretu', “Arekee' tampa', dii' nantoong taara-koo ai' Kumponing? Kumponing-koo dutakanoo'ka maku'na' enang noru'eriai. 20Nee'ke nii'na' bere'koo makosi deea', teka tee' nari' taaravampema ooampetu'na' minku-koo makosi.” 21Teketa teinge tee sisikeera avaarepeu'na' papaaravau', ookarai nantoonge Kumponing daangampaako tee-koo nkoaru'nung-koo. Ee'noko aa'na' avoro'antavaareta sipaaretu'. 22Ai' tee aung naning ta'nina' taarevou'nung tee bakaning mare' karenaumo kivora divu'. 23Teketa tee Piita ee'noko Jooni sipaaresio' bee'maikorori'anko bereta nauaaretu' kapoo' teinge piristi'nuka-koo ovontunge ee'noko nantoong-kooning pankenankai minkuau'ning. 24Ee'noko tenang teinge taaravaara tee teing deto aa'na' nari' kareau' Kumponing-anko aa'paama, “Ovoring, da' Kumponing ookara kapoo' nkoveu'nung aa'nimpo', paning ee'noko kansi' ee'noko pirung. 25Dake Tanuaang Meekung ninka temu'nung niuma Deevita', dakaang muu' uripo' tarevuko'nung, karantavema aa'peu', ‘Aming-koo teing akovituri iira ninka daa'arimang? Aming-koo nantoong oraka' makotua'na' nko-koo maroarimaunge! 26Ookara dauraronanka kansi'koo otoromaing tavu'koo maamuariri otorong. Pankenuka naro'arira otorong tee Ovoring turang-koo ee'noko tee tero Pako'pari'uu'nung nantoong domampuri tarevuriainoo'koo.’ 27“Masika' minkueing, aa'noing Eeroti' ee'noko Poontiasi Pailati', Ju'nupoong ee'noko akovitu nari' tapo'ariring aung-koo osi pankaing-koo Jiisuu' turang-koo, tee dakaang muu' tare-koo dake pako'pari'eu'nung. 28Teing naro'ariring nko-koo ookara kapoo'nanka dake dakaang iri'ke ee'noko piai tero miru'eu'ning tavo'araa'naang. 29Enang tee mau'mau'maariko ooverira Ovoring iri' ameriaing dakaning botovotonaa'nuka dakaang kara amorompia' sira'pampiaina'. 30Ee'noko dakaang bireng tovoro'daravaing nantoong taare-anta-koo, ee'noko taa'ni'antananka ta'nimpaarii'nanka nko-antamemuriai tee dakaang botovotonaa'koo kuunge miring Jiisuu' tampampiko.” 31Enang tee kunsi bakeariko te' ee'noo' teing oosiariru'noo' danu'arako ookara Tanuaang Meekunge maanto'uru', teketa Kumponing bakaang kara sira'paako' avoreaava'. 32Enang tee tevitu ookutunavitu masika'anta-po'navitu domang nari' noru'arima nari' mantompariko'. Naninge ee' tampua': Kapoo' ning oto'memuining ninka nkaning, teka teing ookara kapoo' nari' oto'evoroko'. 33Ee'noko tee ninka iri' pankaing ninka teinge kara okovuri nkanukai Ovoring Jiisuu' boo'keta domamparu'na'koong kara ooau'na' sira'pau', ee'noko ookara biraanke-po'nupoong deempariru'. 34Naning kapoo'koo ata'oi' otoaruu' teing-koo meu'ke, ai' teinge ookarai aa'nong teing kansi'po'nupoong ee'noko pavapo'nupoonge kanteariri baaveaama moo'noo' nkavaama kara okovuri nkanuka-anko tavo'aako'. 35Ee'noko teing naruna' naruna' bii'ka tankaampeeko' ata'oinku-koo. 36Narung pakupaku nkovuko'nung tee Josepa', nii'na' “Banabasi” kara okovuri nkanukai tampau'na' (miru'noo': domang kuaa'anta bauko) Liivai' bakanarempo'koong, Saiparasi-namui'nung. 37Teie ee'nunge kansi'nameng baavevura mooni' kara okovuri nkanuka-anko tavo'uu' tankaampaava'naang.

will be added

X\