Acts 25

1Enang tee Peestasi ovo'ma' deemparara beenang doong tankinuko Jerusalema'aape daanto beu' Sisaria'keta. 2Ee'noko teka tavo'arako piristi'nanka-koo ovontunge ee'noko Ju'nupoong-koo pankenankai Paula' tuumpiaako'ning nauau'. 3Ee'noko aa'na' etuau' tee eentavarima tee botoarako Paula' Jerusalema'aape tavo'aava'naang, taunga tavaava'naang maroau'na' noru'ai. 4Peestasie maku'urima aa'puu', “Paula' tee Sisaria'ke tareai otomaung ee'noko ning tee due'ka mee'naang noru'maramang. 5Tee'koo dii'koo nii'ning pankenanka ni'ninka nari' danto meriaing. Kapoo' oraka' nkovuu'ning otoko tee-koo deeko' teka dii'ke tuumpieriai.” 6Teketa Jerusalema'keta kivora doong divu'uaruko Peestasi danto Sisaria'aape beu'. Ee'noko dauna'mung kara simpe'doma ba'nanura Paula' po'antavaava'naang botoaru'. 7Ee'noko tenang Paula' kuung poio' teing Ju'nupoong Jerusalema'keta danto berou'ning tee koroai donkonaara kapoo' mmau'nanka ivekeng-koo tuumpiaara masika'antanoo' otoroaruu'. 8Teketa Paula'ke penkemparama aa'puu', “Ninge kapoo' teing aing ee' oro' toto'pui otoing nkoampa': Ju'nupoong biikaang boto, dootuu'nava pankava ee'noko tee Rooma'nung daurarong~ Siisa'.” 9Teka Peestasie Ju'nupoong dotu-anta-koo aa'puu' tee Paula', “Da' ee Jerusalema'aape daanto be'koo aroo'dari otong teka paararaavaina' teing aing kapoo' ning-koo dutakanoo'ka tuumpiraining-koo?” 10Teka Paula'ke aa'puu', “Ning aa' Siisa' bakanoo' kara simpe'doma donkonansi o'nong, aa' ee'noo' ning tuutunang-koo makosinoo', ai' ning Ju'nupoong-koo kapoo' orara nkoampa', tee' dake tampa' noru'ei otong. 11Ning kapoo' orarananka-nko deeko' ee'noko kapoo' ning boo'koo makosi nkoantu'nung deeko' ning boo'keta mmari'koo paaramaravarupeu', teka teing kapoo' ning tuumpimaamaing boturopananka deempari otoko naning otoa' teing-anko sing-antamupeu'nung, ai' ning tee Siisa'koo aroo'mari o'nong teie paaramuaing.” 12Teketa Peestasie bakaning tuutunang-koo~ norukasi'nanka ninka minkuarira aa'puu' tee Paula', “Siisa'koo aroo'daring tampeio' aa'damaang: Makosi, tee-anko Siisa'anko naniaing.” 13Enang tee, nii'ning doong divu'uio' tee Akiripa', daurarong~, teni ninka baara'ma'naang Beenis ninka, Sisaria' tavo'kuretu' Peestasi onkeonke'uree'naang. 14Ee'noko teke mmau' doong otorora Peestasie Paula' bakanai' tee daurarong nauvuma aa'puu', “Anke naning narung otomang Piiliksie kiimatanava-koo otoko sipura tenkenuu'nung. 15Ee'noko tenang ning Jerusalema' o'noko teing piristi'nanka-koo ovontunge ee'noko pankenankai Ju'koo-nupoonge tee dooremaama nia'mau' tee kara taaraevomira dupisi'koo makosi tampama'naang. 16Teketa ninge aa'parantu' teing, ‘Nii' Rooma'nupoong tee' nkomariaung naning nii'ninge dupisi'koo sing-antavampii'naang tutung tuumpiaamaing ninka oing ooveearuko, napo' doona penkemparavaing-koong oovuaruko.’ 17“Tenang teing ninge nauaransio' a' oosiariru'nang ning nemarava' dauna'mung kara simpe'doma ba'nanamira botomaru' tee naning po'antavaava'naang. 18Teketa tenang teinge tuumpiaako'ninge donkonaara teinge kapoo'koo oreng-pina' ninge tero noru'antu'ning-koo tuumpiaava'. 19Teka nii'ning kapoo' oovuning-koo turampaako' daang masika'antavaamaing-koo, ee'noko naning narung-koo Jiisuu'koo boo'paru'nung-koo teka Paula'ke domamparu'nung tampukoo'. 20Ning amurii' kapoo' baakeeneama simpe'koo paa'marara ninge nia'antu' aa'pama, ‘Da' ee Jerusalema'aape nanipeu' ee'noko teka dii' Ju' diikaning koompaara'navitue simpe'daavai dakanai'koo?’ 21Teka tenang Paula' Siisa'ke simpe'uu'naang tamparako ning botomaru' pinka'ai tanatavaava'naang bera Siisa'anko botoampainoo'ke basi.” 22Ee'noko Akiripa'ke Peestasi aa'puu', “Ninge ninka taara-koo piamomaang tee aung naning.” Ee'noko Peestasie aa'puu', “Makosi, tane' taaraveaing tee.” 23Teketa dauna'mung tee Akiripa' ee'noko baara'ma'naang Beenis, dauraronanka biikaninge nepunepu'ke aa'na' nepu'aresi poreta tumparetu' te' tuutunang nkoroma ee'noko teing kivora daaku' piatooronuka tanatanuka nari' porou' ee'noko teing nantoong tevuntu'koo bore'nuka. Teketa tee Paula' Peestasie botovurio' asi'na'moo po'antavau'. 24Ee'noko teketa Peestasie aa'puu', “Da' Daurarong Akiripa' ee'noko dii' ookara a' nii' ninka nari' porining, ooveriai aung naning Ju'nupoonge ning eentamaamaung ookeng-koo aa'noko Jerusalema'ka ee'noko anka, otoaroo'naang tampaamaung peusi'kaama. 25Teka ninge kapoo' tee boo'anta-koo makosi ooampa'. Ee'noko ee'nara baka Siisa'ke simpe'uu'naang tampario' ninge Siisa'anko botoama'naang matauantu'. 26Teka ninge kapoo' taa'ni'antavama daariampaing oto'memua' tee nkaang ovoring nauama tee-koo. Tee'koo ninge a' dii'anko, ee'noko baru'noo' da'anko daurarong Akiripa'anko donkong-antavansing anketa paaravampira kapoo' oreng ooampiaining daariama'naang. 27Ai' ninge ee' ooamaang, ninge naning kiimatanung tamung boturopa botoamparupeu' tuumpiaamaing-koong siraka'anta otoaruko.”

will be added

X\