Acts 28

1Teketa tee' domamariru'noo'keta nii'ke noru'ampiru' temui' mui'namui' miring Maalta-namui'. 2Ee'noko temui'nupoonge nantoonge aa'na' bakei navumaaru', onkeonke'maarima aa'nou' nta' betu'memaaru' tenang ee'nang apo'uma kamaari nkoarako. 3Paula'ke tee koi'nanka oosivuma nta'koo betu'uko tenang tee boru' doparopa-po'nung nta'ke uipaarii'oko teketa bakoarara Paula'koo bireng-koo kakiaru'. 4Tenang teinge nantoonge temui'nupoonge ooaara teu boru'nu bireng-koo bi'ari otoko teinge aa'paako' bii'ka kareaama, “Aung naning pa dupisi'nko deemparako bane aareri-eta domampari, teka teie kumponinge mero'nkoi domang-koo taura'pua'.” 5Teketa Paula'ke tee boru' nta'koo tanka'ni'pura baike kune'ua'. 6Teketa teinge tee nempaako'nung doremparara nii'noo' boo' dua'arako ooaava'naang. Teka pankaroong nemparikotaa' tee-koo kapoo' basiaravaruio' teinge norunoru' paariarira aa'pau', “Aung tee kumponinanka-koo narung.” 7Narung ovo'ma' pankaing temui'koong miring Publias teke kansi' oto'evuko'nung simariru'noo'ke due'ke. Teie ee'narai bokumurira onkeonke'murira beenang doong-koo o'nori tampa' nkomuriko' nii' damisimainku. 8Tenang ee'nang Publias bauma siipavoko uipaarii' ninka kuviri'oma, ee'noko Paula'ke bera beero'uma bireng pante'ura kunsivuio' taarevou'. 9Ee'noko tenang ee'nang tee tee' taarevoio' taaravaara temui'koo-nupoong ookara siipa-po'nupoong tee-anko porora taarevorou'. 10Teinge tee nii' avuavu'nanka mmau' amaaru'. 11Teketa' tee beekuri kaara tankinuko teketa tenkenampiru' aarerie teke kamaari bakaang batei-koo temui'koo otou'nareng-koo koinampira. Ee'noko temui'nupoonge ookara kapoo'nanka nanu'koo apuka'mariru'ning te' aareri-koo kuung si'memaaru'. Tereng aareri-nareng Aleksandaria' biikanareng miring Pauroonka Kumponinka tampaako'nareng, uro'kanoo'ke bore' kenaanka teka'nii'nareng. 12Teketa Siirakius basimarira teke beenang doong o'noru'. 13Ee'noko teketa tenkenampira tee dovinge dama'du-aape bii'muri'neeng-koo kororairai' nanampikotaa' doonko Reekium basimariru'. Teke na'mung doong o'norio' doving toroarama ee' depeto poio' tenkenampira ke'munta-na'mung namu'ke Puteoli basimarira aareri teka sipampiru'. 14Ee'noko teka nii'ke nii'ning Karistoo'koo baito-nupoong kune'arampirio' teing tasi'maarira bokumaaru' teke teing ninka nari' o'norii'naang ~ke'munta-taa doong-koo. Ee'noko temono-ita daanto kau'ke nanampiru' bera Rooma'aapenairu-koo basimariru'. 15Ee'noko teinge Karistoo'koo baito-nupoonge nii' moru'noo' taaravaara Rooma'keta porora narung osi-koo basiariru' nii' kune'maarii'naang, Aapia Bakanoo' Baaveroma tampaako'noo'. Ee'noko teing-koo nii'narionge pava beevaari baave-kooning otoko'noo'ka osia kune'maaru'. Paula' teing oovurira Kumponing-koo tampara tampuma domang purimparu'. 16Ee'noko tenang Rooma' tavo'marira Paula' baka oovunava-koo oto' piavoio' taura'pau' teka narunge piatooronuka-koonge tanatavui otoo'naang. 17Ee'noko beenang doong tankinuko Paula'ke ookara Ju'nupoong pankenanka teke otoroko'ning naro' bokuvuru'. Ee'noko tenang oosiaririo' Paula'ke aa'puru' teing, “Ee dii' mmarang, Ju'nupoong, ninge tee bane kapoo' nkoampa' niikaning nantoong orari-anta-koo ee'noko niikakatauro biikaning toomonanka, teka ning tamung dai'maara Jerusalema'ka Rooma'nupoong-anko tavo'mau'. 18Ee'noko teinge Rooma'nupoonge nkaang kara simpe'aara tee ning kiimata-ita unaa-antamaava'naang piavorou', kapoo' tenai'koo nkanai'koo ning boo'anta-koo makosi ooaavarura. 19Teketa tenang Ju'nupoong tee'koo piavoroaruio' ninge nii'na' noru'amparura Siisa' narung-koo aroo' sipantu' simpe'muu'naang. Nkaning Ju'kooning pankeng tuumpi-koo moa'. 20Tee'koo ning tuumpimau'noo'koo ninge dii' oorampira dii' kararampima naurampii'naang botomaring. Okora'noo' ning sieenai dai'mari o'noing tee aung kapoo': Tee Pako'pari'nii' Isireeli-nupoonge Nempaamaung ninge masika'antavamaung-koo.” 21Ee'noko teinge aa'pau' tee, “Nii'ke karavoto Judia'keta nkavampia' da'koo minkunaa, ee'noko nii'nung nii'marang-koong otoa' nii'koo a' pora nii' naumurima oraka' minkuruu'nung da'. 22Teka nii' dake minkueko taara-koo piamorimang dake noru'ei otoina', ai' nii'ke tee ookanairu-koo tamung oraka' nari' minkuaako taaravampimaung tevung nerakavung dake siompemanavung.” 23Tenang teinge doong nii'na'mung miru'evaara otoko'nava-koo karinga porou'. Ee'noko teie enang tevung nerakavung kankenkankeng-antavuru' teing, tane'keta bera kamunoo'ke basi. Ee' nauvuru', nantoong Kumponing-namuu'kooning arekee' oro'nuka teie daankivuru' teing-eta kara aa'noko Moosesie boto sipuma daarivuu'ning ee'noko teinge nii'ninge nakaro-nupoonge tenang-eta deto daariaako'ning, teing tasi'antavurii'naang tee Jiisuu' tee Kumponinge temu'keta Pako'pari'nii' bakaang muu' tare-koo. 24Ee'noko nii'ninge Jiisuu' tasi'pau' bakaang kara taaravaara, teka nii'ninge masika'antavaava'. 25Teketa siivenke'eema tenkenaava'naang nkoariko Paula'ke asi'naare minkuvuma aa'puu', “Tanuaang Meekung tee masika'paru'nung teing-koo diumaraang-koo Aisaia' karantavuko~ daarivuma aa'puu'noo'ka, 26‘Aing Ju'nupoong bera aa'periai, Dii'ke tee bakei bane nkaang kara taaraverikotaa', teka onoue komperiauka'nung; ee'noko bane taa'ni'anta ooverikotaa', teka tasi'periauka'nung. 27Tee' naueriaing, ai' aing nantoong teing maroita domang poruruorou'~ ee'noko biikaang punkaa' kapamporou'nankai maroita taaravaa'neeng-koo, ee'noko biikaang duta mutuuariru'nankai aa'no'neeng-koo: dutai tasi'paara, punkaa'ke taaravaara, domange onou kompaara ning-anko bere'ariko taare-antavarami'neeng-koo.’ 28“Enang tee, tee' daarivuu'noo'koo dii'ke noru'eriaing Kumponinge tee domang-anta bakaang Ju'deeaing-anko bee'naang tampuu'. Teinge taaravaavaing tee.” 29Ee'noko Paula'ke tee' minkuvuio' teing Ju'nupoong bii'ka deepaiko'eema tenkenau'. 30Ee'noko tee Paula' teva'koo kemare'ka ookutuning otou' dai'aritaa' baka moo'uma teva. Nantoong tee-anko poroko'ning onkeonke'uriko'. 31Ee'noko makempua' teing-koo daankivuko' tee Kumponing bakaang muu' ee'noko kapoo'ke avo'uaruko nau-antavuriko' Jiisuu' tee Ovoring tero Pako'pari'nii' ookara nantoong domamuriainoo'koo. Basi te'.

will be added

X\