Acts 22

1“Dii' mmataraang ee'noko mmarang Ju'nupoong, taarameriaing nkaang kara penkemarama minkuama'naang otoing dii'koo.” 2Ee'noko tenang teinge biikana' karoko taaravaara aa'na' dooroompariru' teing. 3Ee'noko aa'puu', “Ning tee Ju'nung, Taasusie ponto'maru'nung Silisia-koonoo'ke, teka anke Jerusalema'ke Kameliele-ankoi baremaru', niikakatauro-itaing boto to'biiari otoina' nari'; 4Dii' e'mung otorina' nari' Kumponing iri'moi siompama aa'noko' avung-koo Jiisuu' sionavung-koo ning o'noinavung-koo otoroko'ning manki'antavarama nii'ning dupisi'antavarantu'. Nantoong aa'ning donkaang ee'noko maniku' dai'arama kiimata-koo siparanko'. 5Teie piristi' pankainge ee'noko ookarai Ju'nupoong-kooning pankenanka-koo koompaara'navitue masikee-antamaapeu'. Teing-eta ee'ning-eta ninge karavoto~ taura'kooning nkavantu' nii'marang Ju'nupoong-anko Damaskas otoroko'ning-anko be'koong. Ee'noko Damaskas-aape nanantu' teing Jiisuu' sionavung-koo otoroko'ning baramparamira a' Jerusalema' kiimata-koo siparama'naang.” 6“Ee'noko nanama Damaskas due'anko tenang duaaki'nang araka pankainge paning-eta too'muu' ning. 7Ee'noko ning te' doonko kansi'koo dua'maru' ee'noko aurong taaravantu' aa'muko ning, ‘Soolo ee, Soolo, dake aming-koo ning manki'antamemaung?’ 8Ee'noko maku'ama aa'pantu', ‘Da' baa Ovoring?’ Ee'noko teie aa'muu' ning, ‘Ning Jiisuu', Nasareti'nung, tee ee'nara dake manki'antamemaung.’ 9“Enang teing nantoonge ni'ninka nanampiko'ninge araka ooau', ee'noko aurong taaravau', teka miru'noo' nkavaavaruu' tee-koong kara ning karamuko'nung-koong. 10Ee'noko ninge aa'pantu', ‘Ninge aming nkoama'naang Ovoring?’ Ee'noko Ovoringe aa'muu' ning, ‘Deto donkonira Damaskas tuntaravaing ee'noko teka nauraava'naang da' teing kapoo' dake nko-koo miru'nii'ning.’ 11“Ee'noko tenang ning oo-koo makotumparuko arakai kaputu'antamuio' ning birenge komai nanu'antamau' teinge nari' nanampiko'ninge bera Damaskas basi-antamau'. 12Temono-koo naning narung miring Ananaiasi otoko', tee ee'nara Kumponing-koo mee'du'piari otoko'nung Moosesi-nung botoi minkuvui otoina' ee'noko ookarai Ju'nupoonge aa'na' tampara tampaako' tee. 13Tee ee'nara ning-anko pora due' donkonura aa'muu', ‘Mmaiko', Soolo, duta banteai enang.’ Ee'noko tenang tee-koo batei-koo ning bantomira tee ooantu'. 14“Ee'noko teie aa'muu', ‘Teie Kumponing niikakatauro biikaange da' miru'duu'nung bakaang pia tasi'pee'naang ee'noko tee naning koonto' Jiisuu' dakaang dutai oovee'naang ee'noko bakaang kara taaravee'naang bakaang karang-eta. 15Ai' da' tee bakaang kara sira' ookara nantoong-koo teing kapoo' taaraveiaining-koo ee'noko ooveiaining-koo. 16Aia' deto nentarava' donkonira ntong-koo minkie meeka'antararavai, ee'noko dakaang oraka' nkonanka kuiaravai bakaang miring tampeko.’ Ee'noko tee'puio' tee' meeka'antamarara Jerusalema'aape toromaru'.” 17“Ee'noko Jerusalema'aape toromarara avaka'koo dootuu'nava pankava-koo kunsimarama nii'naung-koo~ bere'maru'. 18Ee'noko Ovoringe aa'muko ooantu', ‘Iri'narung daa'darara Jerusalema'keta tenkeniai, ai' aing amono-nupoonge tee taararaavaroo'naang dake ning sira'meko anke.’ 19“Ee'noko ninge aa'pantu', ‘A, tee aa' tampa' noru'mai otong, ai' ninge teing pakuarama aa'noko'nung ookara pava dootuu'nanka-koo dai'arama tavaranko' teing-eta siivenke'arima da' Jiisuu' masika'antaraako'ning. 20Ee'noko te'mung tee Sitiveni da' sira'duko'nung dupisi'au'na'mung ning teke due'ke donkonansi mononopa'nanka tee tavau'ning biikaning tareansi tampa' tampanko'.’ 21Teka Ovoringe aa'muu', ‘Ninge aa' botoramaang, tenkeniai isipo'aape Ju'deeaing-anko.’” 22Teinge karingai barorompau' tee Paula'ke te' basinoo' kara minkuvuko, teka karoma Ju'deeaing-anko beainaare-koo basivuko deto bokiaama aa'pau', “Kansi'koo domampari otoauka'!” 23Ee'noko tee' peusi'kaama misimisiarima da'mong ee' deto bai'au' Paula'aape. 24Ee'noko tee' nkoariko tee piatooronuka biikaang bore' botoaru' piatooronuka biikanava'koo po'antavaarai'nange mura'aama okora' besi'aava'naang tee kapoo' tee turampaama bokiaako'nung. 25Teka tenang mo'ming-koo bi'aara mura'aava'naang beeto'aako Paula'ke nauvuu' tee narung daaku' piatooronuka tanata teke donkonui otoko'nung, aa'puu', “Ning tee Rooma'nung, ee'noko niikaang botoi taura'duriaung Rooma'nupoong tamung mura'koo kapoo' orara mme' ooveria'.” 26Tenang teie piatooronuka daaku' tanatanarai tee' taaravura tee piatooronuka biikaang bore'anko bera aa'puu' tee, “Aung naning dake arekee' nkovee'naang, ai' aung tee Rooma'nupoong-koong.” 27Tee'koo teie piatooronuka biikaang bore'ke pora aa'puu' tee Paula', “Naumeai, da' ee tee Rooma'nupoong-koong?” Ee'noko teie aa'puu', “Ee'.” 28Ee'noko teie piatooronuka biikaang bore'ke maku'uma aa'puu', “Ninge mmau' mooni'ke moo'antu' tee' naning Rooma'nung deemaraa'naang.” Paula'ke aa'puu', “Nka ninge moo'ampa', ning Rooma'nung paramau'noo'keta.” 29Teketa tee teing mura'aama okora' besi'aava'naang mau'aako'ning namu'ke dunka'pariru' tee-ankoita. Ee'noko tee piatooronuka-koong bore' avorou' tee Paula' Rooma'nung tasi'pura ee'noko boto toto'pui dai'uu'na' tasi'parara. 30Teketa dauna'mung teie bore'ke Ju'nupoonge tuumpiau'noo'koo okora' masipo' noru'koo piavora, Paula' sing-antavura botoaru' teing piristi'koo ovontung ee'noko ookara koompaara'navitu kune'eea'naang. Ee'noko teie Paula' doonko be'antavura teing-koo uro'kanoo' donkong-antavuu'.

will be added

X\