Acts 23

1Ee'noko Paula'ke dutai naapu narung oovurira teing koompaara'navitu aa'puru', “Ee mmarang Ju'nupoong, Kumponing-koo dutakanoo'ke aa'dampimang, ninge bakaang boto maroita toto'pansi o'noaung e'mung-koo basinoo'.” 2Ee'noko teie piristi'nanka-koo pankainge Ananaiasie karang-koo tanko'paava'naang botovuru' teing tee-koo due' donkonai otoroko'ning. 3Ee'noko Paula'ke aa'puu' tee, “Nna' da' Kumponinge tanko'duainge, kuung-takaa'. Dake ape' ning boto ninka paaramee'naang te' ba'nantaring ee'noko tee boto sipei ning tanko'koo botoraramang ee?” 4Ee'noko teinge teke due'ke donkonai otoroko'ninge aa'pau', “Dake ee tee oraka' minku-koo makosi Kumponing bakaang piristi' pankaing?” 5Ee'noko Paula'ke aa'puu', “Ee mmarang, ninge noru'ampa' tee Kumponing bakaang piristi' pankaing deeko'. Masika' Daari Meekunge ee' minkuvui otong, ‘Dii'ke oraka' minkueriauka' tee nantoong diikaning tare-nupoong-koong narung.’” 6Teka tenang Paula'ke tasi'purira teing-koo nii'navitu Noru' Pitunavitu ee'noko nii'navitu Boto Keperuu'navitu~ tee koompaara'navitu-koo bokuma aa'puu', “Ee mmarang, ning tee Boto Keperuu'navitu-koong ee'noko mma' Boto Keperuu'navitu-koonge. Ning tee tuutunang-koo~ o'nomang dama'ke boo'keta domamariaing masika'antavamaung-koo.” 7Ee'noko tenang teie tee' minkuvuko teke siivenke'eu' teing Boto Keperuu'navitu~ ee'noko Noru' Pitunavitu~ ee'noko tee oosinaura' teke tankaamparu'. 8Noru' Pitunavitue aa'ning penkempaamanoo'koo tee': boo'keta daa', koosinunanka, tanuaang; teka Boto Keperuu'navitue aing ookeng masikeng tampaakoo'. 9Teketa karakarare pankaing nkoaru' ee'noko nii'ning Boto Keperuu'navitu-kooning boto naunuka donkonaara deravariru' aa'paama, “Nii'ke kapoo' orara ooampia' aung-koo. Ai' pa tanuaange nii'noo' koosinunge nauvumaung deeko' turampampi'neenga.” 10Ee'noko tenang tee turanturang tavu' aapearako tee piatooronuka-koong bore' avorou' tee Paula' bitutuaa'neeng-koo teinge, ee'noko piatooronuka-koo botoaru' doonko siarira tee Paula' pari'aarira mmari'antavaara biikanava-koo be'antavaava'naang. 11Te'mung ee'na'mung muunga Ovoring tee-anko due' donkonura aa'puu', “Noru' purintaravai, ai' dake tee ning sira'memana' anke Jerusalema'ke tee' nari' tampa' sira'mee'naang teke Rooma'ke.” 12Teketa tane'puko nii'ning Ju'nupoong mumunsiarira pinkapinka'eu' sinearima taamanaavaroo'naang bera Paula' dupisi'aavainoo'ke basi. 13Donkaang karekai'pi divu'ke tee aung mumunsinang nkoau'. 14Ee'noko teketa teing aa'ning-anko berou': piristi'nanka-koo ovontung ee'noko Ju'nupoong-kooning pankenanka-anko. Berora aa'pau', “Nii' teing koonto' nii'ka pinkapinka'meerira sinemaririning taamanampiaroo'naang bera Paula' dupisi'ampiainoo'ke basi. 15Dii'ke koompaara'navitu ninka nau-antaveriaing tee piatooronuka-koong bore' tee Paula' dii'anko depeto sing-antavuaina' tuumpiaamanoo'koo tampa' tasi'perii'naang tamperima. Ee'noko nii' teing maamumariri o'noriaing tavu'koo tee taapo'ka dii'anko due'aravaruko.” 16Enang tee Paula' baampuru'nunge taaravura tee maamunoora' bera piatooronuka biikanava'ke koinura nauvuu' tee Paula'. 17Ee'noko Paula'ke narung piatooronuka daaku' tanatanara bokuvura aa'puu', “Aung nemaka piatooronuka-koong bore'anko be'antaveai. Kapoo' nauvuu'naang aunge tee.” 18Ee'noko teie tee be'antavura piatooronuka biikaang bore'anko aa'puu', “Teie Paula'ke kiimata-koo otoinge bokumura naumuing aung nemaka da'anko tavo'ama'naang kapoo' da' naurua'naang.” 19Ee'noko teie piatooronuka-koong bore'ke bireng-koo kompura taapo' be'antavura tana'uu' tee, aa'puma, “Tee aming kapoo' dake naumee'naang ning?” 20Ee'noko teie aa'puu', “Teinge Ju'nupoong-koo pankenankai kara naroompaing da' nia'daako Paula' teing-anko doonko koompaara'navitu-anko be'antavee'naang tane' aavavaama tee-koo keperuu'ai tasi'paava'naang tampaama. 21Teka teing aroo'eriauka' tee', ai' donkaang karekai'pi divu' maamuariri otoroo'naang baku'ariri tee dupisi'koo. Teing bii'ka sinearirining taamanaavaroo'naang bera tee Paula' dupisi'aavainoo'ke basi. Ee'noko enang teing teing maamuariri otorong tee taura' da'keta nempaitaa'.” 22Teketa teie piatooronuka-koong bore'ke tee nemaka tenkeng-antavuu' teketa orokovuma aa'puu', “Naning naueauka' tee' ning naumeina'.” 23Tenang teie kenaanka piatooronuka daaku'na' tanatavaareko'naanka bokuvureta aa'puretu', “Maamu-antaverereriaing kenaanka daaku' piatooronuka ee'noko naruaape-ita kenai'ka [70] oosie nanu'nuka ee'noko kenaanka daaku' daanko'po'nupoong, ee'noko tenang aasi'koo dua'nang doinang muunga Sisaria'navuntu'aape beriai. 24Ee'noko Paula' ba'nanuaining oosining maamu-antaveriai, ee'noko tampa' basi-antaveriai tee-anko ovo'ma'anko Piiliks-anko.” 25Ee'noko karavoto ee'pina' daarivuu', 26“Ninge Kalaudias Lisiasie da' pankaing ovo'ma' Piiliks onkeonke'damaang. 27Aung naning tee Ju'nupoonge moo'aara teinge tavaava'naang nkoaako ninge nkaning ninka piatooronuka ninka merira tenkeng-antavampira domampampirieeng, ee' noru'ampira aung tee naning Rooma'nung. 28Ee'noko tuumpiau'noo'koo noru'koo piamora ninge doonko koompaara'navitu-koo be'antavantu'. 29Ee'noko biikaang boto-koo tuutunampaako ooantu', teka tuumpiau'ning-koo kapoo' boo'anta-aapenung ee'noko kiimata-aapenung ooampa'. 30Ee'noko ning tee Ju'nupoonge tee naning dupsi'aava'naang mumunsiaako narunge makenge naumuing. Tee'koo ninge namu'ke da'anko botoansing. Ee'noko napo' teing tuumpiaamaing da'anko botoaransinge da'koo uro'kanoo'ke sira'paava'naang teing kapoo' tuumpiaamaing. Enang bakearing.” 31Teketa tee teinge piatooronukai tee boto siompai Paula' bokuaara berou' muunganang Antipatiris-aape. 32Ee'noko teing piatooronuka kau'ke nanaako'ning teketa' dauna'mung toroariru' biikanava-aape, oosie nanu'nuka ninka nari' nanaako tee Paula'. 33Ee'noko tenang teing Sisaria' basiarira tee karavoto~ avau' tee ovo'ma'. Ee'noko Paula' tee-anko tavo'au'. 34Tenang teie tee karavoto deeruvura teie tana'uu' tee Paula', aa'puu', “Da' aremeensi'koong?” 35Ee'noko tenang Paula' Silisia-nung noru'ura teie aa'puu', “Da' ninge tareamanoo'koong deentarako ninge taararerompaing dakaang kara maku'na' tenang teing tuumpiraamaing poroainang.” Ee'noko botoaru' tee Daurarong~ Eeroti' bakanava-koo otoko Paula' tanatavaava'naang.

will be added

X\